Joshua 10 - Ohiatonhseratokénti

Nisraerʼró꞉nons Wahonwatisén꞉ni Ne Amorʼró꞉nons

¹ Adonizedek, né꞉ne ronhnonhtí꞉io ne Jerusalem, waharihwà꞉ronhke né꞉tho Joshua tsi roienáhon ó꞉ni kwáh í꞉ken tsi rorihwathónton ne Ai tánon wahaténhnane nahonwanonhwarià꞉kon ne rahotinonhtí꞉io, kwáh ki tsi nishakoié꞉raʼse ne Jericho tánon ne rahotinonhtihiótshera. Wahariwà꞉ronhke ó꞉ni ne Gibeonró꞉nons tsi ronatsianerenhserón꞉ni ne skén꞉non í꞉ken ne Israerʼró꞉nons tánon skátke ratinákere.

² Nó꞉nen nonhkweshón꞉as ne Jerusalem wahatirihwà꞉ronke ne Gibeonró꞉nons tsi skén꞉non ronónhni ne Israerʼró꞉nons, kwáh í꞉ken tsi wahonateronhiénhten. Tiorì꞉wa ne Gibeon tsi sénha ne kanatowá꞉nen tsi ní꞉ioht ne Ai, tánon kwáh é꞉tho nikanatowá꞉nen tsi ki ní꞉ioht ne oiásons ne kanatowá꞉nens né꞉ne rotkoráston ne ronhnonhtí꞉io. Sénha tsi ní꞉ioht, ne ahonkweʼtashón꞉as ne ronhnónkwe kwáh í꞉ken tsi ronhterihioseraweiénhons.

³ Káti ne Adonizedek ken ní꞉ioht tsi iahotirihwaniénhten ne Ronhnontí꞉io Hoham né꞉ne Hebron nón꞉we, ó꞉ni ne Ronhnonhtí꞉io Piram né꞉ne Jarmuth nón꞉we, ne ronhnonhtí꞉io Japhia né꞉ne Lachish nón꞉we, tánon ne ronhnonhtí꞉io Debir né꞉ne Eglon nón꞉we:

⁴ “Káts tánon takshnié꞉non ne iakhehiatiaʼtón꞉ti ne Gibeon, tiorì꞉wa nahonkweʼtashón꞉as tsi skén꞉non ronónhni ne Joshua tánon ne Israerʼró꞉nons.”

⁵ Kí꞉ken NE Amorʼró꞉nons ne wísk nihotinonhtihiotsherá꞉kes, ne ronhnonhtí꞉io ne Jerusalem, Hebron, Jarmuth, Lachish, ó꞉ni ne Eglon, iathonnitsiokwáiesthe, watkonwawá꞉nake ne Gibeon, tánon iakonhwatiaʼtón꞉ti.

⁶ Ne ronhnónkwe ne Gibeon iahonwaterihwaniéten ne Joshua tsi thóh tená꞉taien ne Gilgal: “To꞉sa takwahtewénhtet, Shé꞉shion! Ó꞉nenk táse tánon takwaié꞉nawas! Saskwaniákenk! Ratikwé꞉kon ne Amorʼró꞉nons ahonnonhtihió꞉tsheras ne tsi ionhnonhthaʼrón꞉nions kanakerahserakérons iathonhniʼtiokwáiesthe tánon tahionkihiatiaʼtón꞉ti!”

⁷ Káti ne Joshua tánon ratikwé꞉kon ne rahonkweʼtashón꞉as ne ronhterí꞉ios, thóh ratihiátare ne kwáh ronhteriioseraweiénhons, tahonténhti ne Gilgal.

⁸ Ne Roiá꞉ner wahoró꞉ri ne Joshua, “Tó꞉sa seʼtshá꞉nik. Ó꞉nenk thonká꞉wi natesenhniétshera. Iáh ne sahiáta tahakwé꞉ni nahonthahiatiaʼtónti.”

⁹ Ahsonhtakwé꞉kon ne Joshua tánon ne rahonkweʼtashón꞉as ronhterí꞉ios Gilgal tahonténhti rotinenhraseronhnihátie Gibeon niahónhne, tánon tahonwanathonnékten tsi wahonwatinenhrénhten ne Amorʼró꞉nons.

¹⁰ Ne Roiá꞉ner wasakahónhnien ne Amorʼró꞉nons nahonateronhniénten tsi nashakotí꞉ken ne Israerʼró꞉nons ronhterí꞉ios. Ne Israerʼró꞉nons wahonwanawenhthóseron ne Gibeon nón꞉we tánon sahonwananonhtatsnenhthákwen ne tsi iehiotohétston ne Beth Horon, iehonwanatiaʼtónhties tsi nió꞉re ne entiè꞉ne nokwá꞉ti ne Azekah ó꞉ni ne Makkedah.

