Job Tánon ne Raoronhiakensera 1 - Ohiatonhseratokénti

Job Tánon Ne Raowá꞉tsire

¹ Ronkweʼkén꞉en thoraná꞉kereʼkwe tsi watonwentsá꞉ien ne Uz. Job ronwá꞉iatskwe tánon kwáh iáh othé꞉non tewátonskwe ne othé꞉nen ahontahonwárase tánon tronkweʼtaiérihkwe, tánon ne nénska rónkwe kwáh í꞉ken tsi rorihwakweniénstakwe ne Rawenni꞉io tánon ratharonhtsiénskwe tsi nokwáh ne karihwahetkénhsera.

² Tsá꞉ta niháti rotiskenrakéhte tánon áhsen nikón꞉ti tionathonwí꞉sen rowiraiéntaʼkwe.

³ Tsá꞉ta niwenhniaweheʼtseráhsen nikóntikwe teiotinakarontòn꞉a, áhsen niwenhniaweheʼtseráhsen iothiniakwáehre, wísk tewenhniá꞉we nihioiánakes tehotinákares, wísk tewenhniá꞉we tewahòn꞉tes, tánon kwáh í꞉ken tsi ronatiohkowá꞉nen kanátseras. Tánon kwáh raón꞉ha thóh kwahtséne né skátne ratinákereʼkwe nonkweshón꞉as ne tsitkarahkwí꞉nekens nokwá꞉ti.

⁴ Ne Job shakohioʼokónhas tehonteniháthakwe ses tsi natekáron rathikwaherákwe; tánon kwáh tió꞉konte tsi sakotihonkará꞉wiskwe ne áhsen nikón꞉ti rontenosenhokón꞉as ne skátne tahontón꞉te tánon skátne ahatinekí꞉ra.

⁵ Tánon nó꞉nen ne kakhwárakwe ioteweienhnenhtà꞉on, nétho Job ienhaterihwaniéte tánon enshasakorihwatokentísten. Tánon noronhkè꞉ne nenhatkétsko tánon ne ienhatháte tsi ní꞉kon roteskónte niataʼkaié꞉ri tsi niháti; asè꞉ken ne Job wahèn꞉ron, “Tó꞉ka nakenekenhterontseraʼshón꞉as wahatirihwánerake tánon ahonwhasentenhnike né Rawenni꞉io raonerhiá꞉ne.” Ká꞉ti ne Job kwáh tió꞉konte ki thóh nihaiérakwe.

⁶ Nón꞉wa ne thóh wenhniserá꞉teʼkwe nó꞉nen ne ratironhiakeró꞉nons tahónhne nahonthaténeste raohénton ne Roiá꞉ner tánon ne Sakoriwaros tá꞉re nonhnè꞉e washakotsatárahse.

⁷ Tánon ne Roiá꞉ner wahorihwanóntonhse ne Sakoriwaros, “Kaʼnón꞉we nontá꞉se?” Tánon watharihwaʼserá꞉ko, ne Sakoriwaros, tánon wahèn꞉ron, “Né tsi natewakatstikáfaties ne tsi ionwenhtsá꞉te tánon tsi natewakatekhahakwenháties.”

⁸ Tánon ne Roiá꞉ner wahawénhase ne Sakoriwaros, “Watsianontónhnionwe ken nakenáhtshera Job? Kwáh onwenhtsakwé꞉kon iáh ónhka teshonwáiere; iáh tewá꞉tonskwe ne othé꞉non ahontahonwá꞉rase tánon tronkweʼtaié꞉rih. Ne nénska rónkwe ne rokweniénstha ne Rawenni꞉io tánon rahtaróntsiens tsi nokwáh ne karihwahetkénhsera.”

⁹ Tánon ne Sakoriwaros watorihwaʼserákwahse ne Roiá꞉ner, “Ne Job ahiasenhnaiénsehke onhtéke tó꞉ka iáh othé꞉non tsatákene ne raorihwà꞉ke?”

¹⁰ Iáh ken tetsiathenhenronhnién꞉ni ne rahiataʼtónhtie ó꞉ni ne tsi ronónshote tánon tehiowá꞉nen akwé꞉kon tsi nahothénsons ró꞉ien ne kwáh tsiknahothenhakénhake? Sahiatateríston tsi nihioiothén꞉en ne ratsánakes tánon ne raoienthátseras onhtehiáron ne tsi ionwenhtsá꞉ien.

