Jeremiah 33 - Ohiatonhseratokénti

Shé꞉kon óia Ne Wahrahrátston Ne Askahnéktshera

¹ Tsi náhe shé꞉kon kenhóthonkwe ne tsi tehiehiatorehthákwah atenhénrahkon, ne Roiá꞉ner raoʼtheriwahnhotátshera shé꞉kon sontiathó꞉renʼne.

² Ne Roiá꞉ner, tsi rahónʼa rahonhontsíshon, rahónʼa rahontsiasehrónni tánon wahakwahtháko tsi waháien, wahatʼthárahse. Ne rahónʼa raosénna ne ne Roiá꞉ner wahénron,

³ “Taskenáhthon, tánon tenkonrihwahsehrákwahse; kwáh enkonriorhiánion ne ionerahkwahténions ó꞉ni ne iorihwahnerahkwahténions nètho ne kwáh iáh othènen tesehriwahientéri.

⁴ Í꞉i, ne Watiá꞉ner, ne kheNí꞉io ne Israerʼró꞉nons, káton ne tsi kanonhsóhtons ne Jerusalem ó꞉ni ne tsi ronónhsohthe ne ronnonhtí꞉io ne Judah nónhwe kwáh enkanonhsahróshionʼke ne enkarihónni tsi tehonwahtiʼnahthanáhnenhne tánon tsi iehonwahnhatsiaʼtóntion.

⁵ Ótiakes enhonterí꞉io ne Babyloniaró꞉nons, enhatínhane ne tsi kanonhsóhton ne rahotiʼierontahshón꞉as tsi nikáien ne khehiawénhthon naʼkenhakwahtsherákon tánon tsi niʼwahkatenhakwahwenhráhthiʼkwe. Kheʼhiaskwahténion kíʼ kénʼen kanáhthaien tsioríhwah tsi nikarihwáksen tsi nihonhatiéren ne ahonkwethashón꞉a.

⁶ Ók ensketiénthe kí꞉ken kanhatowáhnenh ó꞉ni nahonkwetaʼshón꞉a tánon ensehkheiéritʼtse ne rahonahtakaritétshera. Kwáh enkhenhathonhase iawehtowáhnenh ne skénnenh ó꞉ni enhioriwí꞉ioʼke.

⁷ Kwáh enkhehiónnenh ne Judah ó꞉ni ne Israerʼró꞉nons nahothihianerásten, tánon kwáh ensehkhekwahthákwahse tsi nitsiotónʼne.

⁸ Kwáh ensheʼkherahkéwahse tsi nòkwah ne karihwáhneren nètho tsi nihothiníkonh tsi nòkwah Í꞉i, tánon ensheʼkhenikónhrenseh ne rahotiʼriwahneraháktshera ó꞉ni tsi naʼtehothirihó꞉ron.

⁹ Tánon kí꞉ken kanatowáhnenh Jerusalem nakonháke né enkonhwahiátʼtseke atonnharáhtshera, kahnonhwehrahtóntshera ó꞉ni ne kahiatanerahkwáhtshera rahotihénton rahtikwékon nonhkweshón꞉a ne tsi ionwenhtsiáte kwáh rohnónha enhónronʼke akwékon ne ioiáneres tsi nikheʼhiatiérahse; káti kwáh enhonhateroniénten ó꞉ni enhotiʼhiatísonkwe tsioríwah akwékon tsi nihiohiáneres ó꞉ni akwékon ne kahkwahséhtseras tekhehiatʼkahwénhni.”

¹⁰ Ne Roiá꞉ner wahénron, “Nonhkweshón꞉a ionthónnions ne kénʼen watenáhthaien kwáh thóh ní꞉ioht tsi ní꞉ioht ne iahonwenhtsiaténhake, iáh tehiahonkwéthaien iáh ó꞉ni ne katʼtshénenh nahienáhkerehke. Tánon thaʼthihiérits; tsi kanhatheiénthons ne Judah ó꞉ni ne Jerusalem onhatóskonh íken; iáh nonhkweshón꞉a iáh ó꞉ni ne katʼtshénenhs tehatiʼnáhkere né nónhwe. Ók kí꞉ken nikanhatótens shé꞉kon ki entsisehwáhronhke

¹¹ tsi nihiotʼtsaróhkwen nahthonnharáhtshera ó꞉ni nahtsennonhnhátshera ó꞉ni tsi nihiakotʼtsennónhni tsi nihioronkwénsthaʼre ne iakohthénnioʼthe. Ensehwahthónthene nonhkweshón꞉a tehiarorihwáhkwen tsi nenhtiéhaʼwe niaʼtekonhsónhas ne kanonhwehrahtóntshera nakenonhshaʼthokentíhke; kwáh enhonníron, ‘Thetsisehwahnonhwehráthon ne Roiá꞉ner Roshastsʼtenserowáhnen, tsioríhwa tsi nihohiánereh ó꞉ni ne rahononhronkwáhtshera tsi nénhwe tsi enkáhthake.’ Kwáh enstiánerasthe kíʼ kénʼen ionwénhtsiaien ne ne kwáh tsi nitsiothónʼne. Í꞉i, ne Watiá꞉ner wakatáti.”

¹² Ne Roiá꞉ner Roshastsʼtenserowáhnenh ráton, “Ne kénʼen ionwénhtsiaien kwáh thóh ní꞉ioht tsi ní꞉ioht ne iahonwenhtsaténhake tánon tsi nónhwe iáh ónhka nonhkweshón꞉a ó꞉ni ne katʼtshénenh tehatináhkere, kwáh káti shé꞉kon énska iensehwáhtheratsʼte enskahenthaiénthake nahkonhwahtiʼterontákwahke ne katʼtshénenhs tsi nónhwe ne teiotinahkarontónha sahkotinónhʼne nienshakotiʼhiaténhaʼwe ne teiotinahkarontónʼa.

