John 4 - Ohiatonhseratokénti

Kaieri-haton natehioteriȣasonterakȣen tsini hoiaton Roiatatokenti San.

¹ SAHOTOKENSE ne Iesos tsi ronton ne Pharisian tsi raonha senha rotiokoȣannhaonhatie, senha oni raonha eso sakohnekȣahesta tsiniiot ne saȣatis.

² Iah sane akȣa rahonha ne Iesos tesakohnekȣahestakȣe nehne raotiokȣa sakotinokȣahestakȣe.

³ Sahatenti ne Judé nonȣe, nok Galile niionsare.

⁴ Samari kati nonkȣati sahatoheststakȣe.

⁵ Iahanatarane Samari-ronon ratinakere Sychar konȣaiasts iah ihnon tehken tsinonȣe ne Jacob nihaonȣentsiaȣi ne roienha Sose.

⁶ Eh oni nonȣe nihotnaȣerotakȣe ne Jacob: ȣathaȣishenheie ne Iesos tsi rathahine, eh ȣahatorishen akta tsi ionaȣerote, onen toka neh nahoten ne iaiakhaton siioȣistahehratie.

⁷ Etho kanekotsienhe tsiothonȣisen Samaritanronon, ȣahenron ne Iesos: taknekanont.

⁸ Aseken ne raotiokȣa kanatakon iehonenonne ronatennatseraninonronne.

⁹ Takenron ne kenhen tsiothonȣisen Samaritanronon: oh neneh niiotieren tsi takeriȣanontonni akonhnekanonte Sitaeronon ȣahi nasiatoten nok nii Samaritanronon? Iah ȣahi naha tatehatitarha ne Sitaeronon tanon ne Samaritan-ronon.

¹⁰ Ȣahenron ne Iesos tsi tontahaȣennaȣeron: Neh nasienterihake ne Niio raotanitenrasera, hatsienterihake oni onka ne ȣaiariȣanontonse atsnekanonte ise aontesatierenton atseriȣanontonni, nok ne raonha aonsaianekanonten ne kanekiio.

¹¹ Tontakenron ne tsiothonȣisen Saianer! iah othenon tesaien nasetsientakȣe tanon ioshonȣes; kah kati nekenh naontesanekenha ne kanekiio?

¹² Senha onteken ise tsiatanoron tsiniiot ne sakȣanikenha Jacob neh sonkȣaȣi ne kenh iohnaȣerote, eh ranekirathakȣe, oni ne sakoienhokonha oni ne raotsenenhokon?

¹³ Tontahaȣennaȣeron ne Iesos, ȣahenron: tsiniiakon enhienekira kehiken iohnaȣerote sekonse entsiakohniatathen.

¹⁴ Nok tanon nenhanekira nenhinekanonte iah nonȣenton tiiahonsahoniatathen, aseken ok nehe nenhinekanonte ienȣatnaȣeronni ne rahonhake ne iah taonsteske tiotkon tanon enhiohnekotake tsi niienhenȣe.

¹⁵ Sakenron ne tsiothonȣisen: Seȣenniio! aseknekanonte neh nikanekoten ne tosa nonȣenton aonsonkehniatathen, tosa oni nonȣenton sekon taontaknekotsienha.

¹⁶ Ȣahenron ne Iesos: ȣas iatsihnonk ne teseniteron, kenhnitre.

¹⁷ Tontakenron ne tsiothonȣisen: iahse teȣakeniakon. Sahenron ne Iesos: tasariȣaierite tsi ȣasiron iah teȣakentakon.

¹⁸ Aseken onen ȣisk nisaniakon, nok ne tetsiseniiashe iah teseniniakon: ne kati ȣaonni taseriȣaierite ki tsi nasiere tsi tasatati.

¹⁹ Nok tontakenron, ne tsiothonȣisen: Seȣenniio! Oriȣiio tsi Satokense.

²⁰ Iakhinihokonkenha Ronȣasennaientakȣakȣe kehiken tsi iohnonte; nok nise saton Jerusalem se nonȣe niioteriȣison naonȣasennaien ne Niio.

²¹ Iesos tontahaȣennaȣeron, ȣahenron: tsi sathonȣisen, kataketak, tsi taȣe nennisera, tsi iah, tsi ok iohnonte iah oni ne Jerusalem tatsiseȣasennaien ne Ronȣaniha.

²² Neh seȣasennaiens tsinahoten nʼiah teseȣaienteri: nok nii, neh nii iakȣasennaiens tsinahoten iakȣaienteri, aseken Sitaerononke entkaientakȣe ne kaiatakennhatsera.

²³ Nok tanon ienkaheȣe onen oni ieiohe noriȣiio onȣe Ronȣasennaiens enhonȣasennaien ne Roniha kanikonrake oni oriȣiio: Ethose oni niiot tsi rariȣanontons ne Roniha tsi ahonȣasennaien.

²⁴ Raonikonroskon ne Niio; eh kati oni neneh niiot ne ronȣasennaiens akȣa onikonroskon tsi Ronȣasennaiens.

²⁵ Tontakenron ne tsiothonȣisen: ȣakaterientare kineneh tsi entre nonkȣe Sesakoskontakohe (Ronȣanatonkȣa Keristos) nekati nonen enhraȣe neh ensonkȣarori oriȣakȣekon.

²⁶ Iesos tontahenron: akȣa ii nonȣa ne kenh teionkehnithare.

