Joshua 1 - Ohiatonhseratokénti

Ne Rawenni꞉io Wahó꞉nhane Ne Joshua Ne Iashakoʼsénhni Ne Canaan

¹ Nó꞉nen sihawenhé꞉ion ne Roiá꞉ner raonátshera Mahís, ne Roiá꞉ner wahotháhraʼse ne Mahís roié꞉nawaʼse, Joshua iaiénha ne Nun.

² Wahèn꞉ron, “Akhenhá꞉tsera Mahís rawenhé꞉ion. Ó꞉nen ki shathateweienénhtan, í꞉se tánon onkweʼtakwé꞉kon ne Israerʼró꞉nonke, tánon ietesewahiáiak ne Jordan Kaniataratátie tsi tiohontsá꞉ien niahá꞉sewe né꞉tho tkwawì꞉re.

³ Tsi ki nihiró꞉ri ne Mahís, tkhonhiáwi ní꞉se tánon ratikwé꞉kon nakonhkweʼtashón꞉as kwáh ohontsakwé꞉kon tsi thóh niensewanenhrahsherón꞉ni.

⁴ Ne tsi sewateristatátie iénwahwe ne tsi tsotáshawe ne iahonwentsathènhken né꞉ne entiè꞉ne nokwá꞉ti ne tsi ionhnontaʼrón꞉nions ne Lebanon né꞉ne othorè꞉ke nón꞉we; thóh entewatáshawen ne Kaniatarohwanénhke ne Euphrates né꞉ne tsitkaraʼkwí꞉nekens nón꞉we, iatenhiótkaʼwe tsi kanakerahserá꞉ien ne Hitró꞉non, thóh niénhsewe né꞉ne Mediterranean Kaniatarakeʼkó꞉wa né꞉ne tsi iaʼtewatshénthos nón꞉we.

⁵ Joshua, iáh ónhka thaiekwé꞉ni naieshashén꞉ni kwáh tsi nikarì꞉wes ensónhnheke. Kwáh Í꞉i enteʼnikwekónhake tsi ki nihiothónhne ne Mahís. Kwáh tió꞉konte tsi enteʼnikonhkwéhake; Kwáh iáh nonhwénton takonhiatewenhthè꞉te.

⁶ Thashaʼnikonhrakontaʼkwénhak tánon shaʼnikonhranirónhak, asè꞉ken í꞉se enshehéntenhse kí꞉ken onhkweshón꞉as tsi ienhontiaʼtakwehní꞉ioste kí꞉ken ohóntsa ne kehiararatstén꞉ni ne shakotisoʼthonkonhkén꞉en.

⁷ Kwáh ne khók ne tashaʼnikonrakonhthaʼkwénhak, ó꞉ni shaʼnikonhranirónhak; tánon orihwí꞉io sónhni tsi kwáh orihwakwé꞉kon enshatewénhnaraʼkwe ne kaianerénhsera né꞉tho akenhátshera Mahís thiá꞉wi. Kwáh tó꞉sa thé꞉nen ne kák tsi ní꞉kon ne iáh karíhwa thasonhnià꞉ne tánon kwáh enshaterihwaʼténtiaʼse ne tsik nón꞉we nienhénse.

⁸ Iorihwiióhak né꞉tho kahiatónhsera ne kaianerénhsera tsi tió꞉konte enwatewenhnanót꞉thake nenhshaterén꞉naien. Shatéweiest tsi niwenhniseréhsons ó꞉ni noʼkarasnéha, tánon orihwí꞉io sónhni tsi enshatewénhnaraʼkwe akwé꞉kon tsi nikahiatónhnion. Ethò꞉ne ki kwáh enshahianerásten tánon enshaterihwaténtiaʼse.

⁹ Iáh kén tekonhnáʼon níse? Naʼseshástsʼteke tanon naʼesanikonrashsátsʼteke; tósa sateronhnísek, khéhs nasanikonrókʼten, asèken ne Roiá꞉ner sani:io tsi ensenikwekónhake ne kwaʼtsikʼnónwe nienhénse.”

