Jeremiah 16 - Ohiatonhseratokénti

Ne Roiá꞉ner Wahoró꞉ri Ne Jeremiah Onhní꞉ioht Tsi Arónnheke

¹ Ské꞉kon ne Roiá꞉ner sahakthárahse tánon wahénron,

² “Tó꞉sa sáhniak tó꞉sa ó꞉ni sahwirahiéntanh ne kénʼen né niwahtenahtóten.

³ Enkonhró꞉ri tsi nenhothihiátahwen ne ratiʼtshahokónhas ó꞉ni ne ronwahtiʼienhokónhas.

⁴ Tehionranónhiani enhotírhiote, tánon iáh ónhka tahonwahnatʼtsiónnionse iáh ó꞉ni tahonwahtihiatháta. Ne rahothihieróntas enkakerónthake nonhwenhtsáke tsi ní꞉ioht ne óhtha iothonhióton nonhwenhtsáke. Kwáh ateriʼiosehráhke enhonwatiʼnonhwahrhiákon tó꞉ka ó꞉ni athonkarhiákon enhotírhiote, tánon ne rahothihieróntas né kákkhwa enhonatónnien ne otsitenokónhas ó꞉ni ne konhtírhios.

⁵ “Iáh teshá꞉wenk ne iashatáwehiaʼte ne kanónhskon tsi nónhwe ne iakohtʼtsiónnion. Tó꞉sa ónhka sehnikonhrahnírat. Iáh ónen tiahonshakatahsóntheren nahonsatkhehiathatérisʼte nakonhkwetahshón꞉a ne skénnen tó꞉ka ó꞉ni nakhenésten ne kanoronkwáhtshera ó꞉ni nathaniténron.

⁶ Ne iakohkwahtsénion ó꞉ni ne iakóten kén nónhwe nihiohontsáte enhonníheʼie, ók kwáh iáh ónhka tahonwathihiatáta iáh ó꞉ni ónhka tahonwanattsiónnionʼse. Kwáh iáh ónhka tsi nítion tahisehwatátrehne iáh ó꞉ni onahhónsta tahitiónni ne sehwanonhtsíne nahisehwénesʼte tsi sehwanikonhráksens.

⁷ Kwáh iáh ónhka skátke thatahiontskáhon iáh ó꞉ni thaʼhatinikírah naʼhionthatenikonhrahníraʼthe nónen ne tehionthatenorónkwah enhiahiéheʼie. Kwáh iáh ónhka thaʼiénesthe ne kanikonhraniráttshera, akwékon iáh ó꞉ni ne ónhka wahakóthonse ne kanísehra tó꞉ka ó꞉ni kanisténsera.

⁸ “Tó꞉sa ienshatáhwehiate ne kanónhskon tsi nónhwe nihiakothénniote. Tó꞉sa skátne sehwáhtien ne tahisehwatskáhon tó꞉ka ó꞉ni ahisehwahnekírah.

⁹ Sehwathahónshatat tsi nahó꞉ten Í꞉i, ne Watiá꞉ner Keshaststenserowáhnen, khení꞉io ne Israerʼró꞉non, wáhtien nakíron. Kwáh entsiáke tsi ni hiotsaró꞉kwen ne atshennonniá꞉tshera tánon natonnahrátshera ó꞉ni tsi nihioronkwénstahre ne iotáskat katkhwáhere tsi waténniothe. Ne kénʼen onhkweshón꞉a enhiakónnheke nahiontkátho né naʼiáwenhne.

¹⁰ “Nónen kí꞉ken oriwahkwékon ensehró꞉ri, enhieshariwanónhtonʼse onhʼnihiotiéren tsi en nióre tsi wakateniaʼkátsthaʼte tsi wahkheréhwaʼte. Enhatiriwahnónhton onhʼní꞉ioht ne kariwahétken tsi ahothiníkhon tánon onhʼní꞉ioht ne kariwáhneren tsi tahonaʼterientahwehréhon tsi nòkwah ne Roiá꞉ner ronwahNí꞉io.

