Jeremiah 23 - Ohiatonhseratokénti

Naʼrahrátʼtshera Tsi Niaʼhawenhnonhátie

¹ Tsi naʼtenhiotenonhianitónhake ne Roiá꞉ner rahorewahthátshera roʼnónhake ne ratikóras rohnónha shaʼkonathóntha naʼkonkwetaʼshón꞉a ó꞉ni teshaʼkonarehniátha. Ne teshontiérens ne sahkotinónhna ne teiotinakarontónha tánon sahkonathóntha nakitsenenhókonhs!

² Ne kíʼ tsi nahó꞉ten ne Roiá꞉ner, ne shaʼkoʼNí꞉io ne Israerʼró꞉nons, ráton tsi nòkwah ne ratikóras ne tsi rohnónha kaientákwen nashaʼkonatennikonhráhren ne rahonkwetashón꞉a: “Iáh teietʼtsiʼhiatennikonhraráhton nakonkwetaʼshón꞉a; wahtsishiʼhiaréniaʼte tánon wahitsihiatékwahte. Ónenh kíʼ enkwahréwahte tsi nihioriwáhtsani tsi ne sehwáhiereh.

³ Ensheʼkhehiataróhroʼke nakonhkwetaʼshón꞉a tsi nonhwésons niʼkanakerahsehrakérons iaʼtekhehiareʼniáton, tánon tenthekheʼhiaténhaʼwe tsi nónhwe nihonahnakeráhton. Wéso enhotiwirahiénthaʼne ó꞉ni enhonatiokowáhna.

⁴ Enkheʼhiatarahkwenʼháton ne ratikóras nashaʼkonatennikonhráren. Naʼkonkwetashón꞉a iáh ónenh tahonshaʼhotiterónsehke iáh ó꞉ni tahontahonátonnhe, tánon iáh shé꞉kon tahonsatkheréwahʼte. Tánon iáh ne shahiáta tahotiathaʼtónhake. Í꞉i, ne Watiá꞉ner, wakatáti.”

⁵ Ne Roiá꞉ner ráton, “Táwe nekawistáheks nónen enhihiaʼtaráko ahononhtí꞉ioʼke ne tronkwetaʼiéri tsi nitotwatsirínonh ne Táwit. Nètho ronnonhtí꞉io kwáh kariwaʼkwahrishonʼtsherákon tsi enhashá꞉riʼne ó꞉ni thóhʼnenháiere ne tkariwaiéri ó꞉ni ne kaiáneren ne ne kwáh ohontsakwékon.

⁶ Ne nónen enhonontí꞉ioʼke, nonhkweshón꞉a ne Judah kwáh enshontatewenhní꞉ioʼke, tánon nonhkweshón꞉a ne Israerʼró꞉nons skénnon tsi enshonnónhnheke. Ne enhonwanahtónkwahke ‘Ne Roiá꞉ner nonhkwahiathaʼkenhátshera.’

⁷ “Táwe ne tsi kawistáheks,” ráton ne Roiá꞉ner, “nónen nonhkweshón꞉a iáh ónen tahonshaʼhionkeriwahníratʼtse tsi í꞉i ne konnhehónwe Ní꞉io tsi i꞉i teʼtetkhehiatinekénʼen nonhkweshón꞉a ne Israel ne tsi tsionhontsáien ne Egypt.

⁸ Khék khók, akonháke enhatiʼriwahníraʼte tsi konnhehónwe Ní꞉io tsi tetetkhehiaténʼa nonhkweshón꞉a ne Israerʼró꞉nons ne othorékes tionhontsaiénton ó꞉ni teʼtetkhehiaténʼa natʼthesonnonhwéson tsiohontsaiéntons tsi nonhwéson hiaʼtekhehiareniáthonʼne. Ethóhʼne kwáh rahononhontsákes nónhwe nenhshaʼthináhkerehke.”

Ne Jeremiah Rahoterihwaʼnhotátshera Tsi Nòkwah Ne Rotiʼtokénse

⁹ Tewahkerhiashaʼríhon, tánon watsiaʼtisónkwah. Roiá꞉ner waharihónni, ne takarihónniaʼthe ne raowénhnaʼtokentísons, thóh niʼwahtiátawenhs tsi ní꞉ioht ne rónkwe ronnonhwahrahtónʼon, ne ne ónhka sóhtsi wéso otsítsa ronekíren.

