Job Tánon ne Raoronhiakensera 2 - Ohiatonhseratokénti

Nótkon Shé꞉kon Sahoteniénten Ne Job.

¹ Énska wenhniserá꞉teʼkwe ne ratironhiakeró꞉nons wahón꞉newe ne tahatí꞉taʼren raohénton ne Roiá꞉ner, tánon Sakoriwaros thóh nón꞉ne rahiatará꞉tse.

² Ne Roiá꞉ner wahawénhase Sakoriwaros, “Kaʼnón꞉we nón꞉tase?” Sakoriwaros wathorihwaʼserákwahse ne Roiá꞉ner, “Watkateratánion ne tsi ionwenhtsá꞉te, tánon watkatekhahakwáhnion ne nón꞉we.”

³ Ne Roiá꞉ner wahawénhase Sakoriwaros, “Watitsatát꞉ken ken nahkeʼná꞉tshera Job? Kwáh iáh ónhka nahonsahonwaiérenhke ne tsi ionwenhtsá꞉te, iáh othé꞉non thahonwarihwatsiénhriase tánon ne nénhska ne rónkwe kwáh í꞉ken tsi rorihwakweniénstha ne Rawenni꞉io tánon ratarónhtsiens tsi nokwáh ne karihwahetkénhsera. Tánon shé꞉kon rotienawáston ne rawetakwáhtshera, ethosà꞉ne wahsét꞉reke nahihiatkónthen, nahihiátonhte ne kwáh iáh othé꞉non tahontakarihónhni.”

⁴ Ethò꞉ne Sakoriwaros wathorihwaserákwahse ne Roiá꞉ner, “Ne rónkwe kwáh akwé꞉kon enhatiakwarí꞉shi tsi nahó꞉ten ahoiéntake oʼnaiá꞉wenhne narónnheke.

⁵ Ók iateshanentsests nón꞉wa iatié꞉na tsi rosʼtsientare tánon ne tsi rón꞉ne kwáh tsiʼnithishatierá꞉ton tsi enhiakenrenserón꞉ni!”

⁶ Ne Roiá꞉ner wahawénhase Sakoriwaros, “Tho nihiá꞉wen, í꞉se sashatstenhserá꞉kon enhotátere; ne khók kí sehnóns꞉tat ne tsi rón꞉ne.”

⁷ Káti Sakoriwaros éhrenh sá꞉rete raohénton ne Roiá꞉ner, tánon wahohrá꞉rane ne tsonewárat wahatsátho ne Job rashiʼtó꞉kon thontásawenh tsi nió꞉re ne ranontsistakénhiate.

⁸ Ne Job wát꞉rakwe ne tehiotsetaríhon otá꞉ra ne nahakétakwe rahiá꞉take, tánon thóh tahanitskwáhre ne wakenrontákwen.

⁹ Ethò꞉ne ne ró꞉ne wahawénhase, “shé꞉kon ken ne satienawátston tsi nitisetákwen? Tserihwaientáthen ne Rawenni꞉io, tánon tsiheih.”

¹⁰ Ók warénhase, “Tsi nisá꞉thare thóh ní꞉ioht tsi watátis ne tsiotón꞉nokte iónkwe. Kwáh ken ahitewaié꞉na ne ioiánere tsi nitewé꞉tha Rawenni꞉io ratsánake, tánon iáh ne tahitewaié꞉na ne wahét꞉ken?” Norihwakwé꞉kon kí꞉ken ne Job iáh ki teorihwanéren ne rá꞉sake.

Ne Job Áhsen Raoteroseraʼshón꞉as

¹¹ Kí nó꞉nenh ne Job náhsen nihá꞉ti raoteroseraʼshón꞉as sahatirihwà꞉ronke akwé꞉kon kí tsi nihoiátawenhs ne roiatorèhon, shatihiaʼtà꞉tions tahonthentiónhko ne tsi thatì꞉teron—né꞉ne Eliphaz né꞉ne Temanró꞉non, Bildad né꞉ne Shuhró꞉non, tánon né Zophar né꞉ne Naamathró꞉non. Wathontátken né꞉ne ahonwatkénhsera tánon ahonwariskó꞉te tánon ahonwaʼnikonhraiewentʼtote.

¹² Nó꞉nen shahonwáken nahí꞉non nió꞉re sonhtahón꞉ne, iáh tehonwaientherèhon, tánon wahontewenhnatéthe tánon tahonkwísron tsi otsitowa tsi niiot tsi wahtonsentʼto; wahathiratiónko ne rahonatsatá꞉wi wá꞉koses tánon è꞉neken iahonakenrónhti ne wahonthatakenrároste ne ratinontsí꞉nes.

¹³ Sát꞉ne wahonnitskwénhtare nonwenhtsà꞉ke tsáta nón꞉ta nikarì꞉weskwe tánon tsá꞉ta niiokaratserákekwe, tánon iáh ónhka ne tiowénhna tehonwathará꞉ni, asè꞉ken ne tsi wahonkátho ne raoronhiakénhsera tsi natehiotenonhianì꞉ton.