Joshua 13 - Ohiatonhseratokénti

Ne Roiá꞉ner Wahoró꞉ri Ne Joshua Niaháhawe Tsi Ní꞉kon Shé꞉kon Hiothaténron Nohóntsa Tánon Teshakohiaʼkónhas Tsi Naʼtehóntere Ne Raotitióhkwas Nisraerʼró꞉nonke.

¹ Ne Joshua ó꞉nen kwáh thóh tsi nithó꞉hion. Ne Roiá꞉ner wahawénhase, “Ó꞉nen saksténha, ók shé꞉kon wé꞉so ionhontsá꞉ien ne iakáhake:

² kanakerahserakwé꞉kon ne Philistia ó꞉ni ne Geshur,

³ ó꞉ni tsi tkanakerahserá꞉ien ne Avvim nenhtiè꞉ne nokwá꞉ti. (Ne iohontsá꞉ien tsi nitiawé꞉non ne kahionhatátie Shihor, ne tsit karistatátie ne Egypt, kwáh tsi nió꞉re nothorè꞉ke nokwá꞉ti tkaristatátie ne Ekron, akénhake né꞉ne Canaanite; ne ronhtinontí꞉ios Philistines ratinákereʼkwe ne Gaza, Ashdod, Ashkelon, Gath, ó꞉ni ne Ekron.)

⁴ Tánon shé꞉kon akwé꞉kon ne Canaanites rahotinakeráhseras, ó꞉ni ne Mearah (né꞉ne rahononhóntsa ne Sidonró꞉nons), tsi nió꞉re ne Aphek, né꞉ne tsi tonateristatátie ne Amorʼró꞉nons;

⁵ ne rahononhontsà꞉ke ne Gebalró꞉nons; ohontsakwé꞉kon ne Lebanon né꞉ne tsitkarahkwí꞉nekens nokwá꞉ti, tánon ne Baalgad nitiawé꞉non, né꞉ne entiè꞉ne nokwá꞉ti ne tsi Ionónhte ne Hermon, tsi nió꞉re ne Hamath Iehiotohétston.

⁶ Thóh í꞉kare kí꞉ken ne rahononhontsà꞉kes ne Sidonró꞉nons, thóh nonh nihatinákere ne tsi ionhniarónhnions kanakerahseraké꞉rons tsi naʼtetiátere ne Lebanon Ionhnontharónhnions tánon ne Misrephoth Maim. Kwáh ratikwé꞉kon kí꞉ken onhkweshón꞉ʼas enkhehiaʼtínekenhwe tsi nienhónhne Nisraerʼró꞉nons. Kwáh ó꞉nenk tsi thenshenahrí꞉ten nonhontsaʼshón꞉as Nisraerʼró꞉nons, kwáh ki tsi nikonhró꞉ri tsi náshiere.

⁷ Ó꞉nen káti, theshinárit kí꞉ken ohóntsas tsi naʼtehóntere nó꞉ia tióhton nihotitióhkwakes tánon ne shatekanenhrí꞉hen ne Manasseh, ne ronónha ahontié꞉nawatste tsi ahonawenhkón꞉weke.”

Tsi Naʼtekenhnaríhthon Ne Tsi Kanakerahserá꞉ien Ne Tsitʼkarahkwí꞉nekens Nokwá꞉ti Ne Jordan

⁸ Ne rahotitióhkwas ne Reuben ó꞉ni ne gad ó꞉ni nó꞉ia tióhton nihotitióhkwakes ne Manasseh ó꞉nen nénhne rotiienàhon nonhóntsas né꞉tho Mahís teshakó꞉wi, né꞉ne Roiá꞉ner raonhátsera, theshakó꞉wi; né꞉ne tsitʼkarahkwí꞉nekens nokwá꞉ti ne Jordan Kaniataratátie.

⁹ Ne rahotinakeráhsera ióhio ne Aroer (né꞉ne tsi iehiotʼthe ne Arnon Ahonráhkwakon) tánon kwáh asénhnon nón꞉we nikaná꞉taien ne kanatowá꞉nen ne thóh ahonráhkwakon tánon thóh í꞉wa akwé꞉kon ne iotonhontsakwaríhshions ne tsi nitiawé꞉non ne Medeba nón꞉we tsi nió꞉re ne Dibon.

