Job Tánon ne Raoronhiakensera 9 - OhiatonhseratokéntiJob Tonsahatiwasera꞉ko Iáh tekáien ne Tehariwakas 1 Ethò꞉ne ne Job tonsaharihwaʼserá꞉ko: 2 “Kwáh í꞉ken tsi wakaterièn꞉tare ki tsi thóh ní꞉ioht. Ók onh ní꞉ioht tsi ahakwé꞉ni ne rónkwe aoiánereʼke raohénton ne Rawenni꞉io? 3 Tó꞉ka nón꞉kak nónkwe aiénhre ne taniriwakénha ne raónha, iáh ónhka taiekwé꞉ni ne tahonwarihwasehrá꞉kwahse nénskak iahonteráts꞉te ne tewenhniaweheʼtseráhsen nihiorihwà꞉ke ahionteʼnién꞉ten. 4 Ne Raónha tsi nihateʼnikonraʼthókha, tánon roshatstenhserowanenʼkó꞉wa —ónhka ahonwatarontsiénhse, tánon nahiakoterihwathentsiénhni?— 5 raónha rorhiá꞉nerons tsi ionontahrón꞉nions tánon iáh thakontirihwaienté꞉rihke, thensakononwetsáweron thóh raonhakwahtserá꞉kon; 6 ónhka ráwaks nonwénhtsa rarahthákwas tsi nón꞉we niká꞉rate, tánon nahonawahataʼshón꞉as wahó꞉wake; 7 ónhka raró꞉ris ne karáhkwa, né tó꞉sa ahontakarakwí꞉nekenhne; ónhka sakoró꞉roks ne tsi iotsistohkwarón꞉nions; 8 ónhka iatehahiátit khók tehotakwahríhton ne tsi karonhiá꞉te tánon waharatatséshon ne tsi ionontakwahronhtón꞉nions ne kaniatarakeʼkowáhne; 9 raónha róshon ne nokwá꞉ri ne tsi karonhiá꞉te tánon ne ratórats rotsatá꞉nenh tánon rasharénhawe, ne tsáta nikón꞉ti tekontinonhniákwah tánon nenhtiè꞉ne nokwá꞉ti iotsistohkwarón꞉nions; 10 raónha rohiò꞉thens ne iorihowá꞉nens ne iáh thahitewakwé꞉ni nahionkwahnikonraién꞉taʼne, tánon ne iorihwanerakwahté꞉nions né꞉ne iáh tewashé꞉tons. 11 Satká꞉tho, tiá꞉takta ratohéstha, tánon iáh tehí꞉kens; waréson, ók iáh ki tiatehikaraientà꞉on. 12 Satkátho Teshakokwáhtha; ónhka aiekwé꞉ni tahonwatáste? Ónhka ahonwénhase, ‘Onhnishatié꞉ra?’ 13 “Rawenni꞉io kwáh iáh thatahatáste ne raonhakwáhtshera; iekaní꞉hare ne rontatkowanátha tehonaʼtsatʼton ne rahohénton. 14 Onhká꞉ti ní꞉ioht tsi tahirihwaserákwahse? Nahontakawenhnaié꞉rike nákatste ne rahonhà꞉ke? 15 Ethosà꞉ne iáh othé꞉non tewakení꞉kon, iáh tatkwé꞉ni tahirihwaserá꞉kwahse; ó꞉nenk tsi enkanithénte natanithénron tsi niká꞉ien ne tehatiatoréhtha. 16 Iekaní꞉hare niahí꞉naton tánon ne tahakerihwaserá꞉kwahse, kwáh iáh shé꞉kon tatkwé꞉ni naontakéthakwe tsi enhatahónsathate nakewén꞉na. 17 Ne tehakaskwahseronkwáhtha ne kaorihwenhthá꞉tshera, tánon tehanahnetárions tsi niwakatkarewathánion ne kwáh iáh othé꞉non tahontakarihón꞉ni; 18 iáh tehakerihwá꞉wis ne tahontakatón꞉rie, ók ne ratsiatananonhnáktha ne iohterihwatskárat. 