Job Tánon ne Raoronhiakensera 12 - Ohiatonhseratokénti

Ne Job Tonsaharihwaʼserá꞉ko: Kaierónhsera Natiató꞉ten

¹ Ethò꞉ne ne Job watharihwaʼserá꞉ko:

² “Iáh teiotenó꞉went í꞉se ne tiónkwe, ó꞉ni nateʼnikonratokháh꞉tshera kwáh thóh enkénheie tionháke.

³ Ók kwáh ehniwakeʼnikónrah tsi ki ní꞉se ní꞉ioht; Iáh sénha ó꞉ia tetiató꞉then tsi ki ní꞉se ní꞉ioht, tánon ónhka ne iáh thahiakoterienʼtá꞉rake kí꞉ken naorihothénsons.

⁴ Kaierónhsera natiatóthen tsi nokwáh nakaterohseraʼshón꞉as; Í꞉i, ne iehiná꞉ton ne Rawenni꞉io tánon wathakerihwaserá꞉kwahse, khonkweʼtaié꞉ri tánon iáh othé꞉non tewakení꞉kon kónkwe, ók Í꞉i ne kaierónhsera í꞉ken.

⁵ Nonkweshón꞉as ne iáh othé꞉non tateiakoʼnikónhrare iáh othé꞉nen teiontsterístha natkaronniá꞉tshera nahóntawe; ók nateraswaksénhtshera kawehienhnenhtà꞉on tsi nihiá꞉kon ne ionshí꞉take teiahotsiskonhonhátie.

⁶ Ne raonatohserá꞉kon ne ronhnonkweʼtahétkens kwáh skén꞉nonk thí꞉ken, tánon tsi nihiá꞉kon ne ronwanakón꞉nis ne Rawenni꞉io kwáh ne iaothé꞉non thateonanikónhrare, ne ratisén꞉naiens ne thikanihioserá꞉te.

⁷ “Ók sherihwanón꞉tons ne kaʼtshé꞉nens, tánon kwáh eniesarihónhnien; notsithenokónhas ne tsi iówerare kontí꞉tses, tánon kwáh eniesahró꞉ri;

⁸ ietsirihwanón꞉tons ne kaienʼthó꞉tsheras ne tsi ionwenhtsá꞉te, tánon kwáh eniesarihónhnie; tánon ne kentsonʼshón꞉as ne kaniatarakeʼkowáhne kwáh eniesahró꞉ri.

⁹ Ónhkak ken ne kí꞉ken tsi nihá꞉ti ne iáh tahiakoterienʼtá꞉rake né꞉tho né꞉ne Roiá꞉ner thóh nióshon kí꞉ken?

¹⁰ Thóh ratsá꞉nake ká꞉ien natónnhets tsi nahoʼténhsons ne iónhne tánon ne rahonhnonní꞉sera nonkweshonʼhas.

¹¹ Iáh ken nohónta tewatewenhnatkénhse Kwáh kih tsi ní꞉ioth ne iesá꞉kon tsi niwatkénhse ne kákhwa?

¹² Nateʼnikonratokhá꞉tshera ne khók ken iehá꞉we ne tsiakahonkweʼtáhion, tánon í꞉sere ken tsik ensatsténhane thóh ne khók ahisaʼnikonhraién꞉taʼne?

¹³ “Raónha nikwé꞉kon ne ateʼnikonrathokhá꞉tshera tánon ne kaʼshatsténhsera; tánon natokháhtshera ó꞉ni ne kaʼnikonraientá꞉tshera.

¹⁴ Tó꞉ka ne thé꞉nen aharihwén꞉tho, iáh ónhka taiekwé꞉ni nahonsaiakón꞉ni; tó꞉ka thé꞉nen ahanhó꞉ton, iáh ónhka taiekwé꞉ni nahonsaienotónhko.

¹⁵ Tó꞉ka iáh tahakenhnóreste, enhionhontsákthen; tó꞉ka enthaténiete nokenhnoré꞉sera, enwenhnotón꞉nion tsi ionwenhtsá꞉te.

¹⁶ Raónha ne kaʼshatsténhsera í꞉ken tánon nateʼnikonrathokhá꞉tshera í꞉ken; ne ienikonráhtha tánon ne ronwahtinikonrahthén꞉nis raónha nenhné꞉e kenh ienhsakó꞉iere.

¹⁷ Shesakohénthenhse ne ronteʼnikonrathókas è꞉ren shesakoiatenhawí꞉tha raotiskawetóskon tánon raotineóskons, tánon ne ratirihwén꞉thas tesakotonhnhotʼtákwa.

¹⁸ Shesakonontihiotserarí꞉shions ne rontinontí꞉ios, tánon shesakonaskón꞉nis.

¹⁹ Shesakosaríhnes ne ratitsihénstatsis è꞉ren shakohiaʼtenhawí꞉tha raotiskawetóskon tánon raotineóskonk thí꞉ken, shesakoshatstenhserákwas tsi nihá꞉ti ne sakonatkorástonhne nonkweshón꞉as.

²⁰ Iáh tesakorihwá꞉wis ne rotirihwató꞉ken nahontá꞉ti, shesakókwas ne raotihiaʼtorethátsheras ne rotiksthenhokón꞉as.

²¹ Ne thá꞉werons nashakahonhnatsáte ne rathisenhnowá꞉nens, tánon shesakoshatstenhserákwas.

²² È꞉ren rahawí꞉tha ne kwáh í꞉ken tetsiokaráskowa tsi watená꞉taien ne kenhé꞉ion, tánon ne rónhnis ne kwáh tetiò꞉karas nón꞉we tahioswathè꞉ne,

²³ Sakahonhnién꞉nis nonkweshón꞉as nahatisátstenhne tánon ethò꞉ne enshesakosatstenhseráhkwa; sakotsiokowanátha nonkweshón꞉as, ethò꞉ne enshesakótonhte.

²⁴ Shesakókwas ne raotinikonraientá꞉tsheras nonkweshón꞉as ne tsi ionwenhtsá꞉te, tánon sakahonhnién꞉nis nahontawénhrie tsi nón꞉we ne iáh othé꞉non tehiohaté꞉nion.

²⁵ Ronhosehronháties ne tsi tetiò꞉karas ne kwáh iáh othé꞉non thateioswát꞉te; sakahonhnién꞉nis ne tahotishinhorokʼkhon tsi ní꞉ioht ne ahotineká꞉take.