¹⁰ Thóh nió꞉re nieiawè꞉non ne tsitkaristatátie ne Ammon tánon thóh í꞉wa akwé꞉kon ne tsi kanatowá꞉nens né꞉ne Amorʼró꞉nons ronhwanonhtí꞉iokwe Sihon thoniarotháronhne, né꞉ne Heshbon nón꞉we nihakó꞉rahkwe.

¹¹ Thóh í꞉wa ne Gilead, ne tsi kanakerahserá꞉iens ne Geshur tánon ne Maacah, akwé꞉kon ne tsi ionónhthe ne Hermon, tánon atenathakwé꞉kon ne Bashan kwáh tsi nió꞉re ne Salecah.

¹² Thóh í꞉kare ne rahonhnonhtihiótsera ne Og, né꞉ne iatesaonhà꞉a ne Rephaim, né꞉ne raónha thoniarotháronhne ne Ashtaroth ó꞉ni ne Edrei. Mahís kí꞉ken shakosénhnion ki onhkweshón꞉a tánon sakohiaʼtinekén꞉en.

¹³ Ók ki, Nisraerʼró꞉nons iáh teshakotihiaʼtinekén꞉en nonhkweshón꞉as ne Geshur nón꞉we ó꞉ni ne Maacah; shé꞉kon nón꞉wa Israerró꞉nonhke ratinákere.

¹⁴ Ne Mahís iáh othé꞉nen tesakahontsá꞉wi ne Levi. Tsi ki nihoró꞉ri ne Roiá꞉ner ne Mahís, ne enhatiié꞉na tsi enhontié꞉nawatste nahonawenhkhón꞉weke ne ronhwateskontá꞉ni ne ietsienharáhkwake ne Roiá꞉ner Raní꞉io ne Israerake.

Ne Kanakeráhsera Ne Thonwaná꞉wi Ne Reuben

¹⁵ Ne Mahís ostónha shakahontsá꞉wi ne kahwá꞉tsires ne rahotitióhkwas ne Reuben nahonawenhkhón꞉weke.

¹⁶ Ne rahotinakeráhsera iéhio ne Aroer (né꞉ne tsi ieiotʼthe ne Arnon ahonráhkwakon) tánon ne kwáh asénhnon nón꞉we nikaná꞉taien né꞉tho ahonráhkwakon ó꞉ni thóh í꞉kare akwé꞉kon ne ionhthonhontsakwahríhshion aktónhties ne Medeba.

¹⁷ Iekakwékthon ne Heshbon tánon akwé꞉kon ne kanatowá꞉nens ne tsi nonhwésons ne iontonhontsakwahríhshions: né꞉ne Dibon, Bamoth, Baal, Beth Baalmeon,

¹⁸ Jahaz, Kedemoth, Mephaath,

¹⁹ Kiriathaim, Sibmah, Zereth Shahar ne ionhniáhere nahonráhkwakon nón꞉we,

²⁰ Bethpeor, ne tsi iononhthakárenhre ne tsi Ionónhthe ne Pisgah, ó꞉ni ne Beth Jeshimoth.

²¹ Iekakwékthons akwé꞉kon ne kanatowá꞉nens ne tsi iothonhontsakwahríhshions tánon rahonnonhtiiotserakwé꞉kon ne Amorʼró꞉nons ronhwanonhtí꞉io Sihon, né꞉ne raónha rakó꞉raʼkwe ne Heshbon nón꞉we. Mahís ne rosénhnion, ó꞉ni ne ratikóras ne Midian: Evi, Rekem, Zur, Hur, ó꞉ni ne Reba. Ratikwé꞉kon ronatkorástonhne nonhóntsas né꞉ne ronhnontí꞉io Sihon rahoriwà꞉ke.

²² Tsi niká꞉iens nonhkweshón꞉ʼas ne Israerʼró꞉nonhke washakotinonhwariaʼkón꞉nion né꞉ne shakokhiathonserátkenhse Balaam ne roiénha ne Beor.

