Joshua 11 - Ohiatonhseratokénti

Joshua Washakosén꞉ni Ne Ronhtinonhtí꞉ios Nothorè꞉ke Nón꞉we

¹ Nó꞉nen satewateriwaréni ne Israerʼró꞉nons ronatkwehiónkwen iahónwe ne ronhnonhtí꞉ioke Jabin né꞉ne Hazor nón꞉we, iahoteriwaniénthe ne ronhnonhtí꞉io Jobab né꞉ne Madon nón꞉we, ó꞉ni ne rontinonhtí꞉ios ne Shimron ó꞉ni ne Achshaph,

² tánon ne ronhtinonhtí꞉ios ne tsi iononhtharón꞉nions kanakerahseraké꞉rons ne othorè꞉ke nokwahtíson, nahonráhkwakons ne Jordan nentiè꞉ne nokwá꞉ti ne tsi kaniátaro ne Galilee, ne tsi iohnonhthaientàhons, ó꞉ni ne atsakthónties ákta ne Dor.

³ Tánon ó꞉ni iashakoteriwaniéten ne Canaanites né꞉ne tetsarónhkwen nokwá꞉ti ne Jordan, ó꞉ni ne Amorʼró꞉nons, ne Hitró꞉nons, ne Perizró꞉nons, ó꞉ni ne Jebusites ne tsi ionhnontharón꞉nions kanakerahseraké꞉rons, ó꞉ni ne Hivró꞉nons né꞉ne tsi iononhthaienthàhon ratinákere ne tsi ionhnónte Hermon né꞉ne tsi wathonwenhtsá꞉ien ne Mizpah.

⁴ Wahón꞉newe ratikwé꞉kon shakothihiaʼtenhá꞉wi ne rahononhkweʼtashón꞉as ronhterí꞉ios—né꞉ne ronhterí꞉ios thonihonatióhkwas tsi nikonhtekatsinetharothà꞉rons natsáktha. Tánon ó꞉ni wé꞉so rotináskwaiens ne iakoshá꞉tens ó꞉ni rotiserethakátes notsónhkwas.

⁵ Ratikwé꞉kon kí꞉ken ronhtinonhtí꞉ios iathonnitioʼkwáieste tánon skátke tsi tahón꞉ne tánon wahonthatoserothón꞉nion ákta ne tsi kanawáhere ne Merom ne nahonterí꞉io NIsraerʼró꞉nons.

⁶ Ne Roiá꞉ner wahawénhase ne Joshua, “Kwáh tó꞉sa sehtshà꞉nik. Thóh ki nenkaháwike nenhiórenhne kwáh ratikwé꞉kon enkhenonhwarià꞉konhke né꞉ne Israerʼró꞉nons rahotirihwà꞉ke. Ensehsinakaré꞉waʼte ne rahotitshenenhó꞉kons koshá꞉tens tánon satsáhat ne rahotíseres notsónhkwas.”

⁷ Káti ne Joshua tánon ne rahonkweʼtashón꞉as ronhterí꞉ios iashakonatiaʼtón꞉ti tsi nonhtahonwanathonhnékten né꞉ne tsit kahionhatátie ne Merom nón꞉we.

⁸ Ne Roiá꞉ner thasaká꞉wen natesehniéntshera Nisraerʼró꞉nons tsi wahonwatishén꞉ni ne tehontaʼtsons; Nisraerʼró꞉nons iahonwanatiaʼtón꞉ti tánon sahonwatisehréson tsi nió꞉re ne othorè꞉ke nokwá꞉ti ne Misrephoth Maim tánon ne Sidon, tánon tsi nió꞉re ne nà꞉kon nokwá꞉ti nahonráhkwakon ne Mizpah. Nateriiósera iahontkónhthakwe tsi nió꞉re ne iáh ónhka tesrónhnhekwe ne tehontaʼtsons.

⁹ Ne Joshua thóh nashakoié꞉raʼse tsi ki nihotró꞉ri ne Roiá꞉ner: washakokarewathánion ne raotitshenenhó꞉kons koshá꞉tens tánon wahontsáhathe ne rahotisereʼshón꞉as otsónhkwas.

¹⁰ Ne sonhtakahá꞉wi ne kanatowanénhke ne Hazor ó꞉ni nahonhnontiiótshera thóh thiniarohtharón꞉ne akwé꞉kon nó꞉ia naktéson nón꞉we tkanonhtiiotsheraké꞉ronskwe ne tsi kanakerahserá꞉iens. Káti ne sonhteriioserénthane, ne Joshua tánon ne rahonkweʼtashón꞉as iahón꞉ne tánon iakonwatiaʼtón꞉ti ne kanatowanénhke ne Hazor. Wahatiié꞉na ne kanatowá꞉nen, wahonwanonhwarià꞉kon nahonhnonhtiiótshera,

¹¹ kwáh onhkweʼtakwé꞉kon ne nón꞉we washakotinonhwarià꞉kon; tánon ne kanatowanénhke wahontenonhkwatekthánion.

