Jeremiah 48 - Ohiatonhseratokénti

Nahotkarionhniátshera Ne Moab

¹ Kén kíʼ nahó꞉ten ne Roiá꞉ner Roshastsʼtenseroʼwáhnen ne ne sakoʼNí꞉io ne Israerʼró꞉nons warénhase ne Moab: “Tesehnonhiánik nonhkweshón꞉as ne Nebo nónhwe— ne raothináta kariwénhkton! Ne Kiriathaim konhwahiénenh, ne hiotenhenrahníronhkwe tenahnahtánenhʼne ehtàke wáhtion, tánon nahonkwetaʼshón꞉a wahonwahnahtéhaʼthe;

² ne raorenshaʼrónhtshera ne Moab iohthónhon. Ne tehontátʼtsions wahatiʼiéna ne Heshbon tánon wahontenikonhrónhni nahonwahnháthonʼte nonhkweshón꞉a ne Moab nónhwe. Ne tsi kanátaʼien ne Madmen enkonhwáskwehke; ne ronhterí꞉ios thóht tsienhónʼne.

³ Nonhkweshón꞉a ne Horonaim nónhwe wahthoʼtihénrehte, ‘Kanikonhrakʼséntshera! Tánon kowáhnenh ne kariwahiesáhtshera!’

⁴ “Ne Moab konhwahthónton; sehwathaʼhónshaʼtat ne ratiksahókonh tehonsénhtʼthos.

⁵ Shathónte tsi natehonsénhtʼthos tsi niahonenonhátie ne Luhith, tehonséntʼthos tsi nihotinikonhrahronhiáken tsi nathontahoʼnenonhátie ne Horonaim.

⁶ ‘Óksa, shewahtèko!’ rónhton. ‘Teshewahráhtat tsi ní꞉ioht ne iahonwenhtsiatʼtenháka tewahóntes!’

⁷ “Moab, ne sehniahésenhne ne shaʼshastsʼténshera ó꞉ni ne shaʼkwahséhtshera, ók kíʼ nónhwa ienhieshaʼhiaténhaʼwe nahieshaʼnhóton; Ne shaʼní꞉io Chemosh, skátke ne rahonkwetaʼshón꞉a ne rotikháres ó꞉ni tsi niháti ne ronwahiótenʼse, kwáh enhonwahnaʼnakeráhkwahte tsi nónhwe nahínonh nióre tsohontsiaʼiénhton.

⁸ Iáh ne skaʼnáta tahonshaʼkaniákenʼne; tetsáron norónhwahkon ó꞉ni ne kahenthakwénrahre kwáh enkarihwénhtʼthonʼke. Í꞉i, ne Watiá꞉ner, wahkatáti.

⁹ “Sehwahnenhniótʼthas ne Moab; kwáh iostó꞉re tsi enkonhwáhthonʼte. Tánon iáh shé꞉kon nónhka éhtho tahonshaʼhieterónhthaʼke.” (

¹⁰ Rontʼréwat tsi niháti ne ronahterahʼhiathá꞉kwen nahotiʼhióten ne kahioténsehra ne Roiá꞉ner teshaʼkówi, tsi thóh nònhne ne raonahsharehkó꞉wa nashaʼkothinékʼkwahthe!)

Ne Kanahtoʼwáhnenhs Ne Moab Karihwahthónton

¹¹ Ne kwáh ohénton takakahrahtáʼtsie ne Moab kwáh skénnenhk tiʼ kènʼne. Kwáh né teskonhwahierónhtara tsi ní꞉ioht notsítsa nahontʼnhekísah. Iáh tetkonhwáhwehron nahontetʼtsetaʼténi, tánon ónenh wenhséhrahkon ó꞉ni kanhekí꞉io.

¹² “Ók kíʼ iostó꞉reh ienkáhewe,” ráton ne Roiá꞉ner, “nónenh ienkhehiaténieʼthe ne rahtiʼritstónhnis nahontaʼkonhwáhwehron nahotshétahkon. Kwáh akwékonh enthonwéhron, ethóhʼne tenhatitʼtsetárihthe.