²⁷ Onen eh sahonneȣe ne raohtiokȣa, ȣahotinekheren tsi tsiothonȣisen tehotithare; iah ki sane onka tehonȣariȣanontonni, naiaȣenke; nahoten seriȣanontons? oh oni nahoten senitharakȣen tsi tesenithare?

²⁸ Ok hkeh iekatsetaien naotse, kanatakon niionsakatakhe, nok ȣahakororianion nonkȣeokon, ȣatonne.

²⁹ Kasene ehtsiseȣatkensera kenh thenteron ne ronkȣe akȣekon ȣahakrori tsini ȣakieranion. Tokatsenonȣa nehne Keristos.

³⁰ Ȣaheiakenne, nok eh ȣahente tsi thenteron.

³¹ Onen nehne ne raotiokȣa ronȣasteronȣi ronton: Saianer! tesastskaon niha.

³² Tontasakoȣennaȣeron, ȣahenron: iah teseȣaterientare tsini kaȣaroten kekhe.

³³ Ȣathontatsahonnionhase ne raotiokȣa nok ȣahonniron: onka kiok kati naha ȣahi ronȣanonten?

³⁴ Tontahenron ne Iesos: nese nii akatennatsera nahinikonraierite ne takatorion, oni nakierite ne raoiotensera.

³⁵ Iah kenh naha teseȣaton, sekon kaieri niȣennitake onen ienkaheȣe tsini ieienthokȣas? Nok nii kȣarori katon: Seȣatarakestsko, nok seȣakaenhion, onense iohnorarihonhatie, onen oni ieiohe nakaientȣakȣen.

³⁶ Tehonȣariȣaserakȣenni ne raienthokȣas, nok raroroks tsini iotonnison tsi nonkati ne tsiniienhenȣe aionnheke; eh naontaȣe ok sataiatonnharen ne raienthos tsiniiot ne raientȣakȣas.

³⁷ Iontonʼs enʼsʼ oni ȣahi naha: saiatat tahoienthonhatie nok tihaiatate tahoientȣakȣenhatie, akȣa neneh tokenske.

³⁸ Iekȣatorion oniken nise naeseȣaienthokoha tsinonȣe nʼiah othenon teseȣaiotenhon, thihatite thotiiotenhen, nok eh ionseseȣatasaȣen.

³⁹ Kentiokoȣanon neh nonȣe niienakere Samaritan taiaketakȣe ne raonhake. Tsi kariȣanirastskȣe ne tsiothonȣisen tsi ȣatonhakȣe: akȣekon ȣahakrori tsini ȣakieranion.

⁴⁰ Nonen eh sahonneȣe ne Samaritan tsinonȣe nihenteron, ȣahonȣaneken nostonha ahonisko rahotinatakon; teȣenniserake kati nikariȣes ȣahonissko ne rahotinatakon.

⁴¹ Nok senha kentiokoȣanen taiaketakȣe nonen sahonȣaȣennaronke.

⁴² Nok skonȣennihakȣe ne tsiothonȣisen: iah onen ise tesaȣenna tetsiakȣasere: aseken akȣa ii onen sakȣaȣennaronken, nok ionkȣaterientare tsi tokenske nehe ne Keristos sesakoskontakohe nʼonkȣe.

⁴³ Teȣenniserake onakenke sahatenti neh nonȣe Galile niionsare.

⁴⁴ Aseken onen shihotrori ne Iesos tsi raonakeraserakon ok iah tatehonȣarensarons ne Rotokense.

⁴⁵ Oriȣiio tsi tahonȣateȣeienton ne Galileenronon siionsaraȣe ne Galile, aseken rohnatkatoseron tsini hoieranion ne ioriȣanerakȣatenions tsini kariȣes ȣentanorons Jerusalem nonȣe, ehse oni ne rononha iehonneskȣe.

⁴⁶ Sonsahatenti ne Iesos ne Galile nonȣe, Kana niionsare tsinonȣe tethonekatenion nonekanos Otsitsia rahonniaton. Saiatat Rasennoȣanen Capernaiim nonȣe nihanakerekȣe neh kati ne roienha rononȣaktanihakȣe neh nonȣe sikahaȣis.

⁴⁷ Ȣahariȣaronke tsi onen tethotention ne Iesos ne Judé, Galilene niieshaȣenon, ȣahoiatisakha nok ȣahoneken neh iare aonsahotsientana ne roienha trenheions.

⁴⁸ Tahenron ne Iesos: Katiken oni nise entiseȣetakȣe noiah tenhseȣatkatosere ne ioriȣanerakȣat.

⁴⁹ Tontahenron ne Rasennoȣanen: Saianer! eh niha iahase ohenton arenheie ne riienha.

⁵⁰ Ȣahenron ne Iesos! ȣas sasatenti; shoieȣentaon nʼetsienha. Taretakȣe tsi nahoten ȣahenron ne Iesos nok sahatenti.

⁵¹ Nok tsiniiohahes tonsahonterane ne raonnhatsera okon, ronȣaroriane, rontonne: onen shoieȣentaon nʼetsienha.

⁵² Nok ȣahariȣanonton kah sikahaȣis nitsioianerenhon. Nok tahonniron: tetenre neh nahoten tsiatakaton siioȣistahehatie nahentonkȣanoste.

⁵³ Ȣathaiatorete tsi akȣa eh ȣikahaȣis sahenron ne Iesos: shoieȣentaon ne etsienha; taretakȣe nok oni ne raoȣatsire.

⁵⁴ Neh kehiken ne tekenihaton ne teioriȣanerakȣat tsi nahaiere ne Iesos nonen Galile sisro Jude sahtethaȣenon.