¹¹ Tsi nikarì꞉wes ne Amorʼró꞉nons rathitátke sohnanonhtatsnentonhátie ne iohthohétston tsi rathì꞉teron ne Israerʼró꞉nons ronhterí꞉ios, ne Roiá꞉ner kowá꞉nens waronhniá꞉nion nahiowí꞉sonhti nahothí꞉ienthe kwáh tsi nió꞉re ne Azekah. Sénha ne wé꞉so wahakório tsi nahowí꞉sonhti tsi ní꞉ioht ne Israerʼró꞉nons ronterí꞉ios.

¹² Ne tewenhniserá꞉theʼkwe ne Roiá꞉ner sontashaká꞉wen ne ronhnónkwe Israerʼró꞉nons natesenhnié꞉tshera tsi nòkwah ne Amorʼró꞉nons, ne Joshua wahowenhnarà꞉ne ne Roiá꞉ner. Rahothihén꞉ton Nisraerʼró꞉nons wahèn꞉ron, “Entieʼkhené꞉kha karáhkwa, téstann è꞉neken ne Gibeon nón꞉we; Ahsonhtenhné꞉kha karáhkwa, téstann è꞉꞉neken ne Aijalon ahonráhkwakon.”

¹³ Ne entieʼkhené꞉kha karáhkwa iáh tetsiothorianéron tánon ó꞉ni nashonthenhné꞉kha karáhkwa tsi nió꞉re nonhkweshón꞉a wahonwatisén꞉ni ne tehontatʼtsons. Thóh nón꞉we kí꞉ken nikahiá꞉ton né꞉ne Kaiatonhserákon ne Jashar. Nenhtieʼkhené꞉kha karáhkwa asénhnon ne tsi karonhiá꞉te nón꞉we natká꞉thaʼne tánon iáh tsiatehiotsénhtho nenhniserakwé꞉kon.

¹⁴ Iáh nonhwénton ne tiotierénhton, tánon iáh ó꞉ni shé꞉kon nón꞉wa, ne nahonnhiseroténhake, nó꞉nen ne Roiá꞉ner wahowénhnaraʼkwe ne rónhkwe. Ne Roiá꞉ner Israerʼró꞉nons nòkwah taharihwárahkwe tsi wasakoterí꞉iose!

¹⁵ Sonhtó꞉hetste kí꞉ken, ne Joshua ó꞉ni ne rahotióhkwa ronhterí꞉ios tsi thonahná꞉taien ne Gilgal nionhsahón꞉ne.

Joshua Washakoié꞉na Wísk Niháti Amorʼró꞉nons Ronhtinonhtí꞉ios

¹⁶ Ne wísk niháti Amorʼró꞉nons ronhtinonhtí꞉ios, ethosà꞉ne, shahatiniá꞉kenhne tánon tsit tiostenhrakà꞉ronthe ne Makkedah iehonathaséhton.

¹⁷ Ónhkak iahonwatihiaʼtatshénri, tánon Joshua wahonwaró꞉ri tsi nón꞉we thóh nathaséhton.

¹⁸ Wahèn꞉ron, “Sewanenhiakarathéniat ne kanenhiowá꞉nen tánon ohénton ne tsi iehionthawehiaʼthákwa ne iostenhrahkarónte sewá꞉ien tánon thóh ieʼtsí꞉teron ne ratinónhne,

¹⁹ ók tó꞉sa ní꞉se thóh sewathatì꞉teron. Iaʼsehwakóntak ieʼtsiseréson ne tesewataʼtsons tánon thaietsiswathéti tsi iahetsihiatiaʼtón꞉ti; tó꞉sa ieʼtsirí꞉hon ne rahotinatá꞉kon niahonsahónhne! Ne Roiá꞉ner Sewaní꞉io thetsisewá꞉wi natesenhniétsera tsi nòkwah ne ronónha.”

²⁰ Joshua tánon ne ronhnónhkwe ne Israerʼró꞉nonke wasakonawénhto, ethosà꞉ne ótiaʼkes wahonaterihwathéntiaʼse wahatiʼtshén꞉ri nahontekwáhsen atenhèn꞉rakon ne tsi tekensthenrothákwen ne rahothináthakon tánon iáh ki tehonwatinonhwarià꞉kon.

²¹ Ethò꞉ne ratikwé꞉kon ne Joshua rahonkweʼtashón꞉as skén꞉nonk thonsahón꞉newe ne rahonhà꞉ke ne tsi ronaná꞉thaien ne Makkedah nón꞉we. Iáh ne saiáta ne tsi ionhwentsá꞉ien tehawé꞉ron shé꞉kon nek khók ne ashakorihwakà꞉tatshe ne Israerʼró꞉nons.