¹³ Ethóhʼne ne Moabró꞉nons enkonhwahtéhaʼse ne raoʼtiní꞉io Chemosh, kwáh tsi ní꞉ioht ne Israerʼró꞉nons tsi konhwahtéhenʼse ne Bethel, ne owistahnóron tsonónhskwahron owírah kahiatónhni né konhwahniahésenhne.

¹⁴ Ne sehwaskenrahkéte ne Moab nónhwe, nonhtiéren tsi sehwáhton sehwahnikonhratʼtsáni, ne rotiʼnikonhratʼtsáni ronterí꞉ios tsi wahterí꞉io nónhwe natehontohétstha?

¹⁵ Ne Moab tánon nahonahtowáhnenhs kariwahthónton; ne kwáh tsiahonkwetí꞉iosʼkwe nithotiʼhiónsas ronwahnahwénhtʼthon. Í꞉i ne Wahkenonhtí꞉io, ne Watiá꞉ner Waʼkeshastsʼtenserowáhnenh, tánon wahkatá꞉ti.

¹⁶ Nahotʼkaronhniátshera ne Moab ónenh ákta íwes tánon nahoronhiakénsehra tehiokahtátie.

¹⁷ “Ietʼtsihiatʼtiónnions né꞉tho onkweshónhas, í꞉se nathasewanákeres, tsi sewakwé꞉kon sewaterièn꞉tare tsi kashenhnowá꞉nen. Sewèn꞉ron, ‘Naoshatsténhsera teiotsá꞉kon; naoiatanerakwátseras ó꞉ni naoshatsténhsera iáh othé꞉nen tésken.’

¹⁸ Tasástsʼnenht tsi nisatʼsenhnahkarahtá꞉ton, tánon okenráhke shá꞉tien, í꞉se ne tiónkwe ne Dibon nónhwe nisewahnáhkere, tsi niháti ne ronhwahtiʼriwahthónton ne Moabró꞉nons tenhatʼthó꞉kwahte kíʼ ó꞉ni nònhne ne Dibon, róhriwénhtʼton ne tekatstenró꞉thaʼkwe ne tekahnahthá꞉nènhne.

¹⁹ Ne tiónkwe ne Aroer sehwahnáhkere ohwahák꞉tha tesehwáthan nahisehwateróhroʼke. Tehotihenréhtha shaʼkotiriwahnonhtónnis tsi nihiákonh hiakotekwenhátie ne Moab nonhtáhien onhnonhtahiáwenhne?

²⁰ ‘Moab konhwahsénhnion,’ tsi tenhatiʼriwahsehráhko, ‘tesehwahséntʼthos; kwáh konhwahtéhaton. Sehwahrihówahnat aktóntsie ne Arnon Kaniataʼrahtátsie nètho Moab tsi konhwahriwahtónton!’

²¹ “Kariwenhthá꞉tshera í꞉io ne tsi kanahtowáhnenhs ne tsi tiotonhontsatónnion: ne Holon, Jahzah, Mephaath,

²² Ó꞉ni ne Dibon, Nebo, Beth Diblathaim,

²³ Kiriathaim, Bethgamul, Bethmeon,

²⁴ Kerioth, ó꞉ni ne Bozrah. Kariwenhtátshera iéhio kwáh akwékon ne tsi kanatowáhnenhs ne Moab, ahinónhson nióre ó꞉ni nakʼtaʼtsiesónhas.

²⁵ Nahoshastsʼténsera ne Moab iahontókʼten. Waʼtkonhwanahkarhóskareh, tánon watkonhwahnénhtʼtsaʼke, ráton ne Roiá꞉ner.

Ne Moab Kwáh Ehtàke Enkonhiónhni

²⁶ “Snekáʼtast, tsioríwa tsi wahatatʼkowánasʼthe tsi nòkwah ne Roiá꞉ner; ne káti ne Moab kwáh thóh enhatesehréhson tsi nónhwe nihotstíkonh, tánon rahónʼa ó꞉ni nonhkweshón꞉a tenhonwahiéron.

