Joshua 14 - Ohiatonhseratokénti

Tsi Naʼtekenhnarí꞉tons Ne Kanakeráhseras Ne Tsi Iaʼtewatséntos Nokwá꞉ti Ne Jordan

¹ “Eleazar ne rokhá꞉res, Joshua, tánon ne sakotihentèn꞉se ne kahwá꞉tsires ne Israerʼró꞉nonke ne raotitióhkwas wateshakotihiaʼkhónhase nonhóntsas ne Canaan né꞉ne tsi iaʼtewatséntos nokwá꞉ti iotohetsthákwen ne Jordan Kaniataratátie tsi naʼtehónteres nonhkweshón꞉ʼa ne Israerró꞉nonhke. Tánon ken kí꞉ken nihiawénhen.”

² Tsi nihoró꞉ri ne Roiá꞉ner ne Mahís, ne rahotinakeráhseras ne tióhton tánon tshiaʼtsewasénhnon nihotitióhkwake ne Israerʼró꞉nonke ne tsi iaʼtewatsénhtos nokwá꞉ti ne Jordan Skentiohkwà꞉tions wahatiwasthotión꞉ko tsi nakanakerahseró꞉ten enhatiienà꞉seron.

^3-4 Ne Mahís ó꞉nenk nénhne teshakowí꞉hon nonhóntsas ne tehotitióhkwakes tsiatesewasénhnon ne tsitʼkarahkwí꞉nekens nokwá꞉ti ne Jordan. (Ne tsi nitotwatsiríhnon ne Só꞉se tehothinenratʼkháshion tekentióhkwake iehonathónhon: né꞉ne Manasseh tánon ne Ephraim.) Ethosà꞉ne, ne Mahís iáh nénhʼne thén꞉en theteshakó꞉wi ne Levites nasakorakwén꞉ni ne kanakeráhsera. Khé꞉kok, ne wahatiié꞉na ne tsi kanatowá꞉nens nón꞉we nahathiʼterón꞉take, tánon ó꞉ni ne kahenthá꞉kes ne nénhne ne rahotiʼtshenenhó꞉kons akonwatiʼteronhthákwake.

⁵ Nonkweshón꞉ʼas Nisraerʼró꞉nonhke wathatinà꞉rihte nonhóntsas kwáh ki tsi nihorihón꞉te ne Roiá꞉ner ne Mahís.

Ne Hebron Nón꞉we Caleb Nénhne Tahónhion

⁶ Énska wenhniserá꞉teʼkwe ónhkak tsi nihá꞉ti ne raotitióhkwakon ne Judah niahà꞉en ne Gilgal nón꞉we wahonwatkénhsera ne Joshua. Raónha ne Caleb wahawénhase, “Saterièn꞉thare tsi nahó꞉ten ne Roiá꞉ner rá꞉wen ne Kadesh Barnea nón꞉we tsi nòkwah ní꞉se tánon ní꞉i rahonhà꞉ke ne Mahís, né Rawenni꞉io rahonkwè꞉tha.

⁷ Kaié꞉ri-niwáhsen satewakoserià꞉kon nó꞉nen ne Roiá꞉ner raonhá꞉tshera Mahís iahakató꞉ri ne Kadesh Barnea nakathonhontsatkénhsera. Kwáh orihwiiohón꞉we tsi sahiró꞉ri.

⁸ Ne ronhnónkwe ne wahakwateró꞉sen, ne ki nénhne ne, washakotiʼterónhkwen nonhtionhkweʼtashón꞉as. Ók kwáh orihwiiohón꞉we tsi wahiwenhnáraʼkwe ne Roiá꞉ner Nakení꞉io.

⁹ Ne tsi thóh nátiere, Mahís wahakararátsten ne kheienʼokónhas tánon ní꞉i tsi kwáh oriwihiohón꞉we tsi enhiakwaié꞉na nahionkwawenhkónhweke nonhóntsa tsi nón꞉we nonhtháke nón꞉wa.

¹⁰ Ók nón꞉wa, Satkátho. Ó꞉nen kaié꞉ri-niwáhsen-wísk nihioserá꞉ke tsi náhe ne Roiá꞉ner thoró꞉ri ne Mahís. Thóh shikahá꞉wi ne Israerʼró꞉nons iahonwentsathèn꞉ke niehoné꞉non, tánon ne Roiá꞉ner, tsi ki nihorarátston, tonáhe sihakónhnetie. Tatkenhénhion! Shaʼté꞉kon-niwáhsen-wísk naʼtewakoserià꞉kon

¹¹ tánon kwáh shé꞉kon é꞉tho nikeʼshátste nó꞉nen ne Mahís shahakató꞉ri. Shé꞉kon é꞉tho tsi nikeʼshátste nakaterí꞉io tó꞉ka ó꞉ni nó꞉ia nahorihó꞉ten akénhake.

¹² Ó꞉nenh káti, ne táskon ne tsi iononhtharónhnion kanakerahserá꞉ien né꞉tho Roiá꞉ner rakarahratstén꞉ni ne tewenhniserá꞉teʼkwe nakonhkweʼtashón꞉as tánon ní꞉i saiakwatró꞉ri. Waʼkwahró꞉ri né꞉tho ronhnónkwes ronhwatinaʼthónkwa Anakim thóh ratiʼterónhthakwe ne kowá꞉nens watenhénrotes tekawanáktons ne tsi kanatowá꞉nens. Tó꞉ka nón꞉wa ne Roiá꞉ner enhiakeʼnikwekónhake nakhehiaʼtí꞉nekenhwe, kwáh ki tsi niháwen ne Roiá꞉ner.”

¹³ Ne Joshua wahohiaʼtaté꞉risthe ne Caleb ne roiénha ne Jephunneh tánon taháwenh ne kanatowá꞉nen Hebron nahowenhkénhake.

¹⁴ Ne Hebron shé꞉kon ne rahonáwenk ne tsi tahawatsiratátie ne Caleb, tiorì꞉wa tsi kwáh roriwatókenhne rowenhnaráhkwakwe ne Roiá꞉ner, ne Sakoní꞉io Israerʼró꞉nonhke.

¹⁵ Nohén꞉ton kí꞉ken etsaháwenhne, ne kanatowanénhke ne Hebron ne konhwanaʼtónhkwake Arba. Ne Arba ne thahonhà꞉a thasenhnowá꞉nenhne tsi nihá꞉ti ne Anakim. Ó꞉nen ki skén꞉nonk thí꞉ken ne ionhontsá꞉ien.