¹⁰ Ne tsi ionhwenhtsáte titkáhereh nonhkweshón꞉a ne iáh tehiakoriwahtóken rahonháke ne Roiá꞉ner; kariwáksen tsi nihononhnhétie tánon ó꞉ia ní꞉ioht tsi ronatstonhátie ne rahotiʼshastsʼténseras. Ne karihónnis tsi shaʼkorewéhtha ne Roiá꞉ner nohóntsa wahkahiésah tánon ne tsi konwahtiʼterontákwah ne katʼtshénenh onstátʼthen ne kahentáhke.

¹¹ Ne Roiá꞉ner ráton, “Ne rothitó꞉kense ó꞉ni ne rotikháres kwáh iáh tehothiniʼioseráhien; Iekènʼa kheʼharáhse kariwáksen tsi nihóntiera ne ononhsatokentiʼkówaʼne.

¹² Tsi enhonthahíta kwáh tenhiahotsiskwáhthonke ó꞉ni tentiokaráhsehke; Thenkhehniotáhko tánon enhatihiatiéʼnènhne. Enthékhawe ne karihwahiesáhtsera ne rononháke; ne rahonatrewahtátshera tsi tawéʼse ne iakáhewe. Í꞉i, ne Watiá꞉ner, wakatáti.

¹³ Wakatkáthon ne rotitó꞉kense rahotiʼrihwaneraháktshera ne Samaria nónhwe: Baal raosénnakon tsi ronahthatíhon tánon wahonwanatʼthaharáhkwaʼthe nakonhkwetaʼshón꞉a.

¹⁴ Ók sénha wahétken wahkatkáton ne Jerusalem nónhwe tsi nihothiʼiéren ne rotitokénse: wahontenakwaʼiésaʼte tánon wahonnonhwenhtánion; wahshaʼkothiʼiénawahse nonhkweshón꞉a ne wahétken tsi nahatiʼieráhnion. Ne ne tó꞉sa ónhka ahióntkaʼwe tsi nihontiérah ne kariwahétken. Nakonháke kwáh rahtikwékon tsi ronnonhkweʼtahétken tsi ní꞉ioht nonhkweshón꞉a ne Sodom tánon ne Gomorrah.

¹⁵ “Ehthóh káti, éhtho kíʼ ní꞉ioht tsi nahó꞉ten ní꞉i, ne Watiá꞉ner Keshastsʼtenseroʼwáhnen, kheienni ne rotitokénhse ne Jerusalem nónhwe: Ne entekhéhion ne tehiohontahiótsis kaientʼthótsera nahónneke tánon kanonhkwahtsheʼráksen ne iakorhiótha ahatinekírah, tsioríhwah tsi tehonahrehniátons ne iáh thènen tahkaiénthake ne Ní꞉io ne tsi ionwenhtsáte.”

¹⁶ Ne Roiá꞉ner Roshastsʼtenserowáhnen wahshaʼkawénhase ne Jerusalemró꞉nons, “Tó꞉sa sewatahónshatat tsi nihónton ne rotitokénhse; né thitʼthatiráhtha ne tionháke ne iáh othènen tehioríhonte kararáh꞉tshera. Né ietʼtsirhorhiátha tsi nihonahnonhthonniónhon ók iáh nenhné tsi nahó꞉ten wáhken.

¹⁷ Tsi nòkwah ne onhkweshón꞉a ne iáh tehonatʼthontháton ahonaʼthahonsahtátonʼke tsi nahó꞉ten wáhken, kwáh nék khók rónton kwáh akwékon tsienhioianeréhaʼke ne rahotiʼrihwáhke. Tánon onhkwetaʼkwékon tieshaʼkotiró꞉ris né iakononhtsistahníron nètho kariwahiesáhtshera tsi iáh nonhwénhton kén tsiahiakóhiereh.”

