Jeremiah 2 - Ohiatonhseratokénti

Rawenni꞉io Ranikónhrare Ne Israeronónhke

¹ Ne Roiá꞉ner wahakró꞉ri

² nahkherihowahnáhten kí꞉ken ateriwahnothátshera onhkwetahkwékon ne Jerusalem nónhwe. “Kahiáre tsi nisariwatokénhne ne shitisaiónhakwe, tsi nió꞉re tsi takenoronkwáhkwe ne shontonhtsérente sashonkeniniá꞉ke; wasetʼnonteratsésons ne iahonwenhtsatʼténhake, thóh nonhóntsa né꞉tho areʼkok shikaiéntʼtho.

³ Israel, kwáh iatetiáti tsi Í꞉i akonhkwéta ní꞉se; í꞉se ne kwáh iotokénti nahkawenhkónhwe. Ienkehiathenieténni ne karonhiakénsera ó꞉ni ne kariwahiesáhtshera kwáh tsikʼónhka nenhieshakaréwahte. Í꞉i, ne Watiá꞉ner, wakatáhti.”

Ne Raotiriwahneraháktshera Ne Israerʼró꞉nons Shaʼkotisotʼthonkonhkénʼen

⁴ Sewahtahónsahtat ne Roiá꞉ner raoteriwahnothátshera, ne Jacob nónhwe nithisehwatʼwatsirínonh, ne sehwenhtiókwas ne Israerró꞉nonhke.

⁵ Ne Roiá꞉ner ráton: “Nahó꞉ten tsi ionkerihwahrhóskwe ne ietʼtsisotʼthonkonhkénʼen? Nahó꞉ten wahkarihónni tsi wahonkatʼkahratéhni? Ne konhwaʼsennahiénʼskwe ne iáh thènenh tehioríhonte kahiatónni tánon ne iatewatʼthéni ronónha ó꞉ni iáh thènenh teshathiriwásthaʼkwe.

⁶ Kwáh iáh othèʼnenh kahriwahʼtetionkónhnisʼkwe, ethohʼsáne sehkheniakénhton ne Egypt nónhwe tánon wahkhehiasáhrihne iatsiatsótʼkaʼwe ne kahentahkeʼkówa: né ionwenhtsiáien né꞉ne iahonwentsiát꞉ten tánon onesahrónkwa ioshonʼwénion, iostátʼten ó꞉ni iothonwenhtsiátʼteron thóh nónhwe iáh ónhka tehienáhkeʼre ó꞉ni kwáh iáh ónhka tehiontohétsta né nónhwe.

⁷ Iakhehiaténhawe tsi nónhwe tsiohontsiaréhsen, nahontsienʼnónhni tsi nenhatiʼientkwáhko ó꞉ni nohiáshon ne ioiáneres. Ók khék wahonkhonhontsatʼsáhten; wahathihéʼkente ne kanahkeráhsera tekhehiáwi.

⁸ Ne rohkháres iáh othènenh tehoriwahnónhton, ‘Kahnónhwe níhres ne Roiá꞉ner?’ Ne kwáh Í꞉ih akonhkwéta ne rohkháres iáh tehatientéri; Ne ratiʼkoráhsons iáh tehionkewenhnahráhkwen; ne rohtitokénhse Baal rahosénnhakon tsi wahontháti tánon wahkonhwahsénnahien ne iáh othènenh tekariwástha kahiatónni.

Ne Roiá꞉ner Raorihwahshón꞉ʼa Tsi Nòkwah Ne Rahonkwetahshón꞉ʼa

⁹ “Tánon káti Í꞉i, ne Watiá꞉ner, shé꞉konh enskenikonhrahiénthaʼte nakeriwahshón꞉a tsi nòkwah nakonhkwetahshón꞉ʼa. Kwáh enkherihwahróh tsi nòkwah ne iesehshakotiʼienhokónha.

¹⁰ Tsi iatewatʼtsiénthos nòkwah niaháse tsi khawéhnhote ne Cyprus, tánon ónhkak iasehʼhiatóri tsi kharahkwínekens nòkwah né tsi tsiohontsiáien ne Kedar. Tánon kwáh ensatʼkátho tsi iáh nonhwénhton kíʼ kén éhthoh tetsawénhon.

¹¹ Iáh nonhwénhton ne ónhkak ónhkwe ne tahiakothatáhwi ne ní꞉io, iawehrohátien tsi iáh tóhske tèhken. Ók nahkonhkwéta wahtionkanitiónkwaʼkwe, ne Ní꞉io tsi nikáien ne shakokweniénston, ne rahtiní꞉ios ne iáh othènenh thahatikwéni nashakothihiatahkéna.

