Job Tánon ne Raoronhiakensera 30 - Ohiatonhseratokénti

¹ “Ók kíʼ nón꞉wa kwáh ionkatswatákwen, ne ne tsi nihá꞉ti ne sénha nitotiiónhas tsi ní꞉i ní꞉iohtʼ; ne ronwatiníha khehiatonhnihénhse ne ne iáh skátne thakhè꞉teron nakitsenhnenhó꞉kons érhar.

² Nahó꞉ten kástha nakerihwà꞉ke tsi nahontáwe ne kaʼshatsténhsera ne ronhtsá꞉nakes? Ratikwé꞉kon ronwatishatstenhseratákwen.

³ Tsi nihotinhewanentákon ne tsi natehontekwahkárias tánon kwáh í꞉ken tsi rontonkáriaks niahontsiatenhake nón꞉we iostó꞉re niahón꞉ne noʼkarasné꞉ha, tánon tsi nón꞉we ne iáh othé꞉non teionhontiásthas tánon iáh ónhka teienákere;

⁴ ne ratihontákwas ne tehiohontahiótsis tánon nonerataʼshón꞉as nokwireʼshón꞉as, tánon ne rontsiathatarihatáhkwa naoteraʼshón꞉as ne kenk nikakwí꞉ras.

⁵ Ronwatihiaʼtinekén꞉hen tsi nón꞉we nihatinákerehkwe; nonkweshón꞉as thenhiakohénrehte nó꞉nen enhonwatí꞉ken thóh ní꞉ioht kwáh ne ne ratinénskwas wasakotí꞉ken.

⁶ Enhonhnésake thóh nón꞉we nahontenaʼtón꞉ni ne tsi nón꞉we ne iostéhon kaniataratátie tánon tsi niwatenatáksen; ne tsi iosonhwé꞉nions nonhontsà꞉ke tánon nosténhrakes.

⁷ Tsi iotkwirón꞉nis nón꞉we nihontsakaienthánions; onhnionwaró꞉kons thóh teonahtsiatanekhánion.

⁸ Ne ronwatiioʼokón꞉as ne thonatonhnókte; iáh teotishén꞉naien nón꞉kwes, ronwatiiaʼtinekén꞉en tsi ionwenhtsá꞉ien.

⁹ “Tánon nón꞉wa ionkaterenhnonhniá꞉tha tsi thihionhtiéron; iontsennaksátha.

¹⁰ Kwáh í꞉ken tsi ióntsons, ahé꞉ren nió꞉re thón꞉nes ne tiaʼtákta; iáh onáken thahón꞉nete naionkanitskerosérawe khón꞉sake.

¹¹ Tiorì꞉wa tsi Rawenni꞉io tonsahatironhtón꞉ko natsherí꞉ie tánon eʼtá꞉ke wahakón꞉ni; ronónha ó꞉ni í꞉se iahoná꞉ti nahontatié꞉nenke nakʼkénton.

¹² Ne skeweientetákwen nokwá꞉ti wakentiokó꞉taʼne nithotiiónsas; wahonkónhnien ne takaʼrá꞉tate, tánon wahonthahonhniánion ne nahonkhetʼkénthen.

¹³ Wationkhaharíhthen, tánon sénha iahatí꞉rehke nakatkaronhniátshera; iáh ónhka thahiontié꞉nawaʼse ne tahonwahtí꞉taste.

¹⁴ Thóh nón꞉we nenhontóhetste tsi shí꞉ken ní꞉ioht ne tewataká꞉ron teionsontarí꞉hon; thóh enthontiatakarateniá꞉te nononwenhserá꞉ke.

¹⁵ Kateronkwáhtshera tontaionkehró꞉roke; nakatkwenienstatiéra tsi ní꞉ioht ne owéron iaʼká꞉hawe nakatesenhnietiéra ontó꞉hetste tsi ní꞉ioht ne otsáta.

¹⁶ “Nakatónhnhets iehiowerontà꞉on nakónhake; nawenhní꞉sera nakeronhiaʼkénhsera otiató꞉renhne.

¹⁷ Ne tsi niwasóntes natʼtienshón꞉as teiowehestá꞉nions, tánon ne kanonwakthéntshera wastsioká꞉nons iáh nonhwén꞉ton teiaorihsénhtas.

¹⁸ Nakatierónhnia ne ne kaʼshatstenhserowá꞉nen iatewatʼteni; ne watewakwánake tsi ní꞉ioht natsatána.

¹⁹ Onawátstake iahatiatón꞉ti, tánon thóh nontiatá꞉wenh kwáh ne ne oʼkén꞉ra tánon wakenronhtákwen.

²⁰ Shonhà꞉ke iatkasénhtho ók ní꞉se iáh tateskeriwaserakwén꞉ni; watéhtʼtaʼne, tánon ní꞉se nek khók ne waskatkátho.

²¹ Ní꞉se waskateniakatstáktie; ne naoshatsténhsera ne satiá꞉nake thonkatiaʼtón꞉ti.

²² Í꞉se waserihón꞉ni nowéron tahontiátakwe tánon ne ahonkonwí꞉serete, tánon thóh watsiatá꞉rihne tsi niioweraʼshátste.

²³ Wakaterièn꞉tare ní꞉se tsi kwáh ienstiathénhawe ne kenhé꞉iatne, tánon tsi kanónshote iontateweienhtón꞉ni nonkweʼtakwé꞉kon ne iakónnhe.

²⁴ “Orihwiioʼón꞉we tsi iáh ne ratsá꞉nake nashakoʼtónte ne teiontkárias; nó꞉nen thóh nón꞉we natkaronhniatserá꞉kon wationhsénhtho nahiontatié꞉nawaʼse.

²⁵ Iáh ken thatekheiasén꞉those tsi niiá꞉kon ne tsi iakothenhniseraténionskwe iahonhniseraní꞉ronhkwe? Iáh kén tethewakeʼnikonhrénhen ne wakarihón꞉ni nonkweshón꞉a tsi iáh othé꞉non teiakóien?

²⁶ Nó꞉nen ne siwaʼké꞉rare ne ioiánere, karihwahétken ón꞉we; nó꞉nen ne siwaké꞉rare ne kaswathétshera tetiò꞉karas ón꞉we.

²⁷ Natkarosthákon kwáh tetionekónties, tánon iáh nonhwén꞉ton thatekátas; nawenhní꞉seras ne karonhiaʼkénhsera tá꞉we ne tahiatiatátken.

²⁸ Thóh í꞉keʼne ne iáh teiorakótahkwe tánon tetiò꞉karaskwe; Thentʼtá꞉ne ne tsi watkenhní꞉son tánon tewatkénhrete naiontié꞉nawaʼse.

²⁹ Í꞉i iatiatatekénha waká꞉ton ne kahentakéha érhar, tánon ontiaténhro ne skawirowaneʼkó꞉wa.

³⁰ Ne tsi wakenewá꞉re kahón꞉tsi nahá꞉wenhne, tánon naktienshón꞉as iótets tsi niioʼtarí꞉hen.

³¹ Nakenó꞉wa ne iahónton nahontiónhnionʼkwe, tánon ne katerenhnotáhkwa ne ieiontón꞉ries thóh nikawenhnó꞉ten tsi ní꞉ioht ne teionhsénthos.