²² Ethò꞉ne ne Joshua wahèn꞉ron, “shasewanonhthónko ne tsi iehionthawehiaʼthákwa ne iostenhrakà꞉ronhte tánon taietsihiaʼténhaf thí꞉ken wísk niháti ronhtinonhtí꞉ios nakonhà꞉ke.”

²³ Káti ne iostʼtenrakà꞉ronhte sonhtenonhthónko, tánon ne ronhnonhtí꞉io ne Jerusalem, ne Hebron, Jarmuth, Lachish, tánon ne Eglon tahonwatihiaʼtí꞉nekenhwe

²⁴ tánon tsítres ne Joshua niahonwatihiaʼténhawe. Joshua ethò꞉ne ratikwé꞉kon ne ronhnónhkwe ne Israerʼró꞉nonke iashakó꞉nonhke tánon washakò꞉nahne ne ronaterihóntons ne raónha teshakohiaʼténha nahonthahón꞉ne tánon rathiniaráhkes ne ronhtinonhtí꞉ios tehonrashì꞉tharen. Thóh ki nahatí꞉iere.

²⁵ Ethò꞉ne ne Joshua washakawénhase ne rahonkweʼtashón꞉as ne ronaterihóntons, “Tó꞉sa sewaʼtshà꞉nik tó꞉ka ó꞉ni nahontesewaʼnikónrenhne. Tasewaʼnikonhrakonhthaʼkwénhak ó꞉ni sewaʼnikonhranirónhak tiorì꞉wa tsi thóh kí꞉ken nenshakoié꞉raʼse ne Roiá꞉ner ratikwé꞉kon ne tesewataʼtsons.”

²⁶ Ethò꞉ne ne Joshua washakononhwariaʼkónhnion ne ronhtinonhtí꞉ios tánon wísk nikarónhthakes tsi washakohiaʼtí꞉haren, thóh nón꞉we nihiorenhthónhakwe ne rahothiierónhtas tsi nió꞉re iahoʼkárawe.

²⁷ Ne shiaʼkarákwenhne Joshua wahaténhnaʼne, tánon ne rahotiieronhthaʼshón꞉as shahatinihionthakwenháton tánon é꞉tho nón꞉we skátne hionsahonatiéseron ne tsi tiostenrakà꞉ronhte tsi nón꞉we iehonathaséhtonhne. Kanenhiowá꞉nen ohénton wahatí꞉ien ne tsi iehionthawehiaʼthákwa ne iostenrakà꞉ronhte, tánon shé꞉kon nón꞉wa thóh tkanénhianen.

Ne Joshua Sénha Shé꞉kon Sahaienásehron Ne Amorʼró꞉nons Rahotinakeráhseras

²⁸ Ne Joshua iashakotiaʼtónti tánon washakoié꞉na ne Makkedah ó꞉ni ne ronhwanonhtí꞉io ne wenhniserá꞉teʼkwe. Kwáh onhkweʼtakwé꞉kon ne tsi kanatowanénhke washakononhwariaʼkónhnion; iáh ónhka tiathetiothaténhron nahiakónhneke. Thóh nahoié꞉raʼse ne ronhnontí꞉io ne Makkedah tsi ni nihoié꞉raʼse ne ronhnonhtí꞉io ne Jericho.

²⁹ Ne sonhteweienénhthaʼne, Joshua tánon ne rahonkweʼtashón꞉as ronhterí꞉ios hionsahonhténti ne Makkedah tánon Libnah niahón꞉ne iashakotiaʼtón꞉ti nónhne.

³⁰ Ne Roiá꞉ner thashaká꞉wen nónhne natesenhniéntshera Nisraerʼró꞉nons kí꞉ken kanatowanénhke ó꞉ni ne nahonhnonhtihió꞉tshera. Iáh ónhka tiatehiothaténron, ók kwáh niatehionkwè꞉thake tsi wahonwatinonhwariaʼkónhnion. Thóh nahonwaié꞉raʼse ne ronhnonhtí꞉io tsi ki nihonwaié꞉raʼse ne ronhnontí꞉io ne Jericho.

³¹ Ne sonhteweienéntaʼne, Joshua tánon ne rahonkweʼtashón꞉as ronhterí꞉ios hionsahonhténti ne Libnah tánon Lachish niahón꞉ne, watkonhwawáhnake tánon iakonhwatiaʼtón꞉ti.