Joshua Washakóhnaʼne Nonkweshón꞉ʼas Nahonthateweienénhtaʼne

¹⁰ Ethò꞉ne ne Joshua washakóhnaʼne ne ratinenhrakweʼní꞉ios ne

¹¹ toniehónhne tsi ronataʼtoseró꞉tons tánon nashakotiró꞉ri nonhkweshón꞉as, “Sewaweienénhtan ne kákhwas, asè꞉ken shé꞉kon asenhnónhta nió꞉re ó꞉nen iaʼtesewahiáiake ne Jordan Kaniataratátie niahisewathatiaʼtakwhní꞉ioste ne ohóntsa né꞉tho Roiá꞉ner Sewaní꞉io thetsisewawì꞉re.”

¹² Ne Joshua washakawénhase ne tsi ratiʼtá꞉raien ne Reuben ó꞉ni ne Gad tánon ne shatehotitioʼkwí꞉hen ne Manasseh,

¹³ “Sewehiáreken tsi ní꞉ioht ne Roiá꞉ner raonátshera Mahís tsi sewahró꞉ri né꞉tho Roiá꞉ner Sewaní꞉io tsi entsisewenhóntson kí꞉ken iohontsá꞉ien ne tsitkarahkwí꞉nekens nokwá꞉ti ne Jordan né꞉ne thóh nón꞉we nahisewenhterón꞉take.

¹⁴ Ne sewaniáʼkhons, ietsiʼienhokón꞉as, ó꞉ni ne sewaʼtshenenhó꞉kons kwáh ne kén꞉en enkonhtiʼterónhtake, ók ne tsonkweʼtashón꞉as ne ronhterí꞉ios, ronathateweienhnenhtà꞉on nahonterí꞉io, ienhatihénte ne tahatihiá꞉iake ohén꞉ton ne ronatià꞉kes Nisraerʼró꞉nons ne nahónton nahonwatiié꞉nawaʼse

¹⁵ tsi nió꞉re nenhatihiathakweʼní꞉ioke nonhóntsa ne tsi iaʼtewatshénhtos nokwá꞉ti ne Jordan né꞉tho Roiá꞉ner Onhkwaní꞉io teshakowì꞉re. Nó꞉nen enteshakó꞉wike ratikwé꞉kon ne rahothitióhkwas ne Israerró꞉nonhke, ethò꞉ne enwá꞉ton thenthí꞉shewe tánon kén꞉en nón꞉we nashewatená꞉taien ní꞉se sonhontsà꞉ke né꞉ne tsitʼkarahkwí꞉nekens nokwá꞉ti ne Jordan, tsi niká꞉ien ne Mahís, ne Roiá꞉ner rahonkwè꞉tha, thetsisehwá꞉wi.”

¹⁶ Wathonwariwaʼsehrákwahse ne Joshua, “Kwáh orihwakwé꞉kon thóh nenhiakwáhiere tsi naskwahró꞉ri tánon kwáh ienhiákwe ne tsi nón꞉we ienskwahtó꞉ri.

¹⁷ Kwáh enkwahwénhnaraʼkwe, kwáh ki tsi nishakwahwenhnaráhkwakwe ne Mahís, tánon aiá꞉wens ne Roiá꞉ner Onhkwaní꞉io ahiseʼnikwekónhake tsi ki ne nihioʼthónhne ne Mahís!

¹⁸ Ónhka ki akénhake naieriʼwí꞉shake ne shashatsténhsera tó꞉ka ó꞉ni iáh thahionhtewenhnaraʼkwáne kák tsi ní꞉kon ne shatenhnáhon kwáh ki enhionhthatenonhwarià꞉kon. Tashaʼnikonhrakontaʼkwénhak tánon shaʼnikonhranirónhak!”