Jeremiah 28 - Ohiatonhseratokénti

Jeremiah Tánon Ne Rotokénʼse Hananiah

¹ Ne sahoséhra, ne ne wískʼáhton siwenhníthaʼre ne kaieríhaton sihiosehratátsie nètho Zedekiah sihononhtí꞉io, Hananiah ne roʼníha ne ne Azzur, rotokénse ne ne tsi kanátaien ne Gibeon nónhwe nihanákere, Ononhsatokentiʼkowáhne nónhwe natiakenitháren. Rahotiʼhénton ne rotikháres ó꞉ni nonhkwesónha wahakró꞉ri

² nètho ne Roiá꞉ner Roshastsʼtenserowáhnenh, ne shakoʼNí꞉io ne Israerʼró꞉nons, wahénron: “Watʼtiáke ne raoshastsʼténsera ne ronnonhtí꞉io ne Babylonia nónhwe.

³ Nohénton ne tehiosehráke tenthékhaʼwe ne kénʼen nónhwe niwahtenátaien akwékon ne Ononhsatokentiʼkówa ahotsiokowáhtsheras ne ne ronnonhtí꞉io Nebuchadnezzar iehóha ne Babylonia.

⁴ Kwáh ó꞉ni tenthihiaténhaʼwe ne ronnonhtí꞉io ne Judah, Jehoiachin ne roʼníha ne ne Jehoiakim, enhatiʼkwekonhátie nonhkweshón꞉a ne Judah tsi nikáien ne rohnahnakeráhkwen Babylonia niehonénon. Hén, tentiáke ne raoshastsʼténsera ne ronnonhtí꞉io ne Babylonia. Í꞉i, ne Watiá꞉ner, wakatáti.”

⁵ Ethóhʼne rahotihénton ne rothikháres ó꞉ni onhkwetahkwékon ne thóh iéthakwe ne Ononhsatokentiʼkówahne, Wahiʼiénhase ne Hananiah,

⁶ “Ioneráhkwaht! Aiáwens ne Roiá꞉ner kwáh kí꞉ken éhtho nenháiereh! Kwáh kaskáneks tsi niesharihwáhken kwáh orihwí꞉io aónton tánon tahonthaháhaʼwe akwékon ne Babylonia nón꞉we ne Ononhsatokentiʼkówa ahotsiokowáhtseras ó꞉ni onhkwetahkwékon ne iehonwahtihiaténha nahonwatiʼnhóton.

⁷ Ók sewathahónsahtat tsi nahó꞉ten enkwahró꞉ri ó꞉ni nonhkweshón꞉a.

⁸ Ne rotiʼtokénse tsi nihonahtatíhon ne wahónnise tsi náhe tkènʼne, ne nohénton ní꞉i shiahontiáthiʼwe ó꞉ni níse, iewákʼkhe nètho ateriʼiósehra, athonkharhiákon, ó꞉ni ne kannrahthariʼnhétshera tsi énteʼwe ne iaʼkotiokowáhnenh enhiakohiató꞉renʼne ó꞉ni ne kashástsʼtes kanonhtiʼiótsheras.

⁹ Ók kíʼ ne rotokénse ne ieióhe ne skénnen nék enkahkwéni nahonwahiénterehne tsi rotokénhse ne tsi kwáh Roiá꞉ner oriwihiohónwe thoteniéton nónenh nètho rotokénhse nahó꞉ten iehóhe thóh naháwenhne.”

¹⁰ Ethóhʼne ne Hananiah waharáhko ne atientaniákstha ne keniaráhke, wahasahtharónni tsi natháriʼthe,

¹¹ tánon rahothihénton ronhkweshón꞉a tsi nahenrónnion, “Ne Roiá꞉ner ráwenh thóh kíʼ ní꞉ioht tsi tenhárihthe ne atientaniákstha nètho ronnonhtí꞉io Nebuchadnezzar róhere ne ieniarahkéson nonhkweshón꞉a; tánon thóh kíʼ kén nenháiere nohénton ne iakáhewe ne tehiosehráhke.” Ethóhʼne éhren sáhkeʼthe.

¹² Kwáh kén nikaríwes onahkènke ne Roiá꞉ner wahakró꞉ri

¹³ iéhke tánon ahiró꞉ri ne Hananiah: “Ne Roiá꞉ner ráwenh nonhtiérenk enskwéni ne tàsrihthe ne óienthe watientaniákstha, ók kíʼ ne tenshaʼténiaʼte ne karísthatsi atientaniákstha.

¹⁴ Ne Roiá꞉ner Roshaststenserowánenh, né shakoʼNí꞉io ne Israerʼró꞉nons, ráwenh tsi karísthatsi atientaniákstha enshakótsten nonhkweshón꞉a tánon ronnonhtí꞉io Nebuchadnezzar enhonwahiótenseh ne Babylonia nónhwe. Ne Roiá꞉ner ráwenh iekahníhare ne konthiʼtshénnens tsi enhonwahiótenseh ne Nebuchadnezzar.”

¹⁵ Ethóhʼne wahiró꞉ri kí꞉ken ne Hananiah, tánon iahátiesʼte, “Satahónsahtat, Hananiah! Ne Roiá꞉ner iáh tiehiató꞉rion, tánon wasehʼhiónnien kí꞉ken onhkweshón꞉a nahonthaiakéthaʼkwe noʼnhówenh.

¹⁶ Tánon káti ne Roiá꞉ner ráton tsi ahéren enhiaiatenháwiʼthe. Nohénton ne iahonthosehró꞉ten kíʼ iosehráhthe enshíheʼie tsioríhwa tsi waʼtshióʼtatʼtshe ne Roiá꞉ner.”

¹⁷ Tánon káti ne Hananiah tsatákhaton siʼwenníthare ne ne sahósehra wahrénheʼie.