Jonah 3 - Ohiatonhseratokénti

Jonah Wahowén꞉narahkwe Ne Roiá꞉ner

¹ Shé꞉kon énska ionsónteratste ne Roiá꞉ner sahohtáhrhase ne Jonah.

² Wahén꞉ron, “Eʼtho nón꞉we niahá꞉se tsi tkanatowá꞉nen ne Nineveh, iaʼserí꞉waien ne aterihwahnotáhtshera ne kaiaʼtorehtáhtshera tkoniá꞉wi.”

³ Sók kiʼ ne Jonah wahowén꞉narahkwe ne Roiá꞉ner nok Nineveh niahá꞉re, tsi nikanatowá꞉nen áhsen nónta nikarí꞉wes ó꞉nen kanatakwé꞉kon nontá꞉rehte.

⁴ Ne shahenhní꞉sera ne Jonah shiahaná꞉taraʼne, washakohronká꞉ten ne onkweʼshón꞉ʼa, “Kaié꞉ri niwenhniseráhsen niió꞉re ne Nineveh enkarihwahtón꞉ton!”

⁵ Ne onkwehshón꞉ʼa tahonnéhtahkwe ne Rawenni꞉io raoterihwahnotáhtshera. Sók kiʼ iaʼthotirihwaién꞉taʼse kwáh onkwehtakwé꞉kon tsi ahonnentóntiehte, kwáh tsi niaʼteionkwè꞉take, aiakonkweʼtowá꞉nen tóka ó꞉ni kenʼk naiehsén꞉nahske, kà꞉iare enhontsherón꞉niaʼte ne naʼhonne nehste tsi sahontatré꞉wahte.

⁶ Ne Nineveh nón꞉we ronontí꞉io shaharihwá꞉ronke tsi nahoʼténshon ratónnionskwe ne Jonah, tontahá꞉taʼne ne raonitskwahráhne, waharíhsi ne waʼkóhses raotià꞉tawi, kà꞉iare wahatsherón꞉niaʼte, tánon tho tahátien ne waʼkenhrontá꞉kwen.

⁷ Ne Ronontí꞉io iashakoteniéhten ne Ninevehró꞉non Kaianerénhsera: “Kwáh iáh ónhka, iáh shé꞉kon ne kontitshé꞉nen, ne thé꞉nen akón꞉neke tóka niʼ ó꞉ni ne akontihnekí꞉ra kwáh iáh thé꞉nen.

⁸ Kwáh onkweʼtakwé꞉kon tánon ne katshé꞉nenʼs ónenk tsi kà꞉iare eniotí꞉rake. Kwáh kátiʼ onkweʼtakwé꞉kon iakoterihwaién꞉ni akawé꞉riane aontaietáhko naʼionterén꞉naien Raonhà꞉ke ne Rawenni꞉io tánon ó꞉nenk tsi enióntkaʼwe tsi niiakorihwané꞉ren ó꞉ni tsi niiewehiennàksens.

⁹ Tóka seʼ nón꞉wa ne Rawenni꞉io tenshoterihwaté꞉nien; tóka seʼnón꞉wa enhátkaʼwe tsi nihonahkhwén꞉en, tánon iáh thaʼetewén꞉heie!”

¹⁰ Nó꞉nen ne Rawenni꞉io shahatkátho tsi ronatkáwen tsi nihatiweiennàksens, waʼtehshakononhiá꞉niʼke tánon tonsahoterihwaté꞉nien iáh tehshakohrewáhton tsi nithá꞉wen.