John 13 - Ohiatonhseratokénti

Asenh-aton iaȣenre teioteriȣasonterakȣen Oriȣatokenti tsini hoiaton Roiatatokenti San.

¹ ONEN thoa saȣentanoronne ne Shotonnhestston, roterientare ne Iesos tsi onen ieiohe nahonsahatenti tsi ionȣentsiate, Ronineha niiahonsare, tsini sakohnoronkȣakȣe ne raonkȣeta onȣentsiakeronon, ok ki eh niieheiot tsiniiore ieiotokte.

² Nok nonen sahatikȣentane nʼokarassa, onen sihonikonraten nʼotkon ne Sitas-Iskariot Simon roienha, nahotenninon.

³ Nok tsi roterientare ne Iesos tsi akȣekon niiehoiatakȣeniioston ne Roniha, nok tsi Niiohne thoientakon, tsi oni Niiohne niionsahaȣenonhatie.

⁴ Tahanistskȣarako natekȣaratserakta, ȣahatiataȣitasi; ohniataraha ȣahateniionton nok tahatiatannhake,

⁵ Nok akeratne ȣahnnekaren, nok tasakositohare ne raotiokȣa, nok neh tontasakositokeȣatonhatie ne roteniionte.

⁶ Kahre onen iaharaȣe tsi tenstskȣahere ne Simon Tier; tahenron neneh ne Tier: Saianer! enskasitohare kenh nekenhen?

⁷ Tontahoȣennaȣeron ne Iesos, nok ȣahenron; iah nonȣa tesaterientare tsini ȣakierenhatie, onakenke ki ensatokense.

⁸ Tontahenron ne Tier; iah ki nah nonȣenton tiiaskasitohare. Tontahenron ne Iesos: nene iah tenkonhiasitoharehe, iah ki taetenikȣekhene.

⁹ Simon Tier tontahenron; Senha ioianere akȣekon ne kesnonsake oni kenontsine asenohare.

¹⁰ Tontahenron ne Iesos: nonen rotiatohare, neok tetsiotonȣentsiohon naonsaonȣasitohare, nok akȣekon enȣatenohare; onen kati Seȣatiatohare iah ki tanon akȣekon tehken.

¹¹ Aseken roterientare onka rotenninonre; nese ȣaonni ȣahenron: iah ki akȣekon tehken.

¹² Nok nonen sasakositoharesi, sahatseronni nok sahanistskȣaren atekkȣaratserakta nok ȣasakaȣenhase; seȣaterientare kenh nahoten ȣatenientenstakon tsi nakȣaierase?

¹³ Roianer nok Raȣenniio takȣanatonkȣa, akȣa neneh tiseȣariȣaierists: aseken tokenske Ii.

¹⁴ Ne kati kehiken ts Ii ine Roianer, oni ne Raȣenniio tanon Ii ȣakȣasitohare; etho kati oni nise nenseȣaiere enhietsiiasitohare nakoren.

¹⁵ Aseken ȣakȣanatonhase, neh naonseseȣaiere, tsi nakȣaierase.

¹⁶ Oriȣiio akȣa oriȣiio tsi kȣarori, tsi iah senha kannhatsera tehaiatanoron tsiniiot ne raiatakȣeniio, oni ne rariȣenhaȣi tsiniiot ne thotorion.

¹⁷ Toka seȣaterientare neh nikarihotens, enseȣaiatateri neh nenseȣaiere.

¹⁸ Iah ki tanon tiiekȣakȣekta, aseken kheienteri ki nonka kheiatarakȣen; Nok ki tanon iatekakonte tsi enkahnane tsinikaiaton, tsi ȣaton; nehne teiakiatonsts ȣahakatkarhateni.

¹⁹ Tahonenne ok tkȣaroris ohenton eh naiaȣenne; nʼaiaȣens nʼonen ienkaeȣe eh oni nenhiaȣenne aonteseȣetakȣe tsi Ii takatorion ne Rakeniha.