¹³ Ne kanahthakónhsons tsi iononhtharónnion ne kahetháke, ne tsi iononhthaientáhons, tánon nientiéne nokwáhti ne Judah, ne ahonthonwenhtsáke ne Benjamin, ne tsi kanahthaiéntons akthóntsie ne Jerusalem, ó꞉ni ne kanahthakónhsons ne Judah, ne teiotinakarontónʼa sahkothinónhʼne shé꞉kon énska iesehwáhteratsʼte enskonwahnhá꞉sehte ne rahotiʼtsenenhókonhs. Í꞉i, ne Watiá꞉ner, wakatáti.”

¹⁴ Ne Roiá꞉ner wahénron, “Táwe ne kawistáheks nónenh ne enkénhaʼne tsi niʼkhehiarahratsʼténni nonhkweshón꞉a ne Israeronónhke ó꞉ni ne Judah nónhwe.

¹⁵ Nén nenhkaháwiʼke enhihiatharáhko ne ronnonhtí꞉io ne rohiánereh ne ne Táwit nónhwe nithotʼwahtsiríhnonh. Nètho ronnonhtí꞉io ne enhohióten ne tkarihwahiéri ó꞉ni ne kaiáneren ne tsi ionwenhtsiáte.

¹⁶ Nonhkweshón꞉a ne Judah nónhwe ó꞉ni ne Jerusalem kwáh enshatiʼniákenʼne tánon kwáh skénnenh tsi enshathináhkerehke. Ne kanahthowáhnenh ne enkonhwahnahtónkwahke ne ‘Roiá꞉ner Onkwahiathaʼkeʼnhátshera.’

¹⁷ Í꞉i, ne Watiá꞉ner, wahkaráhratsʼthe tsi kwáh tiókonhte tsi ne ne Táwit rahwahtsirahtátie enhatenonhtiʼióstheʼke ne Israeronónhke

¹⁸ tánon kwáh tiókonhte tsi enhonʼnonhkwethaiénthaʼke ne rotikháres ne ne Levi raothitahráhkonh nonhnenhthonʼnéhthaʼke nahiontiótenʼse tánon aterennhaienthaʼtseráhkon tsi akonwahnhatsatátʼtsahaʼte ne katʼtshénenhs, tahontenónhwehron nonátsias, ó꞉ni ne kariwiʼiosehokónhas.”

¹⁹ Ne Roiá꞉ner wahakénhase,

²⁰ “Watianerensehríson tsi nòkwah nenhtsiékheʼne ó꞉ni nokarasnéha, tsi kwáh tiókonhte eh nenhiawénhsehke tsi nihioterihwíson; tánon nètho wahkerihwíson tsi kwáh iáh nonhwénhton thaʼtahonsahkaiákon.

²¹ Kwáh nònhne ne sáka tsi wahkeriwíson nètho akenhátsera Táwit tsi kwáh tiókonhte tsi enhawahtsirahtátie nahontenonhthiʼiósthaʼke, tánon ó꞉ni kheʼriwisenhénni ne rothikháres ne ne rahotiʼtáhrahkon ne Levi tsi kwáh tiókonhte tsi enhiontioténseheke; tánon nètho wakeriwíson tsi iáh nonhwénhton tathahonsahkáiakon.

²² Kwáh enkhetiokowáhnahthe tsi nienhatwahtsiríʼne ne akenhátshera Táwit ó꞉ni enkheʼtiokowahnáhten ne rothikháres ne rahotiʼtáhrahkon ne Levi, ne ne kwáh thóh nawenhtó꞉rehke nahonwahnháshete tsi ní꞉ioht ne tsi iotsistokwahrónnion ne tsi karonhiáte tó꞉ka ó꞉ni tsi níkonh kanesahronkwáhien natsatʼtóntie.”

²³ Ne Roiá꞉ner wahakénhaʼse,

²⁴ “Wasátʼthoke kén tsi nihiontónnions nonhkweʼsónha ne tsi akhekenronníhon ne Israel ó꞉ni ne Judah, né tekawahtsírahke khehiatharáhkwen? Tánon káti ronwahtísons tsi ní꞉ioht tsi tehonwahtiʼkánereh nakonhkwetaʼshón꞉a tánon iáh ónenh thóh tèhiot tsi teshonwahtiʼkenhénhions nahotiʼtiokwahiénthaʼke.

²⁵ Ók í꞉ih, ne Watiá꞉ner, íkhaʼwe ne wahkerihwíson nenhtiekhenéhka ó꞉ni nahsontenhnékha, tánon wahtianerensehríson né tioniarótharon nonwénhtsia ó꞉ni ne tsi karonhiáte.

²⁶ Tánon kwáh tsi nihioriwí꞉io tsi kíʼ ehʼniwahtiéren, káti kwáh iáh nonhwénhton tsiaʼkhehiatewénhtheʼte tsi nienhatwahtsiríʼne ne Jacob ó꞉ni ne akhenhátshera Táwit raowáhtsireh. Kwáh sahiáta enhihiatharáhko ne Táwit raowáhtsireh nahshaʼkotkórasʼthe ne Abraham raowáhtsireh, ó꞉ni ne Isaac, tánon ne Jacob. Kwáh enkheténrahke naʼkonhkwetaʼshón꞉a tánon enkhehiónnien ne shé꞉kon ahonsahotiʼhianerásten.”