Jeremiah 27 - Ohiatonhseratokénti

Jeremiah Atientaniáktha Waʼhatatniasohtároʼke

¹ Iáh teiahonniséhon ne Josiah ne roʼníha ne ne Zedekiah wahononhtí꞉ioʼne ne Judah nónhwe, ne Roiá꞉ner wahakró꞉ri

² iontientaniákstha akahthathónnien onahsónhas áhkatsʼte tánon óiente tetrenhwáhnion tánon keniahráhke íkren.

³ Ethóhʼne ne Roiá꞉ner wahakró꞉ri ne iaʼkhehiateriwahniéten ne rontinonhtí꞉ios ne Edom, Moab, Ammon, Tyre, ó꞉ni ne Sidon ne iehatiriwénhaf ne sahkonatátiaʼse tsi nikáien ne Jerusalem thóh nènonh ne nahonwáhken ne ronnonhtí꞉io Zedekiah.

⁴ Ne Roiá꞉ner Roshastsʼtenseroʼwáhnen, ne ne shakoʼNí꞉io ne Israerʼró꞉nons, wahatró꞉ri nakhènahne nahonwahtiʼró꞉ri ne rontiʼnonhtí꞉ios nètho Roiá꞉ner tsi ráwenh:

⁵ “Né nakeshastsʼténsera ó꞉ni tsi nikeshástsʼte né wakátston tsi wahkonhontiónni, khehiatísons nonhkweshón꞉a, tánon konhtiʼkwékon ne katʼtshénens ne nonhwenhtsiáke nónhwe nikonhnónnhe; tánon kwáh tsík ónhka entekhéhion tsi nenhtkheráhko.

⁶ Í꞉i ne khetéhron kíʼ nonhkweshón꞉a thóh raoʼshastsʼtenserákon nakenhátshera, Ronnonhtiio Nebuchadnezzar ne ne Babylonia nónhwe, iekaníhare khehionniénni ne kontírhios ahonwahhiótenseh.

⁷ Kwáh onhkwetahkwékon tsi enhonwahiótenhseh, tánon kwáh tenhonwahriwásnieseh ne roiénha ó꞉ni ne sahkoterehokónha tsi nióre ienkáhewe ne kwáh rahónha rahonkwetaʼshón꞉a enhonwahtiʼsénni. Ethóhʼne ne rahonkwetaʼshón꞉a né enshonwahtiʼhiótense ne kwáh thatiʼshástsʼtes onhkweshón꞉a ó꞉ni ne ratiʼshástsʼtes rohtinonhtí꞉ios.

⁸ “Ók ónhka nonhkweshón꞉a ó꞉ni ne kanonhtiʼiótsheras ne iáh thaʼhiontiénawasʼthe ne raohianerénsehra, ethóhʼne kíʼ ateriʼiosehráke tsi enkheréwahthe nètho onhkweshón꞉a, athonkarhiákon, ó꞉ni kanrahtharinhétshera tsi nióre iehiriwáhwi ne Nebuchadnezzar kwáh oriwahkwékon enhariwáhthonte.

⁹ Tó꞉sa ietʼtsihiathahónsahtat ne rotitokénseh tó꞉ka nihóni tsi nikáien ne rónton enhatiʼkwéni ne iahatiʼriwáhken tsi niaʼhawenonhátie, ó꞉ni naʼtettshénsehras tó꞉ka nihóni iahatíʼnonhke ne iakawenhéion raotiʼnikónhras tó꞉ka nihóni ne atenhennahráhtshera. Kwáh ratikwékon ietʼtsiró꞉ris ne tó꞉sa thaʼtsisehwahnónhtons ne ronnonhtí꞉io ne Babylonia.

¹⁰ Ietʼtsinikonhrahténnis tánon ne enhatirihónni ne ahínonʼnióre hiahietsihiatenháwiʼthe ne sewahnakerahserákon. Kwáh éhren enkwahiatenháwiʼthe, tánon kwáh enhietʼtsiʼhiáthonthe.

¹¹ Ók tó꞉ka ónhka nonhkweshón꞉a ahiontsakwahrísi rahonháke ne ronnonhtí꞉io ne Babylonia tánon ahonwahiótenhse, thóh né ki enhiríhon ne rahonhontsáke ahenterónthake, nahatsientʼthoserónni tánon thóh nónhwe nahenterónthaʼke. Í꞉i, ne Watiá꞉ner, wakatáti.”