²⁷ Moab, sehʼhiáranh tsi ní꞉ioht tsi thisehhierónhʼon ne Israerʼró꞉nons? Ehniseʼierahséhaʼkwe tsi shí꞉ken ní꞉ioht ne rahtinénhskwas ahonwahtiʼiénenhke.

²⁸ “Í꞉se ne tiónkwe ne Moab nónhwe nisehwahnákereh, sewahiáken ne sewahnahthá꞉konhs! Wáhs tánon tsitsonitstenrhiákon hionshaʼsehwanáhkerat! Thóh nasewáhier tsi ní꞉ioht notsiténha tsi konhtʼtsinakónhnis tsi ionitstenrhiákon.

²⁹ Hionkwahriwahronhken tsi nihhanà꞉ie ne Moab, akwah ionerahkwah tsi ranà꞉ie, ó꞉ni akwah ók thihatatkowà꞉nenh, ne ó꞉ni ne raonaiéhtshera, ne ó꞉ni ne raonakhwénhtshera, ók ne raonowénta iahná ehthaiá꞉wenʼne.

³⁰ Wahkaterénhthaʼre tsi nihohianerenseráksen, ráton ne Roiá꞉ner; thikénʼa tsi tehotaterénhsahron, ne raohioténsehra onówenh í꞉ken.

³¹ Ó꞉ni ne káti tsi kwáh onhkwetaʼkwékonh ne Moabró꞉nons tsi tenhkhehiasénhthoʼse; ó꞉ni nonhkweshón꞉a ne Kir Heres nónhwe.

³² Tiónkwe ne Sibmah nónhwe iókwas ne sewahetaʼshon꞉a nonénhare, sénha i꞉se wéso tsi tenkwahséntʼthoʼse tsi ní꞉ioht tsi tekhehiaséntʼthoʼse ne Jazer. Tsi tehionahré꞉nion nahonenhrahsónhas ne sewahnenharahsón꞉a iaʼtehiohiaiákon ne Iawenhéion Kaniatarahkheʼkówa tánon ièhio tsi nióre ne Jazer. Ók kíʼ nónhwa nakennhaʼkhéka sewahiasónhas ó꞉ni ne sewanenharahsónhas karihwahtónton.

³³ Natonnhará꞉tshera ó꞉ni naʼtsennonhniátshera éhren kahawíton ne kwáh tsahontsarénhsen ne Moab. Wahtkátaʼne tsi nitsioʼnékoʼthe ne tsi tehionhiaritákwah notsítsa; iáh ónhka tetsahonkwéhtaien nahonsahienhekónhni notsítsa tánon ne tahiakohénrehthe tsi nihiakotʼtsennónhni.

³⁴ “Nonhkweshón꞉a ne Heshbon ó꞉ni ne Elealeh wahthothihénrehte, tánon tsi tehonséntʼthos iahatiʼwenhnahnihárahne tsi nióre ne Jahazʼne; nonhkweshón꞉a wahakokthóntehʼne nònhne ne Zoar nónhwe, tánon ó꞉ni iahakokthóntehne ne Horonaim nónhwe ó꞉ni ne Eglath Shelishiyah. Shé꞉kon ó꞉ni ne tsi kahionhátahse ne Nimrim iostatʼténʼen.

³⁵ Kwáh tenkhétaste nonkweshón꞉as ne Moab nón꞉we tsi sakonateskóntha ne kontitshénens tsi nón꞉we nihionterenhnaientákwah tánon tsi sakotiʼtátis ne karihwihiosehokónhas ne raotiʼní꞉ios, I꞉i ne Watiá꞉ner, wakatáti.

³⁶ “Káti hionkerhiashaʼnonhwáktha ne Moab ó꞉ni nonhkweshón꞉a ne Kir Heres nónhwe, tsi ní꞉ioht nónhkak iakoterénhnote ne iehionthónries ohoróhtha ne ionhthaʼtsiatatahástha karénhna, tsoríwa kwáh tsi nahoténsons roʼtí꞉ien tsi iekáha.