³² Ne Roiá꞉ner tasakáwenh ne atesenhniétshera ne Israerʼró꞉nons tsi nòkwah ne Lachish né꞉ne tewenhniserakéhaton ne sihonaterí꞉io. Kwáh ki tsi nihothiié꞉ren ne Libnah nón꞉we, iáh ónhka teshakotiniakénton, ók onhkweʼtakwé꞉kon washakotinonhwariaʼkónhnion ne kanatowanénhke.

³³ Ne ronhnonhtí꞉io ne Horam né꞉ne Gezer nón꞉we thá꞉re nasakosnié꞉non ne Lachish, ók Joshua wahosénhni ó꞉ni ne rahonkweʼtashón꞉as ronhterí꞉ios tánon iáh ónhka tsi niháti nahonsahonhnónhnheke.

³⁴ Nó꞉ia, Joshua tánon ne rahonkweʼtashón꞉as ronhterí꞉ios hionsahonhtén꞉ti ne Lachish Eglon nionhsahón꞉ne, watkonhwawá꞉nake tánon iakonhwatiaʼtónhti.

³⁵ Ne sahenhní꞉sera wahatiié꞉na tánon kwáh onhkweʼtakwé꞉kon wasakotinonhwariaʼkónhnion, kwáh ki tsi nahatí꞉iere ne Lachish nón꞉we.

³⁶ Ne sonhteweienénhtaʼne, Ne Joshua ó꞉ni ne rahonkweʼtashón꞉as ronhterí꞉ios Eglon ionsahonhténti tánon iahatinonhthà꞉rane ne Hebron, tánon iakonhwatiaʼtónhti

³⁷ tánon wahatiié꞉na. Wahonwanonhwarià꞉kon ne ronhnontí꞉io ó꞉ni nakorénhson ne tsi kanatowanénhke ó꞉ni naʼthatiesónhas kanathatakérons. Ne Joshua waharéwathe ne kanatowanénhke kwáh wahanatèn꞉tho, kwáh ki tsi nihoié꞉ren ne Eglon nón꞉we. Iáh ónhka tshiaʼtetiothaténron nahiakónhnheke.

³⁸ Ethò꞉ne ne Joshua ó꞉ni ne rahonkweʼtashón꞉as ronhterí꞉ios shahónkhete Debir niahón꞉ne tánon iakonwatiaʼtón꞉ti.

³⁹ Wahaié꞉na, ó꞉ni nahonhnonhtihiótshera tánon naktatieʼshón꞉as kanatakérons. Kwáh ratikwé꞉kon ne nón꞉we washakotinonhwariaʼkónhnion. Ne Joshua thóh nahaiérase ne Debir ó꞉ni nahonhnontiió꞉tshera tsi ki nishakoié꞉raʼse ne Hebron ó꞉ni ne Libnah tánon nahotinonhtiiótsheras.

⁴⁰ Ne Joshua washakosenhniónko nonhontsakwé꞉kon. Wahosénhni ne ronhnonhtí꞉io ne tsi iononhténion kanakerahserá꞉ien, ne tsitkarahkwí꞉nekens nokwá꞉ti iononhtakarenhrénions, tánon ne tsi iaʼtewatsénhtos iononhthaientáserons, kwáh ó꞉ni tsi niká꞉iens ne ionakeraserà꞉iens ne entieʼné꞉sons nokwahtí꞉son. Iáh ónhka tesakohiaʼthanonstá꞉ton; kwáh onkweʼtakwé꞉kon wahontatenonhwariaʼkónhnion. Thóh ki ní꞉ioht ne Roiá꞉ner Raní꞉io ne Israerʼró꞉nonke tsi rotenhnàhon.

⁴¹ Ne Joshua tsi wahatoriáneron tsi tahaténhti ne Kadesh Barnea nón꞉we né꞉ne tsi iaʼtewatshéntos nokwá꞉ti ne Gaza né꞉ne kaniataraktónhtie, eʼthí꞉kare tsi niwatenáskwa ne Goshen, tánon tsi nió꞉re ne othrè꞉ke nokwá꞉ti ne Gibeon.

⁴² Ne Joshua washakoshén꞉ni ratikwé꞉kon ne ronhtinonhtí꞉ios ó꞉ni ne rahotinakeráseras né꞉ne énskak khók iahontarátsthe tiorì꞉wa ne Roiá꞉ner, Israerʼró꞉non Shá꞉koní꞉io, raónha washakoterí꞉iose Nisraerʼró꞉nons.

⁴³ Sonhteweienénhthaʼne kí꞉ken, ne Joshua ó꞉ni ne rahonkweʼtashón꞉ʼas ronhterí꞉ios tsi thonatená꞉taien ne Gilgal hionshahón꞉ne.