Job Tánon ne Raoronhiakensera 18 - OhiatonhseratokéntiBildad Shó꞉tare: Rawenni꞉io Sakorewátha Ne Iakonkweʼtahétkens 1 Ethò꞉ne Bildad né꞉ne Shuhró꞉non watariwaʼserá꞉ko: 2 “Tonikarì꞉wes ensatewenhnató꞉rate? Sanontonhnión꞉ko, tánon ethò꞉ne kwáh enhiakwahtá꞉ti. 3 Nontié꞉ren tsi é꞉tho nitshionkí꞉te tsi ní꞉ioht ne kontiʼtshé꞉nens? Nontié꞉ren tsi nateskwahkánere tsi ní꞉ioht ne iáh tahionkwarihóntake? 4 Ní꞉se satatiataraʼtiónhkwas thóh ne sanhakwahtserá꞉kon— kwáh ken ne tsi ionwenhtsá꞉te ahiontewenhtéthe í꞉se asehrihón꞉ni, khés nosténhras è꞉renh akahawí꞉ton tsi nón꞉we niiotinatʼte? 5 “Orihwiiohón꞉we ne kaswathé꞉tshera ne ronhnonkweʼtahétken tsi ronwanaswatén꞉ni, tánon notónhkwa ne raotí꞉tsire iáh tateskaswathéta. 6 Ne kaswathétshera tetioʼkarà꞉on ne raotohserá꞉kon, tánon ne rathasherotáhkwa iehaserotáhkwake ká꞉niote ók ioswá꞉hon. 7 Roianahní꞉ronhkwe, nok nón꞉wa kenk nateshakahésons, tánon né kwáh raónha tsi nioteʼnikonrónhni karihwaiésas. 8 Asè꞉ken thoiahará꞉taʼne ne tsi tewaʼteristáien, tánon thóh niahá꞉re tsi tiosonwakà꞉ronhte iahaiá꞉thenhne. 9 Ne waʼterístaièn rakotárake waoié꞉na; ne waʼteristáien waotié꞉nawatste. 10 Tewasehriieʼtá꞉ronhwe waséhton ne raorihwà꞉ke nonwenhtsá꞉ke, wateristaién꞉tsi nón꞉we nihohatátie. 11 Ne kateronkwáhtshera ne ronwateronkwén꞉nis kwáh tsík nahontahiotserá꞉tonke, tánon ronwá꞉sehres tsi nihokoʼtaraienthánionre tánon iáh tehoterièn꞉tare kaʼnón꞉we niá꞉re. 12 Ratonkáriaks ká꞉ti kwáh iáh othé꞉non tesástha; kakaronhniá꞉tshera thóh í꞉kate ò꞉ni thóh raiatáktha iohrá꞉re. 13 Ne iakorió꞉tha karantarihnétshera í꞉waks ne tsi ronewáre; nentewatié꞉renhte ne kenhé꞉ion ne enwá꞉ke ratishiná꞉kes. 14 Thonwahiathotsiaʼton ne raotohserá꞉kon tsi nón꞉we nihaniahésenhne, tánon thóh nienhonwaiathénha ne ronhwanontí꞉io kateronkwáhtshera. 15 Ne raonatohserá꞉kon iáh othé꞉nnon teská꞉ien; iontenatenhtástha watonreniá꞉ten ne tsi ratiʼterón꞉tons. 16 Ne raoteraʼshón꞉as onhstaʼten ne nà꞉kon nokwáh tánon ne aóhwenk iohnatón꞉tons kaiakhónnion ne è꞉neken nokwáh. 17 Nahonweiá꞉rake ónhton ne tsi ionwenhtsá꞉te, tánon iáh othé꞉non thahasenhná꞉rake ne tsi tekanatokénhseron. 18 Ronwaiaʼtinekén꞉en ne tsi teioswáthe tsi tetiò꞉karas niehonwaiathénha, tánon ronwaiaʼtinekén꞉en ne tsi ionwenhtsá꞉te. 19 Iáh othé꞉non tesatiwatsí꞉raien khés nahatiwatsiratátie ne raónha rahonkweʼtashón꞉as, tánon iáh ónhka tsatetsakotaténhron tsi nón꞉we nihatinákereʼkwe. 20 Tsi nihá꞉ti ne iaʼtewatséntos tatinákere wahontkarón꞉ni, tánon kateronkwáhtshera ne wahotiié꞉na ne tsitkarahkwí꞉nekens ratinákere. 21 Orihwiiohón꞉we tsi thóh ní꞉ioht tsi rotinonshó꞉tons ne iáh teotinihioserá꞉ien, thóh nihonaktò꞉ten ne iáh tehoienhté꞉ri ne Rawenni꞉io.” |
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
Canadian Bible Society