Jonah 1 - Ohiatonhseratokénti

Jonah Wahowennón꞉ti Ne Roiá꞉ner

¹ Ne Roiá꞉ner taháon ne aterihwahnotáhtshera ne Jonah né ne Amittai roién꞉ʼa.

² Wahén꞉ron, “Nineveh nón꞉we niahá꞉se tsi tkanatowá꞉nen, tánon iaʼserihoʼwanáhten ne atiaʼtorehtáhtshera sheiatkón꞉ten; tiorí꞉wa tsi kattókas tsi nihonnonkweʼtahétkenʼs.”

³ Nok ne Jonah waʼthátaʼne, aktéʼstsi nokwá꞉ti niahá꞉re ahotéhkwaʼse ne Roiá꞉ner. Tsi tkonhrahrhóstha ne kahonwé꞉ia né ne Joppa nón꞉we niahá꞉re, wahahonwatshén꞉ri tkahónionte ó꞉nen thó꞉ʼa aonthonwanentáhsi né ne Spain niaʼawenonhátie. Wahaká꞉riake tsi tenhaiá꞉iaʼke ne kaniataraʼkehkó꞉wa. Iahatí꞉ta ne kahón꞉wakon skátne ne kahón꞉wakon rotiióʼte ne ahontshiró꞉ten ne Spain niahón꞉ne, ne eʼtho nón꞉we wárehre iáh nenʼné꞉e ne Roiá꞉ner, iáh tho tiarésheke.

⁴ Nok ne Roiá꞉ner iahaténniehte ne kaweraʼshátste tahotiweratá꞉se ne kaniataraʼkehkó꞉wa, tánon tsi naʼtewatenón꞉ianihte waʼtkaweráhkwe kwáh iotteronhtón꞉ne ne ahonathonwaríhshien.

⁵ Ne ratihonweiaʼkehró꞉non kwáh ronateronhienhténni tánon waʼthotihénrehte ne ahonwatiiaʼtakénha, shatiiaʼtáshon tsi ní꞉ioht tsi rotiʼniiohserá꞉ien. Awén꞉ke iahoná꞉ti tsi nahò꞉ten tehotiiahiaʼktonhátiene né ne tóhsa aonsaióksteke ne kahonwé꞉ia. Eʼtho náhe, ne Jonah iehotsnénhton nenʼné꞉e ehiehaiaʼtión꞉ni, kwáh iehotaʼskó꞉wa.

⁶ Ne rahonwakweʼní꞉io iahoiaʼtatshén꞉ri wahoriʼwanóntonhse, “Oh nihsatiérha kwáh séntaʼs? Satkétsko tánon saterén꞉naien raonhá꞉ke ne ní꞉io ehtsheʼné꞉ken ne kaienawaʼséhtshera. Tóka nón꞉wa enhshonkwén꞉tenre tánon enhanónhstate tsi tsiónhnhe.”

⁷ Waʼthontaténhase ne ratihonweiaʼkehró꞉nons, “Hánio tewaʼwahstóhtsi tánon entewarihwahtsén꞉ri ónhka akorí꞉wa tsi naonkwateraʼskwáksenʼne.” Eʼtho káti nahatí꞉iere, tánon Jonah raóʼwahste wahonnó꞉tsi.

⁸ Sók kiʼ wahonwénhase, “Ónenk kiʼ tsi enhskwahró꞉ri! Ónhka kí꞉ken akorí꞉wa? Oh nihsatiéhrha ne kén꞉en? Oh naʼkanakerahseró꞉ten tsi nón꞉we nitisé꞉non? Oh nahsenekwenhsó꞉hten?”

⁹ “Hebrew nikenekwensó꞉ten,” waʼtharihwaʼserá꞉ko ne Jonah. “Ne ní꞉i rihsénnaiens ne Roiá꞉ner ne Rawenni꞉io tsi karonhiá꞉te, tsi nikáien rohsaʼánion ne onwéntsha ó꞉ni ne kaniataraʼkehkó꞉wa.”

¹⁰ Iahatahsónteren ne Jonah washakohró꞉ri tsi roteʼkwenhátieʼs tsi nokwá꞉ti ne Roiá꞉ner. Ne ratihonweiaʼkehró꞉nons wahonateroniénten, nok wahonwénhase, “Tsi niiorihwahtshá꞉ni ne eʼtho naié꞉hiere!”

¹¹ Ó꞉nen sénha takanehrakwahtà꞉ne tsi teioweratá꞉se, sók ki ne ratihonweiaʼkehró꞉non wahonwariʼwanóntonhse, “Oh nakwaié꞉rase ne taká꞉tane tsi teioweratá꞉se?”

¹² Jonah waʼthariʼwaserá꞉ko, “Awénke iaʼtakwaiaʼtón꞉ti, tánon thó꞉ne ki tenskawerí꞉iaʼke. Wakaterién꞉tare tsi í꞉i akerí꞉wa tsi kén꞉en ionkwaié꞉nen ki kawerowá꞉nen.”

¹³ Khérenk nen né꞉e ne ratihonweiaʼkehró꞉non wahonhkwísron ne hiahonhráhrho, rotiká꞉we tsi nihotiʼshatsténhsera. Nok tonhkwisrónne tsi teioweratá꞉se, iáh ó꞉ni sénha kénneka thiehonné꞉tha.

¹⁴ Sók ki iaʼthotihénrehte raonhá꞉ke ne Jonah Raoní꞉io, “Ó Sewenní꞉io, ionkwaterénnaien, ne tóhsa ne kenhéionʼt ahskwahrewátahkwe tsi awèn꞉ke ienshakwaiaʼtón꞉ti kí꞉ken rón꞉kwe! Í꞉se Sewenní꞉io, akwékon eʼtho nisáhson tsi nahawénhseron; kwáh tsi naʼtesatonhontsoní꞉ne.”

¹⁵ Eʼthó꞉ne waʼthonwaiátahkwe ne Jonah nok awén꞉ke iahonwaiaʼtón꞉ti, tánon kwáh óksaʼk tonsakawerí꞉iaʼke.

¹⁶ Né kí꞉ken waʼkakwé꞉ni ne ratihonweiaʼkehró꞉non ó꞉nen sénha wahonwatshá꞉niʼke ne Roiá꞉ner wahontienʼkwarón꞉niaʼte tsi waʼthonwanonhwerá꞉ton ó꞉ni wahonwahrharátsten tsi enhonwaióʼtenhse.

¹⁷ Né ne kwáh Roiá꞉ner waharihwahserón꞉ni ne kentsowá꞉nen iahotiataʼnéhkwane ne Jonah, né káti ne eʼtho kentsowá꞉nen, né ne áhsen niwenhniserá꞉ke tánon áhsen niwahsón꞉take iehotiaʼtahnehkwanónhkwe.