¹² Tánon káti wahkaténnhane ne tsi karonhiáte nahiówahke kwáh ahiotʼteronthónhake, kwáh ahionerahkwaʼthónhake ó꞉ni nahiakoneráhko,

¹³ asèken nakonhkwetahshón꞉ha tékeni tsi ní꞉ioht tsi rotirihwáhneren: hionkatswahthénion, ne ionéhkote ne kanekí꞉io, tánon rothisonhiónʼni ne watnekaráhkwa, tehiothóren ne watnekaráhkwa ne iáh tahónton nahontʼnekáhren.

Tsi Niatehionénonh Ne Israerʼró꞉nons Tsi Iáh Tehothirihwahtó꞉ken

¹⁴ “Ne Israerʼró꞉nons ia tehatináskwa; tsi rohnahna keráhton iáh tahonwahnatenaskónhniaʼte. Ónh káti nihiotséren ne ronwáhsons tsi ronwáhsehres?

¹⁵ Thóh ní꞉ioht tsi ronwahtewenhnhothánis tsi ní꞉ioht ne kénʼreks; tsi rahonhontsiáien karáhkon wahonnónhniaʼte, tánon ne rahonáhthakons iorihwenhthásehrons, kwáh onahtóskon íhken.

¹⁶ Hén, ne Memphisrononhs ó꞉ni ne Tahpanhes tehonwanontsistó꞉ren.

¹⁷ Israerʼró꞉non kwáh iashatátʼkwahse! Tahkahtewenhthéton, ne Roiá꞉ner SahʼNí꞉io, tsi nikaríhwes konhiashá꞉rihneʼne tsi nihioháhes.

¹⁸ Nahó꞉ten sahnonhthónnions tsi tashaténtsa ne Egypt niáhse né꞉ne ahsnekírahte ne Nile ahonékanos? Nahó꞉ten shaʼnonhthónnions tsi tashaténtsahaʼte ne Assyria niáhse né꞉ne ashnekírahte ne Euphrates tsi kontʼnekíne?

¹⁹ Kwáh hiateshiáti sharihwahnerahátʼtshera tsi ensharéwahte, tánon tsi takatʼkahrahthénion ne ensharíhwenhte. Tánon kwáh ensehwehientéthaʼne tsi niwahétʼken ó꞉ni iáh tetʼkarihwahiéri nahionkatewénhthete, ne Roiá꞉ner sahNí꞉io, tánon iáh óhnenh tetsisharihwahtó꞉ken tsi nòkwahʼa ní꞉ih. Í꞉i, ne wahkenonhtí꞉io Watiá꞉ner Keshaststenseroʼwáhnenh, wahkahtáhti.”

Israel Iáh Tewatʼthóntats Nahosénnaien Ne Roiá꞉ner

²⁰ Ne Ronontí꞉io Roiá꞉ner ráton, “Israel, wahónniseh tsi náhe tkénʼne wahsehriwáhson natianerénsehra; iáh tesatʼthontháton nahskewenhnahráhkwen ó꞉ni nahsekʼsénnaienhke. Ne kwáh tiótʼtes ionniarónnion tánon oronhthonkónhsons ne óhonthes niwahshokótens né tsénnahiens ne iáh thènenh tekarihwástha kahiatónnis.

²¹ Thoʼní꞉ioht tsi kónhteron tsi ní꞉ioht ne kwáh tekaiesthásion watenenharísehres né꞉ne kwáh tkanenhí꞉io. Ók satʼkátho tsi niahishahiátawenh! Thóh nahshiató꞉tenʼne tsi ní꞉ioht ne iótkens, iáh thènenh tehioríhonte wathenenharísehres.

²² Shé꞉kon ne꞉ne ahʼshatiatoháresthe ne kwáh tkashástste nononhwahrétha, shé꞉kon kíʼ enkatʼkátho ne ioráhkwahre tsi shaníhkon.

²³ Ónh ní꞉ioht tsi ne áshiron iáh thateshatahtsiatónston, tánon iáh nonhwénhton thetsénnahien ne Baal? Satʼkátho tsi nahsehrihwáhnerahke noronwáhkon; satʼkátho tsi nahsehriwahkanónhni. Thóh nishiató꞉ten tsi ní꞉ioht ioniakwáhere ne iohnatharínes, tie wahthatewenhní꞉io tsi nikatátʼkes,

²⁴ karáhkonh tsiakatátʼke. Nekahrahkonhró꞉nonh tewahóntes iorennáhon ne kahráhkon. Nónenh iotrahtharí꞉nes, ónhka ahiekwéni nahontahkonhwahniaroʼthárohke? Iáh ne ráhtsinn thaʼtehathonwenhtióni ne tahathatenikonhráhren, kwáh tiókonhte tsi iothatewehiennenhtháhon nónenh ienhiohiáthiʼwe tsi niwatʼkwenráhrons.

