Jonah 2 - Ohiatonhseratokénti

Jonah Raoterén꞉naienʼt

¹ Kwáh eʼtho kaià꞉takon ne kéntson, Jonah wahaterén꞉naien raonhá꞉ke ne Roiá꞉ner né ne Rawenni꞉io.

² “Tsi niwakerihwanoronstén꞉ni, Ó Saiá꞉ner, Í꞉se ìaʼkonná꞉ton, tánon ó꞉ni waʼtehskerihwaʼserákwaʼse. Ó꞉nen tho꞉a shiakatá꞉weiaʼte tsi nón꞉we ieién꞉tha ne iakawenhé꞉ion né ne kanòn꞉wakon ne kaniataraʼkehkó꞉wa waʼkeriʼwanón꞉ton ne kaienawaʼséhtshera, tánon wahskewenná꞉ronke.

³ Iaʼstiaʼtón꞉ti tsi nón꞉we teiohnó꞉tes, né ne kwáh kanòn꞉wakon ne kaniataraʼkehkó꞉wa, eʼtho nón꞉we ne ohné꞉ka kwáh tewakahkwatasé꞉ton, tánon kwáh ne kaʼshátsteʼs sá꞉wenk ne iononthowá꞉nenʼs ionontakwarontóntieʼs ontiaʼtakahrhaténiaʼte.

⁴ Eʼthoʼne waʼkí꞉ron, Ó Saiá꞉ner, takwateʼkwáhton ne tsaʼtà꞉kta, oh ní꞉ioht tsi shé꞉kon aonsakatkátho ne Sanonhsatokénhti?

⁵ Iaʼkatenón꞉waien nà꞉kon ne tsi ionontakwarontóntieʼs, tánon ne kenhé꞉ion kwáh í꞉ken tsi àkta í꞉weʼskwe. Ne ohné꞉ka tonkeʼrhó꞉roke, tánon ne onotaʼshón꞉ʼa ontwatá꞉se ne kenontsí꞉ne.

⁶ Kwáh eʼtho nón꞉we iaʼkatenón꞉waien tsi katsinonhiataté꞉nions ne ionontowá꞉nenʼs. Onkwatehnhó꞉tonʼse ne atónhnhets tánon waonʼkehnhó꞉ton ne tsi tiohwentsáien ne kenhé꞉ion. Ók Í꞉se, Ó Saiá꞉ner ne Akení꞉io, thotahstiaʼtatihéntho tsi nateiotskará꞉wen ne kenhé꞉ion ne naonsakónhnheke.

⁷ Nó꞉nen orihwakwé꞉kon shakaʼnikonhrókten, shé꞉kon énskaʼ ionsónteratste Roiá꞉ner ionsahiianonhtónnionhwe. Kwáh wakeriahsanòn꞉waks tsi iaʼkaténniehte ne akaterénnaien ne Iʼsè꞉ke eʼtho nón꞉we ne Sanonhsatokenhtí꞉ke tánon wahskewenná꞉ronke.

⁸ Tsi niiá꞉kon ne kaiaʼtonnihshón꞉ʼa konwahsén꞉naiens ne iáh thé꞉nen tekarihwáhstha ronatswaté꞉nion ne orihwakwé꞉kon ne Rawenni꞉io raotén꞉rat.

⁹ Nok tenkonrihwáhkwaʼse ne atonhnharáhtshera ne sonhá꞉ke. Ne entkónion enkatienʼkwarón꞉niaʼte tsi tenkonnonhwerá꞉ton tánon eʼtho nén꞉tiere tsi niwakahrharátston. Ne kaʼniakénhtshera Roiá꞉ner nón꞉we nitewé꞉tha!”

¹⁰ Eʼthóʼne ne Roiá꞉ner wahrón꞉nien ne kéntson ne taonʼtahóstike ne Jonah ne thiióʼke, nok eʼtho naʼká꞉iere.