Jeremiah 24 - Ohiatonhseratokénti

Tewahtheráhke Ne Wisonkówa

¹ Ne Roiá꞉ner tewahtheráhke ne wisonkówa wahakenathónhaʼse thóh wahtherahkéron ohénton ne Ononsatokentikówahne. (Ne kí꞉ken nónenh ne ronnonhtí꞉io Nebuchadnezzar ne ne Babylonia nónwe ahèren rohiaʼtenhawíton ne Jehoiakim roiénha, ne ne ronnonhtí꞉io Jehoiachin ne ne Judah nónwe, ne ne Jerusalem nónhwe nihanhótonkwe tánon Babylonia nónwe niaʼhonwahiaténhaʼwe skátne ne ohénton iehonnèton ne Judah, ó꞉ni ne ratiswenhkarahkétas ó꞉ni ne ratiristhakeró꞉nonhs.)

² Ne tiotsierénton áthereh né ne kwáh wahí꞉ios ne wisonkówahs wahʼhihtárion, ne ne tiothihénton iohiaríhon; nó꞉ia áhthereh ne ne wahʼhihtárion ne wahʼhiáksens, sóhtsi wahhiáksen nahiónhiake,

³ Ethóhʼne ne Roiá꞉ner wahakénhaʼse, “Jeremiah, nahó꞉ten satkáthos?” Wakʼkeriwahseráko, “Wisonkówa. Ne wahí꞉ios kwáh í꞉ken tsi wahí꞉ios, tánon ne wahiáksens kwáh íken tsi wahiáksens, sóhtsi wahiáksen nahiónhiaʼke.”

⁴ Káti ne Roiá꞉ner wahakénhase,

⁵ “Í꞉i, ne Watiá꞉ner, ne Israerʼró꞉nons kheʼNí꞉io, tetiató꞉ret nètho nonhkweʼshón꞉a ne Babylonia ieʼkhehiatheniéthon ne thesontiérens tsi ní꞉ioht kí꞉ken wahí꞉ios, tánon kwáh kanoronkwahtsherákon tsi enthekhehiatewehienthónhaʼse.

⁶ Kwáh enkheʼhiatennikonhrháren tánon thentekhehiaténhaʼwe ne kén nónhwe nihiohontsáien. Ensheʼkhekétsko tánon iáh tahonshaʼkhehiatiéskwen; ensehkhétheron tánon iáh tahthahonshaʼkehiáthaʼkwe.

⁷ Entheʼkhéhion naskanéktshera nahonatheriéntahraʼne tsi Í꞉i ne Watiá꞉ner. Ethóhʼne kíʼ ʼI꞉i ne akonhkwetahshón꞉a enhónton, tánon Í꞉i ne raothiʼNí꞉io enkénhake, tioríhwa tsi kwáh ronnerhiashaʼkwékon tsi Í꞉i nòkwah nahtentʼthónne.

⁸ “Ók ne ronnonhtí꞉io Zedekiah ne Judah nónhwe, tánon ne rontkorástha ne tehonwatsiatháton, tánon ne ronatsiaʼkhésons ne Jerusalem nónhwe tsi niháti ne kén nónhwe nihatiʼterónthaʼkwe tánon tsi niháti ne Egypt nónhwe thatinahkerénion—Í꞉i, ne Watiá꞉ner, kwáh rahtikwékon éhtho nenhʼkheiérahse tsi ní꞉ioht thíken wisonkówah sóhtsi hiohiátkens nahiónhiaʼke.

⁹ Thóh nióre tsi enkheiénhaʼse ne kariwaiesáhtshera kwáh onhkwetaʼkwékon ne tsi ionwenhtsiáte kwáh enhiakoterónsehke. Nonhkweshón꞉a tenhonwahthiʼierónhaʼke, ohnonhwahroʼríhta enhonwenhnónhniaʼte, enhonwahtisterísthake, tánon ne raoʼthisénnas ne enhiontewenhnaksahthakwaʼniónsehke ne kwáh tsík nonhwésons iaʼtenkhehiaréniaʼte.

¹⁰ Éntien nateriʼiósehra, athonkarhiákon, tánon kannratharinhétshera ne roʼnónhake tsi nióre ne kwáh iáh ónhka tiaʼthahonsahiakothaténronhke ne tsi ionwenhtsiáte ne tetkhehiáwi ó꞉ni ne shaʼkotitsotʼthonkonhkénʼen.”