¹⁸ Wakíron, “Kwáh iáh ónhka kí꞉ken rotitokénhse iáh nonhwénhton tehonahterienthaʼráhon ne Roiá꞉ner tsi nihariwahséhtha ne rahononhthonnióntsheras. Kwáh iáh ónhka tsi niháti nonhwénhton tehonatʼthontéhon tó꞉ka ó꞉ni nahotiʼnikonhraienhtáhon ne raoteriwahʼnhotátshera, iáh ó꞉ni nonhwénhton tehonahʼthahonsahtáton tó꞉ka ó꞉ni hahonahʼtenikonhrahráthonke tsi nahó꞉ten ráwen.

¹⁹ Ne raonahkwáhtshera tekawerahthaséhtha, tehiowerahnónhiani tenʼkawerahtáseh raoʼtinonhtsisthakenhiátʼtions ne rononhkwetaʼhétkens,

²⁰ tánon iáh tahthakáthaʼne tsík akwékon éhtho nenháiere tsi nihoteʼnikonhrónni. Tsi nienwatennisehríheʼwe ne rahonkwetahshón꞉a kwáh enwehnéhake tsi enhotiʼnikonhraiéntaʼne.”

²¹ Ne Roiá꞉ner wahénron, “Iáh í꞉i tiekhehiatheniéton kí꞉ken rotiʼtokénhse, ók iawerohʼhátien tsík sénhak iahónne. Iáh othènen theʼtekhehiáwi naʼteriwahnhotátshera, ók shé꞉konʼkiʼ aksénnakon tsi wahontáti.

²² Tó꞉ka ahonaʼterientáhrahke ne ioterihwahséhton naʼkanonhthonnióntsheras, ethónne kíʼ ahiotónhon nahonatróh꞉rihke naʼkateriwahnhotátshera tsi nòkwah nakonhkwetaʼshón꞉a tánon ahonwahnonhniénniʼke nahonahtsiaʼkwahríshion꞉ke tsi niʼkariwahétken tsi nihononhnhétieʼneh tánon ne kariwáksen tsi nihontiérahkwe.

²³ “Í꞉i ne Ní꞉io kwáh tsikʼnonhwéshon nónhwe níkes tánon iáh ók sehwatenáhtha nónhwe thakénhake.

²⁴ Iáh ónhka thaʼhiekwéni nahionkahthaséhten. Shaʼteriéntharakki ne karonhiáke tsík nonhwésons nónhwe níkes ó꞉ni nonhwenhtsiákes?

²⁵ Wakateriéntahre thíken rotitokénhse tsi nahoténsons rónenh tsi ronahthatíhon noʼnhówenh naksénnakon ó꞉ni rónton rahonatetʼtienseráhkonhs tekhehiáwi naʼkaterihwahnhotátsheras.

²⁶ Thóh nikaríhwes shé꞉kon kí꞉ken rotitokénhse nashakonatʼthaharáhkwahthe nonhkweshón꞉a ne tsi nihonatkaríson noʼnhówenh?

²⁷ Rónnhereh ne atetʼtsienséhrah shakotiró꞉ris naʼkonhkwetaʼshón꞉a ne enkarihónni nahiontiatahnikónhren, kwáh tsi ní꞉ioht ne shaʼkotisotthonkonhkénʼen tsi hiontiathanikonhrénʼen tánon Baal nòkwah niaʼhónne.

²⁸ Ne rotó꞉kenhse ne rohteʼtshénʼen aówenhk nahénron nék khók thíken naʼtetshénsehra, ók ne rotó꞉kenhse ne rotthontéhon naʼkateriwahnhotátshera ahówenhk ne kwáh ahontaʼhawehthakwénhaʼke tsi ahakró꞉ri nètho ateriwahnhotátshera. Nahó꞉ten kástha ne kawáhe taiéron ne onátsia íken?

²⁹ Naʼkateriwahnhotátshera thóh ní꞉ioht tsi ní꞉ioht ne ótsire tánon tsi ní꞉ioht ne otsikwahkówa kwáh kénk nikanénhias tsi tekanenhiaríhtha.

³⁰ Kwáh khèsons thíken rotiʼtokénhse ne tehonthatékwahs nowenhnasónha tánon tsi rontró꞉ris né naʼkateriwahnhotátshera íken.

