Job Tánon ne Raoronhiakensera 10 - Ohiatonhseratokénti

Job: Ihshions ne Tsikónhnhe

¹ “Wakaterihonkotá꞉ni tsi nikónnhe; kwáh ki enkátkaʼwe tsi nakerihwakathénhtshera; kwáh enkatá꞉ti tsi nihiorihwaiéntat tsi nikónnhe.

² Kwáh enhihiénhase ne Rawenni꞉io, tó꞉sa tatréwat; takaronhkáthen nontié꞉ren tsi takená꞉kwahse.

³ Kwáh ken ioiánere ní꞉se naseiateniakátstaʼtse, tánon naskénron nahohiothénhsera ne shatsánakes tánon tatswáthete ne raotiiothénhseras ne ronhnonkweʼtahétkens?

⁴ Thóh kenh ní꞉ioht ní꞉se tsi satkáthos tsi ní꞉ioht nonkweshón꞉as tsi iontkáthos? Tánon thóh kenh ní꞉ioht tsi sanikonraiéntas tsi nihotinikonhraiéntas nónkwe?

⁵ Ne tsi sathenhniseraténions thóh ken ní꞉ioht tsi ní꞉ioht nónkwe, khés ne tsi sathoseraténions tsi ní꞉ioht nónkwe tsi iakothoseraténions,

⁶ né꞉tho ní꞉se séhsaks nakerihwaneraháktshera tánon sehrihwí꞉saks nakerihwaneraháktshera,

⁷ ethosà꞉ne saterièn꞉tare né꞉tho tsi iaothén꞉non tewakení꞉kon, tánon iáh ónhka nahonsahiontsiathotaríhsi ne shatsaʼnà꞉ke

⁸ Shatsá꞉nake watieronhtónhni tánon watiaʼtí꞉shon; tánon ó꞉nenh waskà꞉tonte.

⁹ Shehiá꞉rak né꞉tho í꞉se tatieronhtón꞉ni ionawastakarí꞉io nón꞉we nitiawé꞉non; tánon kwáh ken ní꞉se thenshesetkaraté꞉ni okénhra shé꞉kon ienská꞉ton

¹⁰ Iáh ken thóh ní꞉ioht tsi teská꞉weron tsi ní꞉ioht ne kawistohserón꞉ni tánon watesetkarénhron tsi ní꞉ioht ne kanonthí꞉son?

¹¹ Í꞉se ne wasetseronhniáte ne kané꞉hon tánon noʼwá꞉ron, tánon ne waskenikhónkwe iatéseste ne óstiens tanon nhotsinonʼiáthons.

¹² Í꞉se táskon ne iónhne tánon ne iorihwató꞉ken kanoronhkwáhtshera, tánon ne sanonsthá꞉tshera wakanonsthá꞉te nakonhnísehra.

¹³ Ók kí꞉ken nahorihothénsons sarihwashé꞉tonkwe ne serhiá꞉ne; wakaterièn꞉tare tsi thóh kí꞉ken niseweiennó꞉ten.

¹⁴ Tó꞉ka ahonkerihwáneren, ahisatká꞉tonhke, tánon iáh ní꞉se tahonsastsiatotaríshionke tsi nokwáh nakení꞉tshera.

¹⁵ Tó꞉ka akonkweʼtahetkéntake, ethò꞉ne ki wakateraswák꞉sen ní꞉i! Tó꞉ka wakatonkweʼtakwahríhshion, tánon shé꞉kon kí iáh nakahtarakétsko, asè꞉ken ne tiataná꞉non ne atehénsehra tánon satkátho nakeronhiakénhsera.

¹⁶ Takató꞉rats tsi ní꞉ioht ne roshatstenhserowá꞉nen nithoiónha kénreks; tánon shé꞉kon entsisahiò꞉then ne iorihwanerá꞉kwat nahontaskatiaʼtón꞉ti.

¹⁷ Ní꞉se á꞉se sehshón꞉nis tsi takerihwáros nahionkatkónhten, tánon takowahnasérenh ne sanhakwénhtshera tsi nokwáh ní꞉i tánon ní꞉se iontsaterí꞉io.

¹⁸ “Onhní꞉ioht tié꞉ren tsi testsiatinekén꞉en ne tsi watewiraráhkwake? Kaská꞉neks nahonkihé꞉ion nohénton ne thé꞉nen oká꞉ra ahóntken,

¹⁹ tánon ne akénhake iáh ká꞉neka thakésehke; aowenkén꞉en aontahiontsiathénha ne tsi watewiráhrakwake iahiontiaʼtakwahrihshiá꞉ton notsatónhkwakon.

²⁰ Iáh ken ne tsi niwakathenhniseraté꞉nion ne tsi nikónhne kenk ní꞉kon í꞉ken? Takerí꞉hon akonháhak akénhake, ne nahónton ostón꞉ha ahonkonrihsenhtá꞉ne

²¹ nohén꞉ton éhren á꞉kete, ne iáh nonwénhton thatahóntake; ne tsi tiohontsá꞉ien ne tetiò꞉karas tánon ne kwáh í꞉ken asatá꞉kon,

²² ne ne watonwenhtsá꞉ien ne tetiò꞉karas tánon iotasátare tánon teionitón꞉niat, thóh nón꞉we ne kaswathétshera tsi ne ní꞉ioht ne asatá꞉kon.”