¹² Wakíron kwáh ne sáhka ne ronnonhtí꞉io Zedekiah ne Judah nónhwe, “Sahtiaʼkwahrísi rahonháke ne ronnonhtí꞉io ne Babylonia. Tióhtens ó꞉ni ne rahonkwetaʼshón꞉a, tánon enshón꞉nheke.

¹³ Ónh niʼiohtsiéren níse tánon ne shonkwetaʼshón꞉a athonkarhiákon tánon kannrahtarinhétshera ahisehwarhióthe? Tsi nahó꞉ten ráwenh ne Roiá꞉ner thóh kíʼ nenhiakohiáthawenh ne iáh tahiontsiakwahrísi rahonháke ne ronnonhtí꞉io ne Babylonia.

¹⁴ Tó꞉sa ietʼtsihiathahónsahtat ne rotitokénse ne ietʼtsiró꞉ris ne tó꞉sa asehwatsakwahrísi ne rahonháke. Ietʼtsinikonhrahténnis.

¹⁵ Rahonhatsíwah ne Roiá꞉ner ráwenh tsi iáh rahónha tetheshaʼkotheniéthon tánon raoʼsénnakon tsi iehtsiʼhianowenhtaniónnis. Tánon káti kwáh entsiʼsehwahiatínekenʼwe, tánon enietʼtsinonhwahrhiakónnion, i꞉se tánon ne rotitokénhse tsi niʼhietsihianowenhtaniónnis.”

¹⁶ Ethóhʼne wakheró꞉ri ne rotikháres ó꞉ni ne onhkweshón꞉a nètho Roiá꞉ner tsi ráwenh: “Tó꞉sa ietʼtsihiathahónshaʼtat thíken rotitokénse tsi nihónton ne Ononhsatokénti ahotsokowáhtshera kwáh iostó꞉re tetkaháseronke ne Babylonia nónhwe. Onhówen ietʼtsiró꞉ris.

¹⁷ Tó꞉sa ieʼtsihiatahónshaʼtat! Sewahtiakwahrísi rahonháke ne ronnonhtí꞉io ne Babylonia tánon entiónnheke! Onh nonhtiéren kí kénʼen kanahtowáhnenh ne ahionthonhióthake ne iohriwenhthásehron?

¹⁸ Tó꞉ka shí꞉ken kwáh tó꞉kenske ahothitokenséhaʼke ó꞉ni tó꞉ka ahatíhawahke naʼkateriwahnhotátshera, ietʼtsiró꞉ri hionkeriwahnónhtons, í꞉i ne Watiá꞉ner Keshastsʼtenserowáhnen, iáh tatkheríhon ne natʼtsokowáhtsera ne iothaténron ne Ononhsatokentikówahne ó꞉ni ne tsi ronónhshoʼthe ne ronnonhtí꞉io ne iakáhake ne Babylonia.” (

^19-20 Nónen ne ronnonhtí꞉io Nebuchadnezzar Babylonia niaháre ne ronnonhtí꞉io ne Judah, Jehoiachin ne roʼníha ne ne Jehoiakim, tánon ne ronsáhriʼne ne Judah nónhwe ó꞉ni ne Jerusalem nónhwe, iáh tshieʼhóha ne kanahwahaʼtótons, ne tehiowístaron otsínekwar karísthatsi watnekahráhkwah, ne kasehresónhas, tánon ne otiakhésons ne Ononhsatokentiʼkówahne ahotsiokowáhtsheras.)

²¹ “Sewathahónsatat tsi nahó꞉ten ne Í꞉i, ne Watiá꞉ner, ne kheʼNí꞉io ne Israerʼró꞉nons, káton tsi nòkwah ne atsokowáhtseras ne shé꞉kon iothaténron ne Ononhsatokentiʼkówahne ó꞉ni ne tsi ronónhshoʼte ne ronnonhtí꞉io ne Jerusalem nónhwe:

²² Babylonia nienhonwahtiʼhiaténhaʼwe tánon éhtho nónhwe ienhatiʼterónthake tsi nióre tenthekeriwásnieʼse. Ethóne tenthekhehiaténhaʼwe tánon ensehkhekwahtákwahse ne kénʼen nónhwe niwahtenáhtaien. Í꞉i, ne Watiá꞉ner, wakatáti.”