²⁵ Israel, tó꞉sa shaʼshithakwáhras, tó꞉ka ó꞉ni nahsatʼthónthate ne tsi shaniathakáronte naiostátʼten né tsi sehshé꞉res ne thikaniʼiosehrahthénions. Ók sáhton, ‘Iáh tatʼkwéni ne ahonshakhákehte. Khenonhwéhon ne thihononhontsátes niʼiohokónhas tánon kwáh enkhésehre.’”

Israel Tehioténtion Nahkonhwahréwahthe

²⁶ Ne Roiá꞉ner ráton, “Kwáh tsi ní꞉ioht ne rahnénhskwas tsi nenhonwahtéhate nónenh enhonwahiéna, káti kwáh sehwahkwékon ne Israeronónhke tsi enietʼtsihiatéhate— ne sehwahnonhtiʼiótsheras ó꞉ni ne ronahterihóntons, ne tionkwetahshón꞉a ne rothikháres ó꞉ni ne rothitó꞉kense.

²⁷ Kwáh sewahkwékonh tsi enietʼtsihiatéhate—tsi nítion ne sehwáhton nètho karónta né tsi sehwahníha í꞉ken tánon nètho onénhia né ietsinisténha í꞉ken. Thóh kíʼ nenhiáwenhʼne tioríwa tsi tahkwahtʼtwasteniénhni tsi ní꞉ioht ne íh nòkwah nahontésehwe. Ók nónenh thènenh tesehwahnikónhrahre, enskwahriwahnónhtonse nahónthake nakwasniénonh.

²⁸ Káhne niʼiohokónhas ne sehwahtatʼtsenhénni? Nónenh tesehwahnikónhrahre, ietʼtsiríhon naietʼtsinónhsthate—tó꞉ka enhatikwéni! Judah, tóh níkonh sehwahniʼiosehráhiens tsi níkonh sehwahnáhthaiens.

²⁹ “Nahó꞉ten tsi sehwahriwahkahténʼen? Nonhtiéren tsi waskwatʼkónhten?

³⁰ Kwáh rewáhthon, ók iáh èh tehiorihonthákwen; iáh teskwahriwáhwi nahonshaʼkwahthakwaríshion. Tsi ní꞉ioht ne kahsehró꞉hen kénreks, wáhseh hiásehthe ne shonkwétah rothitó꞉kense.

³¹ Israerʼró꞉nons, sahtahónshatat tsi nikáton. Tsi kénh ní꞉ioht ne kahráhkon thóh nitsiathótenʼne tsi nòkwah ní꞉se, tsi ní꞉ioht ne tetiókahras ó꞉ni iotonwenhtsiátʼteron? Nonhtséren, káti, tsi sáhton tsi thóh nénhsehre tsi nenhtesehnónhwehʼne, kwáh iáh nonhwénhton íhne nòkwah tahthahóntahse?

³² Ne iónkwe kén nitiohiónha ionikónhres kén ne ahowistahnorohsónhas, khés ne ioniáhkhe nahotierónniat ne enhióniaskte ne iakoniasta natseronniat? Ók nahiothónʼon nahonsehtonke nakonhkwetahshón꞉ʼa sénha wéso wenhnisehráhke ionkenikonhrénʼen.

³³ “Kwáh orihwiʼiohónwe tsi sahteriéntahre onhní꞉ioht tsi asehsherésons ne tehontatskáhres. Shé꞉kon ne kwáh wahthonwisenhtsherákʼsen enwáhton ne thèʼnenh ahkawehienthétahne ne sonháke.

³⁴ Ne satʼtserónniat ne ioráhkwah ne rothíten rahothinekwénsas tánon ne iáh othèʼnenh tehothiníkonh, ók iáh ne rahothinekwénsas ne rahthinénhskwas. Ók iawehrohátien tsi akwékon ne kíʼ íken,

³⁵ sáhton, ‘Iáh tewahkeníkonh, oriwiʼiohónwe ne Roiá꞉ner tsi iáh ónenh teshakenáhkwahse.’ Ók í꞉ih ne Watiá꞉ner, kwáh enkonhréwahte tioríhwa tsi wahshathonníʼen tsi sahriwahnerahákson.

³⁶ Ehtháke wahshathatónʼni ne tsi thóh nokwáti niaháse ne ahkorénsons raothiniʼiohokónhas. Ne Egypt kwáh enshanikonhráhten, kwáh tsi nisahiérahse ne Assyria.

³⁷ Ahèren tenthésehte ne Egypt nónwe, enshaniarénhthonʼne tsi nenhshatehénsehke. Í꞉i ne Watiá꞉ner, kwáh kekhenʼronníhon tsi niháti ne sehniahésenʼne; kwáh iáh thaʼhóten tahishahianerásten ne ronónhake nónhwe nahontháwe.”