Job Tánon ne Raoronhiakensera 16 - Ohiatonhseratokénti

Job Sharihwaní꞉rats Tsi Iáh Teoní꞉kon

¹ Ethó꞉ne né Job watharihwaʼsehrá꞉ko:

² “Wakaronken wé꞉so né nikarihó꞉tens; iotakontat né sewanikonranirátʼtseras kwáh sewá꞉kwekon.

³ Né iowerare owenhnasonhas iáh ken tsewatót꞉tha? Khés nahó꞉ten ní꞉se tsi iesewakontakwen sewá꞉thare?

⁴ Í꞉ih ó꞉ni ahonton thóh ní꞉ioht tsi akatá꞉ti tsi kiʼ ní꞉se ní꞉ioht, tó꞉ka ní꞉se thóh naí꞉sanákthothenhake tsi ní꞉i ní꞉ioht ahonton né takewenhnáh꞉khanion nakonhiát꞉konthen, tánon takanonká꞉renhron né sahenton.

⁵ Ní꞉i ahónton nakonikonraiewentʼthote ne tsitsakà꞉ronte á꞉katste, tánon tsi enkonnikonrahiewentʼthote tsi enkatsiorhianerónhko aówenk nahontahiosehronhnénhthe ne saronhiakénhsera.

⁶ “Tó꞉ka shí꞉ken akatá꞉ti, nakeronhiaʼkénhsera iáh ki tahontahioseronhnénhthe, tánon tó꞉ka shí꞉ken akatakatstáthe, thóh nakonhá꞉ke ahonkatrákwahse?

⁷ Orihwiiohón꞉we ó꞉nen ne raónha tsi iahatkóntaʼkwe; ne waronhniáte ratikwé꞉kon nakateroʼserahshón꞉as ne tahionkeʼnikonrhiákten.

⁸ Tánon wahakinhokeríhkhon, né꞉ne onhkerihwanirá꞉tie tsi nihionkátkonte; tsi niwakatí꞉wen wahé꞉neʼne tsi nihakátkonte, tánon kontsá꞉ke nón꞉we nikariwaní꞉rats.

⁹ Wahatsataratiónko thóh raonhakwahtserá꞉kon, tánon wahák꞉shon; wathanhiokáranie natkénton; ne rátsons tsiatakarotáseron nakonhá꞉ke.

¹⁰ Tsi natsionkatkáneren kwáh teonatskaráwen; wahonkaranonsáhiaʼke; wationkehonwarón꞉ni nahontahionkatsiatón꞉ti.

¹¹ Ne Rawenni꞉io iahakatiaʼkwahrí꞉shi tsi nokwáh ne iáh teotinihioserá꞉ien, tánon kwáh iahakát꞉kawe ronhtsá꞉nakes ne ronhnonkweʼtahétkens.

¹² Kwáh skén꞉nonk tikónhnekwe, kwáh thontaiawénhstsi wathakaskwáhseron; kniátake wahaié꞉na tánon onhontsà꞉ke wahatiatón꞉ti; ne wahakhónhniate nahatesenhnaweiénstakwe ne tahakohiahákhon ne raoienkwé꞉ris;

¹³ ne rahonkweʼtashón꞉as ne tehionkakwataséhton. Watróren naʼtseshé꞉ri tánon kwáh iáh othé꞉non tehawenéston ne kenthénrat; tánon tahahiá꞉kenʼwe akwé꞉kon ne tiatákon tánon onhwenhtsá꞉ke iakanahó꞉ten.

¹⁴ Ratkarewatánions thó꞉ka nathontahatasawá꞉nion; thontahakaráthate tsi ní꞉ioht ne raterí꞉ios.

¹⁵ Ne wakenítkhon ne káiare nahó꞉ten nakenhehónhne, tánon watakenroién꞉ton nakeshatsthénhsera.

¹⁶ Kwáh ionaná꞉wenh ne konsáke tsi natekaséntos, tánon ne tsi iotasátare ne kenhé꞉ion kwáh tsi tekakretóntons nón꞉we ní꞉wes.

¹⁷ Ethosà꞉ne kwáh iáh othé꞉non teshoteriwatewá꞉ton ne katsá꞉nakes, tánon nakaterénhnaient kwáh aóskon í꞉ken.

¹⁸ “O ohóntsa, tó꞉sa sheró꞉rok nakenekwénhsa; tó꞉sa ónhka serí꞉hon nahionkáriste tsi nikeriwanón꞉tons ne tkariwaié꞉ri.

¹⁹ Shé꞉kon nón꞉wa, kwáhse, nakerihwanirátshera karonhiá꞉ke tká꞉ien, tánon ne thakénes è꞉neken nón꞉we thèn꞉teron.

²⁰ Nakatoroseraʼshón꞉as thihiontié꞉ron; ne khá꞉rake iewakaseró꞉te raonhà꞉ke ne Rawenni꞉io.

²¹ Askwé꞉ni ken ne taisenirihwaké꞉na ne Ní꞉io ne rónkwe raorihwa꞉ke tsi ní꞉ioht tsi thatierihwakenáse ne sateróhsera?

²² Asè꞉ken nó꞉nen tó꞉ka nihioserá꞉ke tsi nitsawè꞉non, kwáh kí thóh nón꞉we nienhénke tsi nón꞉we ne iáh thatahòn꞉take.