Jeremiah 43 - Ohiatonhseratokénti

Jeremiah Egypt Niaʼhonwahiaténhaʼwe

¹ Iatkóhten kherorhiánionsʼkwe nonhkweshón꞉a kwáh oriwahkwékon tsi nihakró꞉ri ne Roiá꞉ner ronwahʼNí꞉io tsi nieʼhakahténieton nahkheró꞉ri.

² Ethòne Azariah ne roʼníha ne ne Hoshaiah tánon ne Johanan ne ne roʼníha ne Kareah tánon ne ronáhtsiake ne rontatʼkowáhnens ronnónhkwe wahonkwénhaʼse, “Shaʼnhowenhtánions. Ne Roiá꞉ner onhkwahNí꞉io iáh tetʼthiató꞉rion naskwahró꞉ri ne tó꞉sa Egypt nónhwe iahonshaʼhiakwahthatí꞉teron.

³ Baruch ne roʼníha ne ne Neriah ne wahianikonhráhta ne askwatʼkónhten, ne ne Babyloniaró꞉nons nahionkhiʼshaststenserahkénhni tánon enhatikwéhni nahionkhiróh꞉rio tó꞉ka ó꞉ni Babylonia nienhionkhihiaténhaʼwe.”

⁴ Káti rahtikwékon skátke ne Johanan ó꞉ni ne rahtisenhnowáhnens ne ronterí꞉ios ó꞉ni ne tsikʼónhka nonhkweshón꞉a nahonwahwénhnarahkwe ne Roiá꞉ner thóh ahothonwenhtsiáke ne Judah ahathiterónhthaʼke.

⁵ Ethóhʼne ne Johanan tánon ne ratisenhnowáhnens ne ronterí꞉ios kwáh tsi nihiákon iaʼteiakothaténron ne Judah Egypt niaʼhonhthatsiaténhaʼwe, ratiʼkwekonhátie kwáh ratikwékon tsi niháti ne tetʼthonénonh ne tsikʼnonhwéson nónhwe iatehonwanahrieniáʼtonʼkwe:

⁶ ne roʼnónhkwe, konhnónhkwe, ratiksahokónha, tánon ne ronnonhtí꞉io sakohiohokónhas ne tionatʼthonwísenhs. Kwáh onkwethaʼkwékon iaʼsahkotihiaténhaʼwe tsi nikáien ne Nebuzaradan ne ne rasenhnowáhnen raterí꞉ios, Gedaliah thóh ratiʼiátare nahshaʼkotenhnikonhráhren, thóh iakenihiátare ne Baruch.

⁷ Iáh tehonwahwenhnharáhkwen ne Roiá꞉ner tsi nihotróhri tánon káti Egypt niahónʼne kwáh tsi nióʼre ne tkanatowáhnen Tahpanhes.

⁸ Thóh nónhwe ne Roiá꞉ner wahakénhase,

⁹ “Hiahásko ne kanenhiowáhnenhs tánon onahwastó꞉kon sheʼhiatáta tsi kaʼnhethakwéntharon ne ohénton tsi iehiontawehiatákwah ne kakoráhsehra ionónhsohʼte kíʼ kénʼen kanatowáhnenh, tánon sehróhon ne Israerʼró꞉nons naʼieshaʼteróhrohke tsi ehnénhsehre.

¹⁰ Ethóhʼne sehró꞉ri tsi Í꞉ih, ne Watiá꞉ner Keshastsʼteserowáhnen, ne kheʼNí꞉io ne Israerʼró꞉nons, tsi kénʼen enthihiaténhaʼwe nakenhátsera ne Ronnonhtí꞉io Nebuchadnezzar ne ne Babylonia nónhwe thonnonhtí꞉io, kwáh kénʼen enhateniskwahnrahtseró꞉ten éhnheken tsi nónhwe nisehiatáten nonénhias, tánon thóh nónhwe nahtenhathakwáhriʼthe ne rahononhtiʼiótshera aʼthóhsehra.

¹¹ Éntre ne Nebuchadnezzar tánon enshakosénhni ne Egypt. Tsi nihiákon ne ne hionthaʼterahkwénhni ne kannhrahtharinhétshera ahiakórhiothe né kíʼ enhiakóhrhioʼthe, tsi nihiákon ne ne hionthaterahkwénhni naʼhionthateʼnhóton enhionthatenhotónki, tánon tsi nihiákon ne ne hionthaterahkwénhni naʼteriʼiosehráhke nónhwe nahonhníheʼie thóh kíʼ nónhwe nenhonhníheʼie.

¹² Enkhehiatenonhkwénhthaʼwe ne Egypt ahoniohókonhs ne rahotiʼnonhsatokenhtiʼkowátʼtshons, tánon ne Babylonia ronnonhtí꞉io kakʼnikáien tó꞉ka kén enhatʼtsáhaʼte ne rahotiʼhiatónhnis khés ne ienháhaʼwe. Tánon kwáh thenshaʼthotháro ne tsi ionhwenhtsiáien ne Egypt, tsi ní꞉ioht ne rahnónhne rahnikónhrahre ne tó꞉sa ahiontsinonhwáhrahne ne rahotserónhniat, tánon kwáh skénnenh tsi éhʼrenh énsrehte né nónhwe.

¹³ Kwáh enhariwáhthonʼthe ne kanenhʼhianórons ne kanenhʼhiótons ne Heliopolis ne ne Egypt nónhwe tánon enshakotenonhkwénhtaʼwe ne rahotinonhsatoʼkéntis ne Egypt rahohiatónhnis.”