³⁷ Kwáh ratiʼkwékon rohnahtaʼtenónhkaron ó꞉ni rohnatʼkonsthonrhiákon tsi rohnatʼtsiónnion. Wahontatreʼniánion ne rontsanáhkes tánon káiare wahontserónhniaʼte.

³⁸ Tehionsentʼthóhsehron tánon kanikonhraksénhtshera enkariónhnionʼke ne tsi rotiʼnonhsóhtons ne Moabró꞉nons ó꞉ni kwáh tsi níkonh tekanahtokénhaton. Asèken tewakríhton ne Moab tsi ní꞉ioht ne kátʼtse ne iáh ónhka tahtehiakothonwenhtsióni.

³⁹ Moab tehiotʼthó꞉kwen! Tehiohenráhtha! Moab konwahtéhathon. Ioriwahieshá꞉hon, tánon rahtiʼkwékonh ne áktaʼtieshónhas ratinahkeréhnion nonhkweshón꞉ha thiʼkonhwahiéron. Í꞉i, ne Watiá꞉ner, wakatáti.”

Iáh Tahkaniékenʼne Ne Moab

⁴⁰ Ne Roiá꞉ner kwáh roʼrahrátston ne onhkweshón꞉a kwáh tenkonhwahthá꞉senhte ne Moab tsi ní꞉ioht ne ákweks tehiotenonhonstsaʼkaráhkwen,

⁴¹ Nahonahtowáhnenhs ó꞉ni ne tekenhstenrotáhkwen ne tekanahtaʼnákʼtons enhathiʼiéna. Ne thóh enwenhniseráhteke ne Moab ahonkwetaʼshón꞉a ne ronterí꞉ios thóh nenhotiʼterónhsehke tsi ní꞉ioht ne iónkwe ioronhiáken tsi iowirahientáhsehre.

⁴² Ne Moab iáh ó꞉nenh tahonshaʼhiotsiokwahiéntahke tsoríhwa tsi onhtatkówahnahte tsi nòkwah ne Roiá꞉ner.

⁴³ Katerónhtshera, ne ó꞉ni ne oʼnéhshon, tánon ne wahteristahkérons iakórahre nonhkweshón꞉a ne Moab. Ne Roiá꞉ner rothaʼtíhon.

⁴⁴ Ónhka enhateniénten nahatékwahse ne kateronhkwáhtshera kwáh kíʼ oshón꞉wahkon ienhahiátenne, tánon nónhka tentʼthaʼrátʼten tenthaʼhiákenʼne ne oshón꞉wahkon kwáh tsi tewahnikáhrhare enhoiéna, tsoríhwa ne Roiá꞉ner tsi rokwahtáhkwen ne kawistáheks ne ne Moab ahotkaronhniátshera.

⁴⁵ Ne iáh othé꞉nen tehatiriwástha rotinatenhá꞉wis wahonteʼnién꞉ten nahititsénri nahontaiákone ne Heshbon nón꞉we. Ne ne Ronnonhtí꞉io Sihon thoʼniarotarónhne, ok teiotonhkwáhkwen. Ó꞉tsire iotsahátons ne tsi karistathátse oni ne tiotenónhtates ne ronteriioseranónwes ónkwes ne Moab nón꞉we nihatinákeres.

⁴⁶ Sèhtenr nonhkweshón꞉a ne Moab nónhwe! Ne nonhkweshón꞉a tsi nikonhwahsénhnaiensʼkwe ne Chemosh konhwahtónton, tánon ne ahonekenteronhtsherashón꞉as ó꞉ni ne ahohiathasehtsherashón꞉as iehonwahtiʼhiaténha nahonwahtiʼnhóton.

⁴⁷ Ók tsi nienwahtennisehríheʼwe ne Roiá꞉ner kwáh shé꞉kon enshakwaʼtshésten ne Moab. Kwáh oriwahkwékon kí꞉ken tsi nahó꞉ten ne Roiá꞉ner ráwenh tsi nenhiohiátawenh ne Moab.