Job Tánon ne Raoronhiakensera 11 - Ohiatonhseratokénti

Zophar Wahatá꞉ti Job Ronikon Teothention Nahatʼrewate

¹ Ethò꞉ne Zophar né꞉ne Naamathró꞉non watharihwaʼserá꞉ko:

² “Aó꞉wenk ken ne iawetowá꞉nen owenhnaʼshón꞉as ne iáh thatakarihwaserákwen, tánon aó꞉wenk ken ne tsi ró꞉thare ne rónkwe nahontakarihwaié꞉rihke?

³ Aó꞉wenk ken tsi nihiaothé꞉non tekén꞉tons tsi nisáthare ne ahiakahón꞉nien nónkwe ne thatahiontóthate? Iáh ken ónhka taiesatewenhnaiénhtonwe nó꞉nenh thenshé꞉ieron?

⁴ Asè꞉ken ní꞉se sá꞉ton ‘nakerihonhnienhní꞉tshera aóskon í꞉ken, tánon wakatkwé꞉niens ne ská꞉rake.’

⁵ Ók ne ní꞉io enhatá꞉ti, tánon thenhatskwéksi naiatkónten,

⁶ tánon kwáh ken ahiaró꞉ri ne ioterihwashé꞉tons raoteʼnikonratokháhtshera! Né꞉tho kwáh tekaiá꞉sere í꞉shi nón꞉we tsi nahó꞉ten askwé꞉ni nasanontónhnionwe tánon nahisaterienhtá꞉rane né꞉tho Ní꞉io tsi kwáh enshonikónhren ne sarihwaneraháktsheras.

⁷ “Askwé꞉ni ken natsiataʼtshén꞉ri ne Ní꞉io natsiatísake? Askwé꞉ni ken naserihwatshén꞉ri thóh nihosénhnes ne Roshatstenhserowanenhkó꞉wa?

⁸ Sénha iosénhnes tsi nitioterónhiate, onhní꞉ioht tsi askwé꞉ni ne thé꞉nen náshiere? Ne raotenienténtshera sénha teionó꞉tes tsi ní꞉ioht tsi tionhontsá꞉ien ne kenhé꞉ion nón꞉we, onhní꞉ioht tsi saterienʼtá꞉re?

⁹ Naotenienthénhtshera sénha í꞉ions tsi ní꞉ioht tsi ionwenhtsá꞉te, tánon sénha tewataká꞉ron tsi ní꞉ioht ne kaniatarakeʼkowáhne.

¹⁰ Tó꞉ka shí꞉ken rotohestonhátie, tánon wahanó꞉ton, tánon ne ahaterihwathéntsate ne karihwenhtá꞉tshera, ónhka aiekwé꞉ni tahonwátaste?

¹¹ Asè꞉ken roterièn꞉tare ónhka ne iáh othé꞉non teierihwástha; nó꞉nen enhatká꞉tho ne karihwané꞉ren, kwáh ken iáh karì꞉wa tharón꞉ni?

¹² Ók ne tsakohtón꞉nokte ónhkwe kwáh enhiakoién꞉taʼne ne kaʼnikonhraienthá꞉tshera, nó꞉nen ne karakonró꞉non tewahòn꞉tes rónhkwe aonakératste.

¹³ “Tó꞉ka ní꞉se ne sé꞉ri aontakariwaié꞉rike iathensanentʼtséste rahonhà꞉ke.

¹⁴ Tó꞉ka ní꞉se sarihwanerahákskon, ahí꞉non nió꞉re iahásrek, tánon tó꞉sa tserí꞉hon ne rorihwanerahákskon akenterónhtake ne satohserá꞉kon.

¹⁵ Orihwihiohón꞉we ki tsi ethò꞉ne kwáh ensatarakétsko iáh thahó꞉then tahonshasatehénsehke; ní꞉se kwáh entsisahiatanirón꞉ke, tánon iáh thahó꞉then thahisaterónhkwen.

¹⁶ Ní꞉se kwáh ensaʼnikónhren tsi natesaʼnikónhrare; ní꞉se kwáh thóh ní꞉ioht tsi ensehiá꞉rake tsi ní꞉ioht ne iotnekohéston.

¹⁷ Tánon ne tsi nishónhne sénha teniostwá꞉theke tsi ní꞉ioht nénhtie nón꞉we nikará꞉kwahre; ne tetiò꞉karas thensewatá꞉ton thóh nenhtsotónhake tsi ní꞉ioht noronhkè꞉ne tahiorakwinekenhenhátie.

¹⁸ Tánon ní꞉se kwáh entsisaʼnikonraní꞉ronke, tiorì꞉wa tsi thóh ká꞉ien nararátshera; ní꞉se kwáh ki entionhión꞉ni ne tiataktón꞉tie tánon tsi nenhsatsiatiónhnite kwáh ki skennenhkó꞉wa thenkénhake.

¹⁹ Ní꞉se ensatsiatiónhnite, tánon iáh ki tahisaterónh꞉sheke; iakotiohkowá꞉nen thentsiontsátate ne sahiathaterí꞉tshera.

²⁰ Ne ronhnonkweʼtahétken iáh tahotinikonraién꞉taʼne tsi nihotiiá꞉tawens; tsi nahiotón꞉hake nahatiniá꞉kenhne kwáh ki enwatón꞉thonke ne raotirihwá꞉ke, Tánon ne ronskáneks nohná꞉ken tahonthahontón꞉rie.”