19 Tó꞉ka ne taiakenetá꞉ko ne kaʼshatsténhsera, raónha ki ne raʼshátste! Tó꞉ka né꞉ne ahonteriwahtén꞉ti ne kaianéren, ónhka káti né꞉e aiekwé꞉ni nahionkerákwahse tsi nikawistáhets? 20 Iawerohátien tsi niwahtsiáneren, kwáh í꞉ih tsitsaká꞉ronhte enwakerihwá꞉roh; iawerohá꞉tien tsi iáh othé꞉non tewakenhitserá꞉ien, kwáh ki enharihwaní꞉rate tsi waʼkení꞉kon. 21 Iáh othé꞉non tewakenitsherá꞉ien, iáh othé꞉nen teskathateniahé꞉sen; wakaterihonkotáni tsi nikónhne. 22 Enskák khók tsi nahó꞉ten waʼken, shakotón꞉tha tatetsarónh꞉kwen ne iáh othé꞉non teotiní꞉kon tánon ne rotiní꞉kon. 23 Tó꞉sa nó꞉kwire thentsawénstsi entkáhawe ne kenhé꞉ion, kwáh kí thensakoié꞉ron ne raonateraswaktsénhtsheras ne iáh othé꞉non teotiní꞉kon. 24 Nonwénhtsa thóh iewatká꞉wenh ronhtsá꞉nake ne ronhnonkweʼtahétken; teshakokaraséhthas nahonkweʼtashón꞉as ne ratirihwénhthas— tó꞉ka iáh raónha ki thóh tehaié꞉ra ónhka káti? 25 “Ne tsi wakatenhniseraté꞉nions sénha ne tehióka tsi ní꞉ioht ne teharé꞉rons; shó꞉tsi ioʼshátste tsi kontohéstha iáh tekontkáthos ne thé꞉nen ioiá꞉nere. 26 Thóh ní꞉ioht tsi kontohéstha tsi ní꞉ioht ne kwáh tehiohonwáka; tsi ní꞉ioht rawerókwaks tsi thenthahiatákwakte ne raorhió꞉ta. 27 Tó꞉ka akí꞉ron, ‘kwáh enwakeʼnikónhren nakerihwakathéntshera; kwáh ó꞉ia nenskatkonshothénste tánon ensehwahtié꞉shon,’ 28 Waketsá꞉nike akwé꞉kon nakeronhiakénhsera, asè꞉ken wakaterièn꞉tare tsi iáh ne taskónhniate ne iáh tahonkeʼní꞉konh. 29 Ní꞉i ó꞉nenk ionkenonhtanákton, nontié꞉ren káti nón꞉wa ní꞉i ahontió꞉ten ne sehwahtserenkó꞉wa? 30 Tó꞉ka ne akatiatoharéstakwe noniehtá꞉keri iekaní꞉hare ne akatsioharé꞉takwe ne wakenrontákwen, 31 Shé꞉kon ki thóh iesestsiatónhti tsi ioshonwakáronhte, tánon nakatserónhniat enwátswenh. 32 Asè꞉ken iáh ki wá꞉hi rónkwe tè꞉ken, tsi ní꞉i ní꞉ioht, né꞉tho tsi nontié꞉renk thenhirihwaserá꞉kwahse, né꞉tho tsi ahó꞉wenk skát꞉ne iahiá꞉kene ne kaiatorethatserá꞉kon. 33 Iáh tehionkwè꞉taien ne skén꞉non ahrón꞉hni tsi natehiatiá꞉tere, nónhkak ahónton ne tehiakenitiá꞉ron tashontsanisnón꞉sarenh. 34 Áhnion ne raothénhnits éhren rahá꞉wit nakonhá꞉ke, tánon rátkaf tsi ratʼteronhkwén꞉nis, 35 Ethò꞉ne ki enkatá꞉ti kwáh iáh othé꞉non thahitsaní꞉sehke, ók iáh ki ne thóh téhiot nakonhá꞉ke. |
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
Canadian Bible Society