³¹ Kwáh khèsons thíken rotitokénhse ne ronónha raotiwenhnaʼsónhas tsi rontró꞉ris tánon rónthon Í꞉i nónhwe nitiawénon.

³² Sahtahónshatat tsi nahó꞉ten ne Í꞉i, ne Watiá꞉ner, káton! Khehiátkonhte thíken rotitokénhse ne ronhtró꞉ris ne rahonatetʼtshénseras ne ne titkáhere noʼnhówenhs. Ronhtró꞉ris kí꞉ken atetʼtshénsehras tánon shaʼkonatʼthaharakwáhtha naʼkonhkwetaʼshón꞉a ne ne oʼnhówenhs ó꞉ni tsi tehonahthaʼterénsharon. Iáh tiekhehiateniéton iáh ó꞉ni tekhenáhon ne iahónne, tánon kwáh iáh othènen tehotí꞉ien nashaʼkotiʼiénawahse nonhkweshón꞉a. Í꞉i, ne Watiá꞉ner, wakatáti.”

Ne Roiá꞉ner Rahorhiéna

³³ Ne Roiá꞉ner wahakénhaʼse, “Jeremiah, nónenh nónhkak naʼkonhkwetaʼshón꞉a tó꞉ka ó꞉ni ne rotó꞉kenhse tó꞉ka ó꞉ni ne rokháres enhieshaʼriwahnónthonse, ‘Onh ne nahó꞉ten ne Roiá꞉ner raoʼteriwahnhotátshera?’ tsi tensehriwahseráko, ‘Í꞉se tsherhieʼniaksténni ne Roiá꞉ner, tánon káti enhiaiathontháko.’

³⁴ Tó꞉ka ónhka nakonkwetaʼshón꞉a tó꞉ka ó꞉ni ne rokháres ne ne áhratsʼte nowénhna ‘ne ne Roiá꞉ner raoʼrhieniatsʼténtshera,’ kwáh enkheréwahthe ó꞉ni ne raoʼtiwáhtsire.

³⁵ Khèkok, shaʼthihiatáttions aówenhk ne ashakotiʼriwahnónhtonʼse ne rontenrohshón꞉a ó꞉ni ne raoʼtiwáhtsire, ‘Nahó꞉ten tsi tehoriwahseráhkwen ne Roiá꞉ner? Nahó꞉ten ráwen ne Roiá꞉ner?’

³⁶ Káti iáh ónen tahonshón꞉ton nahonshá꞉honsʼte nowénhnas ‘ne Roiá꞉ner raoʼrhienasthétshera,’ asèken tó꞉ka ónhka tsi niháti né énhonsthe, kwáh ne enkónʼniaʼte naʼkateriwahnhotátshera ne kwáh íken tsi ahiorhierniástheʼke ne ronónhake. Nonkweshón꞉a wathatiʼwahtáse ne raoʼwenhnashón꞉as ne raotiʼNí꞉io, ne ne ronnhehónwe, ne ne Roiá꞉ner Roshastsʼtenserowáhnen.

³⁷ Jeremiah, sehriwahnónhtons ne rotiʼtokénhse, ‘Onh ní꞉ioht tsi tehiariwahʼsehrahkwénni ne Roiá꞉ner? Nahó꞉ten wahénron ne Roiá꞉ner?’

³⁸ Tánon tó꞉ka iáh tahonteʼwénhnarahkwe tsi niʼwahkatennáhon tánon énhonsthe nowenhnashón꞉as ‘ne Roiá꞉ner raoʼrhienasthétshera,’ ethóhʼne kíʼ sehró꞉ri

³⁹ Orihwiʼiohónwe tsi tenkhehiáthaʼkwe tánon ahínonʼnióre ienkhehiatónti tsi nónhwe níkes, skátne ne kanatowáhnenh nètho tekhehiáwi ne shaʼkothisotʼthonkonkénʼen.

⁴⁰ Kwáh enkheiénhaʼse ne tsi nénhwe enhontehénsehke tánon ne kakenronniátshera iáh nonhwénhton tahonsahkanikonhrénʼen.”