¹¹ Ók ki ó꞉nenh iatesanéntses, tánon iatséna akwé꞉kon tsi nahó꞉ten nahoiéntake, tánon kwáh enhiasénhten tsi nitisatierá꞉ton.

¹² Tánon ne Roiá꞉ner wahawénhase ne Sakoriwaros, “Thóh niiáwenh kwáh tsi naoténsons ró꞉ien í꞉se shasatstenhserá꞉kon eniohnathátere, ók kwáh tó꞉sa enskaréwate ne Job.” Ethò꞉ne ne Sakoriwaros ehrensárete raohénton ne Roiá꞉ner.

Job Wahó꞉ti Ne Raoienthá꞉tseras ó꞉ni Ne Sakohioʼokón꞉as

¹³ Énskat kí áh꞉re wenhniserá꞉teʼkwe, ne raonekenhterontseraʼshón꞉as ó꞉ni ne sakohioʼokón꞉as tionaʼthonwí꞉sens tehonatskáhonkwe tánon rotinekí꞉ren onenhará꞉keri ne tsi thohnónsohte ne ronwatsíha,

¹⁴ Ne rarihwakarénies wahohiatórenhne ne Job tánon wahèn꞉ron, “Ne teotinakáres ratitarakarát꞉toskwe tánon ne tewahòn꞉tes thóh ákta tehionatskáhonkwe.

¹⁵ Tánon ne Sabeans wahthonwanataséntʼte tánon iashakotiiaʼthénhawe ne kaʼtshé꞉nenhs tánon wahonwatinonwariaʼkónhnion ne ratinhá꞉tseras ashareʼkó꞉wa wáhonste akonwáha khók sakeniá꞉kenhne nahonsakonhró꞉ri.”

¹⁶ Tsi ná꞉he shé꞉kon nihó꞉thare, thihá꞉te thóh sará꞉we tánon wahèn꞉ron, “Ne raótsire Rawenni꞉io tonhsénhne karonhiá꞉ke tánon wahakotiataʼtsahá꞉te ne teiotinakaronhtón꞉as tánon ne ratinhá꞉tseras, tánon wahakó꞉thonhte; akonwá꞉ha khók iatonhshonkatátere sakeniá꞉kenhne nahonsakonhró꞉ri.”

¹⁷ Tsi ná꞉he shé꞉kon nihó꞉thare, ó꞉ia thóh sará꞉we tánon wahèn꞉ron, “Ne Chaldeans áhsen nahonhnitiokónhni, wasakotinenhraká꞉ri ne iotiniakwáhere tánon iashakotihiaʼténhawe, tánon washakotinonhwariaʼkónhnion ne ratiná꞉tseras asareʼkó꞉wa wáhonste; Akonwá꞉ha khók sakeniá꞉kenhne ne tahontakonró꞉rhiana.”

¹⁸ Tsi ná꞉he shé꞉kon nihó꞉thare, ó꞉ia thóh sará꞉we tánon wahèn꞉ron, “Ne sanekenhterontseraʼshón꞉as tánon ne seienhokónas tionaʼthonwí꞉sens tehonatskáhonkwe tánon rotinekí꞉ren nonenharákeri tsi thonónhshote ne ronhwatsí꞉ha,

¹⁹ Nó꞉nen ne kawerowá꞉nen iatkaweratá꞉se thontakahiá꞉iake ne iahonwenhtsathénhake. Takaiéna ne tsi kanónshote tánon wahakononhwarhià꞉kon ne kenhnithotihiónsas ne thóh rathiʼterónhtawe.”

²⁰ Tánon ne Job wathá꞉tane tánon waharatión꞉ko ne rahotserónhniah tsi nahoʼnikonrák꞉sen, ranontsistakwé꞉kon wahathatenonhkáronh, tánon ohontsá꞉ke wahahiataiénhtaʼne tánon wahaterénhnaien.

²¹ Wahèn꞉ron, “Akenehóskonk tsi nitewakè꞉non nakeʼnisténha tsi iewiraráhkwah, tánon akenehóskonk ki tsi thóh nón꞉we nienhénske; ne Roiá꞉ner taʼkáwis, tánon ne Roiá꞉ner ieshá꞉has; tehiontenonhwerá꞉ton ne raosénhna ne Roiá꞉ner.”

²² Norihwakwé꞉kon kí꞉ken ne Job iáh kí tehorihwanéren iáh ó꞉ni tehosenhténhni ne Rawenni꞉io.