¹² Ne Joshua akwé꞉kon wahaié꞉na ki kanatowá꞉nens ó꞉ni nahonhnonhtiiótsheras, onhkweʼtakwé꞉kon shakotinonhwarià꞉kons, kwáh ki tsi ní꞉ioht ne Mahís tsi rotró꞉ri, né꞉ne Roiá꞉ner raonhá꞉tshera.

¹³ Ethosà꞉ne, ne Israerʼró꞉nons iáh nénhne tehonatenonhkwatékton ne kanatowá꞉nens ne thóh nón꞉we nikanatonhnià꞉ton ne ohtonwakéson, nek khók ne Hazor wahontenonhkwatekthánion, né꞉ne Joshua rotenonhkwatékton.

¹⁴ Nonhkweshón꞉ʼas Nisraerʼró꞉nonke akwé꞉kon iahatíhawe ne kanorón꞉sons ó꞉ni iashakotihiaʼténhawe ne konhtitshé꞉nens ne kí꞉ken ne tsi kanatowá꞉nens nón꞉we nonhtahatihá꞉sehron tánon iathontatià꞉tiste wahontié꞉nawatste. Ók kwáh ki onhkweʼtakwé꞉kon washakotinonhwarià꞉kon; iáh ónhka tsiatetsiothaténron nahiakónhneke.

¹⁵ Ne Roiá꞉ner thotká꞉wen ne rahoriwataʼtsheras raonhà꞉ke ne raonhátshera Mahís, Ne Mahís Joshua nénhne teʼthó꞉wi, tánon ne Joshua wahatewénhnaraʼkwe. Kwáh akwé꞉kon é꞉tho naháiere tsi nihorihónte ne Roiá꞉ner ne Mahís.

Ne Kanakeráhsera Ne Joshua Rotienawáston

¹⁶ Ne Joshua ohontsakwé꞉kon wahatié꞉nawatste—ne tsi ionhnonhtharónhnions kanakerahseraké꞉ron ó꞉ni ne tsi iehionhnonhthaienthàhons, tetsáron nothorè꞉ke ó꞉ni nentiè꞉ne nokwahtísons, atenathakwé꞉kon ne Goshen ó꞉ni ne ionakerasehrátens ne entieʼné꞉son thóh í꞉kare, ó꞉ni nahonráhkwakons ne Jordan.

^17-18 Ne tsi kanakerahserá꞉ien thóh tsioténtion ne tsi Ionónhte ne Halak ne nenhtiè꞉ne ákta ne Edom, tsi nió꞉re ne Baalgad ne othorè꞉ke nokwá꞉ti, nahonráhkwakon ne Lebanon ne nenhtiè꞉ne nokwá꞉ti ne tsi Ionónhte ne Hermon. Ne Joshua né꞉ne karí꞉wes ronaterí꞉iokwe ne ronhnontí꞉io ne tsi kanakerahserá꞉ien, ók ratikwé꞉kon washakoié꞉na tánon washakononwarià꞉kon.

¹⁹ Skaná꞉ta khók skén꞉non wahonhnón꞉ni nonhkweshón꞉as Nisraerʼró꞉nonke né꞉ne Gibeon, né꞉ne thóh nón꞉we ne Hivró꞉nons nihatinákereʼkwe. Ratikwé꞉kon ne ronátiaʼkes ronhwatiié꞉nen ne tsi waterí꞉io.

²⁰ Ne Roiá꞉ner iasakoʼnikonhrakónhthakwe nahonterí꞉io Nisraerʼró꞉nons, ne káti nahonwatiré꞉waʼthe né꞉ne kwáh tokén꞉en ahonwatikarón꞉ni tánon ratikwé꞉kon enhonwatinonhwarià꞉kon né꞉ne iáh othé꞉nen teká꞉ien nataniténron. Thóh ki ní꞉ioht ne Roiá꞉ner tsi rohró꞉ri ne Mahís.

²¹ Et nikahá꞉wi ne Joshua iahá꞉re tánon washakothón꞉te ne ratikowá꞉nens ne ronhwatinaʼthónkwah ne Anakim né꞉ne ronón꞉ha thóh nón꞉we nihatinákereʼkwe ne tsi iononhtharónhnion kanakerahseraké꞉rons—né꞉ne Hebron, Debir, Anab, tánon akwé꞉kon ne tsi iononhtharónhnions kanakerahseraké꞉rons ne Judah ó꞉ni ne Israerake. Ne Joshua kwáh washakothónthe ó꞉ni ne raotinatowá꞉nens.

²² Iáh ne saiáta tsiatesothaténron ne Anakim ne tsi ionhontsá꞉ien ne Israerʼró꞉nonhke; tó꞉khara khók niháti, ethosà꞉ne, thóh nón꞉we iatonathátere né꞉ne Gaza, Gath, ó꞉ni ne Ashdod.

²³ Ne Joshua kwáh ohontsakwé꞉kon wahatié꞉nawatste, tsi ki nihoró꞉ri ne Roiá꞉ner ne Mahís. Ne Joshua Israerʼró꞉nons thasaká꞉wen nahonawenhkónhweke tánon tenkahiakhónhnionke, énska ne sohthitioiókwah enhatiienà꞉seron. Káti nonhkweshón꞉as wahonorihsénhthane tsi waterí꞉io.