²⁰ Oriȣiio akȣa oriȣiio tsi kȣarori: nonkakiok ienhiiatenniete nok enthonȣakonnienste, enhakkonnienete ki oni nii; nok nenhakkonnienste enhokonnienste ki ne thakatorion.

²¹ Nonen saharihokten ne Iesos, akȣa anio tsiniiot nahonikonranonȣake, nok ok tiiahatrorikoȣa, nok ȣahenron: Oriȣiio, oriȣiio tsi kȣarori, saiatat tsinitsion enhakatenninon.

²² Ȣathontatkathoseron ne raotiokȣa ok tihotinikonrotht thiken onka onte sakohton.

²³ Saiatat tsinihati, nehne ronoronkȣakȣe ne Iesos, akȣa kati rakȣistsake iehakonhen rohtas.

²⁴ Simon Tier iahotkatho tsiniiot nahorori nahariȣanonton, kah nihaiatare ne rohton.

²⁵ Eh kati iahattate tsi rotte ne Iesos, nok ȣahenron: Saianer! onka nekenhen?

²⁶ Tontahenron ne Iesos, neh nenthiion kanataranaȣenton. Nok ȣahanataranaȣente niȣaha Sitas Iskariot tahaon, Simon roienha.

²⁷ Nok nonen siiarennekȣane, onen ȣahotienhase nʼotkonseraksen: Nok ne Iesos ȣahaȣenhase: tesasterihen eh natsier tsinahoten sariȣaien.

²⁸ Iah tanon onka teiohnikonraientaon tsinihati tehonatekkȣaratserannhenne tsi nahoten ȣahenton tsi nahoten ȣahenron.

²⁹ Aseken otiake ȣaonnere, ne kenh tsi Sitas ranatatserenhaȣe, tsi kati niiot nahororike ne Iesos ne Sitas nahaninon tsinahoten teiotonȣentsiohon tsi ȣentanoronsere; ok ne ens nasakotenrate ne iakotent.

³⁰ Akȣa neok siiarennekȣane ne Sitas ne kanatarok oksaok ȣahatenti; onen asonthenne sihken.

³¹ Nok nonen siiehoiakenhon, ȣahenron ne Iesos: Onȣa onen enhasennanoronne nʼOnkȣe Roienha, nok raonhake enhasennanoronne ne Niio.

³² Ne kati tsi raonhake enhasennanoronne ne Niio, raonhake kati oni ne Niio enshosennanoronste; akȣa ok oni iosnore tsi enhosennanoronste.

³³ Kȣaienhokonha, niskariȣesha onen tsi tsiteȣakȣekon. Enskȣaiatisake, nok tsiniȣakieren tsi kherori ne Sitaeronon, tsi iah thiiahonneȣe tsinonȣe ȣake, onen kati oni nise ȣakȣarori.

³⁴ Tsioriȣat noriȣase ȣakȣatenienthase; nehne, taeseȣatatenoronkȣake tsi ki nʼii nikȣanoronkȣa eh nataeseȣatatenoronkȣake.

³⁵ Neh enkaieronniststakȣen tsi ise nakitiokȣa ne tenseȣatatenoronkȣake.

³⁶ Simon Tier tahatati, ȣahenron: Saianer! kah ȣase? tontahenron ne Iesos: Tsinonȣe ȣake, iah taskȣehni nonȣa nasksere; nok tanon niare ohnakenke eh niienhense.

³⁷ Tontahenron ne Tier: Saianer! oh niiotieren tsi iah kenh nonȣa takkȣeni nakonsere? enkateȣentete tsi konnhe nise sariȣake.

³⁸ Tontahenron ne Iesos: ensateȣentete tsi sonnhe nʼii akeriȣake! Oriȣiio akȣa oriȣiio tsi konrori tsi iah taontontati ne kitkit nʼiah asen taskatonnihiiasere.