²³ Ne Jordan né꞉ne tsi iaʼtewatsénhtos nokwahtí꞉son ronateristatátie ne rahotitióhkwas ne Reuben. Ne kí꞉ken ne kanatowá꞉nens ó꞉ni ne kanathakérons thonwanawí꞉hons ne rahothiwá꞉tsires ne rahotitióhkwas ne Reuben ne nahonawenhkón꞉weke.

Ne Kanakeráhseras Thonwaná꞉wi Ne Gad

²⁴ Ne Mahís teshakó꞉wi nónhne ostónha nohóntsa ne rahotiwá꞉tsires ne rahotitióhkwas ne Gad nahonawenhkón꞉weke.

²⁵ Ne rahothinakeráhseras eʼhí꞉kare ne Jazer ó꞉ni akwé꞉kon ne kanatowá꞉nens ne Gilead, satehiohontsí꞉ien ne Ammon tsi nió꞉re ne Aroer, né꞉ne tsitʼkarahkwí꞉nekens nokwá꞉ti ne Rabbah;

²⁶ ne rahononhóntsa et tsioténhtion ne Heshbon né꞉ne Ramath Mizpeh nietiawé꞉non tánon ne Betonim, tsi naʼtetiawé꞉non ne Mahanaim tsi nió꞉re ne tkaristatátie ne Lodebar.

²⁷ Nahonráhkwakon ne Jordan nón꞉we thóh í꞉kare ne Beth Haram, Bethnimrah, Sukkoth, ó꞉ni ne Zaphon, ne iothaténrons ne rahononhtiiótsera ne ronhnonhtí꞉io Sihon né꞉ne Heshbon nón꞉we. Né꞉ne tsi ronateristatátie ne tsi iaʼtewatsénhtos nokwá꞉ti thóh kaniataratátie ne Jordan tsi nió꞉re ne othorè꞉ke ne tkaniátaro ne Galilee.

²⁸ Ne kí꞉ken ne kanatowá꞉nen ó꞉ni ne kanataiéntons thonwanawíhon ne rahothiwá꞉tsires ne rahotitióhkwas ne Gad ne nahonawenhkón꞉weke.

Ne Kanakeráhseras Thonwanawí꞉hons Ne Tsitʼkarahkwí꞉nekens Nokwá꞉ti Ne Manasseh

²⁹ Ne Mahís ostónhas teshakowí꞉hon nohóntsas ne rahotiwá꞉tsires ne shatehothitiohkwí꞉ien ne Manasseh nahonawenhkón꞉weke.

³⁰ Ne rahotinakeráhseras iéhio ne Mahanaim tánon thóh í꞉kare akwé꞉kon ne Bashan—kanakerahserakwé꞉kon ne Og, né꞉ne ronhnonhtí꞉io ne Bashan, tánon ó꞉ni akwé꞉kon ne iá꞉iak-niwáhsen nikaná꞉takes ne Jair né꞉ne Bashan nón꞉we.

³¹ Thóh í꞉kare nasénhnon ne Gilead, ó꞉ni ne Ashtaroth ó꞉ni ne Edrei, né꞉ne kanathakweʼní꞉io ne kanatowá꞉nens ne Og kanakerahserá꞉kons ne Bashan nón꞉we. Akwé꞉kon kí꞉ken ne thonwanawí꞉hons ne asénhnon rahotiwá꞉tsires tsi nithonatwatsirí꞉non ne Machir ne roiénha ne Manasseh.

³² Thóh ki ní꞉ioht ne Mahís tsi tehonaríhtons nonhóntsas ne tsitʼkarahkwí꞉nekens nokwá꞉ti ne Jericho ó꞉ni ne Jordan nó꞉nen thóh shénreskwe ne iothonhontsakwaríhsons nón꞉we ne Moab.

³³ Ók ki ne Mahís iáh thahóthen teshakahontsá꞉wi ne rahotitióhkwas ne Levi. Washakohró꞉ri ne rahonawenhkón꞉we í꞉ken tsi ne enhatiiéna tsi nithonwá꞉wis ne Roiá꞉ner Sakoní꞉io ne Israerʼró꞉nonhke.