¹¹ Ethóhʼne káti iettsiró꞉ri nètho Roiá꞉ner ráhwen, ‘Iettsisotʼthonkonhkénʼen hionkatkarahthénion tánon wakonhwathisénnaien ó꞉ni wakonhwathihiótenseh ne thikontíthe niʼiohokónhas. Wahonkatewénhthete tánon iáh tehonahtewenhnaʼráhkwenh naʼkerihonniennítsheras.

¹² Ók káti sénha i꞉se wahétken tsi nisehwatiéren tsi ní꞉ioht ne ietʼtsisotʼthonkonkénʼen. Kwáh sehwakwékon tsi sewaʼnontsisthaníron tionkwetahétken, tánon iáh teskwahwenhnaráhkwah.

¹³ Éhthoh káti, enkwahiatínekenweh kí꞉ken nónhwe nihionhontsáien thóh ienskwahiaténhaʼwe tsi tionhontsáien ne ní꞉se tánon ó꞉ni ne ietʼtsisotʼthokonhkénʼen kwáh iáh othènen tetionhontsaʼientériʼkwe. Tánon éhtho nónhwe niaʼtekaniʼiosehráhke enietʼtsihiótenseh ne niaʼtewenhnisehráhke ó꞉ni tsi niwahsontésons, tánon kwáh iáh othènen thatiotháshiaʼse nathaniténron.’”

Tsi Nahthethonénon Tsi Nihonwahnaʼnahkerahkwahtónʼne

¹⁴ Ne Roiá꞉ner ráton, “Táhwe ne tsi nikawistáheks nónen nonhkweshón꞉a kwáh iáh tahonshahathiriwahniráttsheʼke nakonháke tsi í꞉i ne konhnhehónwe Ní꞉io tsi nikáien tetheshakohiathinekénʼen ne Israerʼró꞉nons tsi tiohontsáien ne Egypt.

¹⁵ Khèkok, akonháke enhatiʼriwahníraʼte tsi ne ne konnhehónwe Ní꞉io tsi tethekhehiaténha ne Israerʼró꞉nons né othorekésons nónhwe tionhontsaiénton ó꞉ni ne aktésons nónhwe tkanakerahserahkérons tsi nonhwéson hiatekhehiareniá꞉ton. Kwáh tentekhehiaténhaʼwe tsi nónhwe ne kwáh ronónha raotinahkeráhsera, tsi nónhwe nihionhontsáien ne shaʼkothitsotʼthonkonkénʼen kehionhontsáwi. Í꞉i ne Watiá꞉ner, wahkatáti.”

Ne Táhwe Karewahtátshera

¹⁶ Ne Roiá꞉ner ráton, “Iakhehiateniéthaʼne kwáh ronatiokowáhnen ne ronrhiokawínes nahonthahónʼne tánon ashakotiʼiéna kíʼ onhkweshón꞉a. Ethónʼne kwáh ronatiokowáhnenh rontó꞉rats ienkhehiaténieʼte nahonwahnató꞉rahte kwáh tsi niaʼtehionónhtake ó꞉ni ne tsi hionniarónnion ó꞉ni tsi ionsonwéhnions ne ostenráhkes.

¹⁷ Akwékon katkáthos tsi nihontiérah. Kwáh iáh othènen tehiothaséhton nakonháke; ne rahotiriwahneraháktshera iáh tekaniá꞉kens tsi tetkánereh.

¹⁸ Kwáh enkhehiónnien tewahtsásehre tsi enshatikárhiaʼke ne rahotiriwahneraháktshera ó꞉ni tsi nihatiweiennáksens, tioríhwah tsi natehothitiónston nakonhóntsa ne ne kahiatónni wahkarihónni thóh nióre tsi iáh thènen tewahthonnhetsherástha tsi ní꞉ioht ne iawenhéion awenheióntha, tánon né rotinahnónkton ne kahiatonnisónhas.”

Ne Jeremiah Raoterénnahient Ne Tsi Rohniaʼhésen Ne Roiá꞉ner

¹⁹ Saiá꞉ner, i꞉se ne teskè꞉nhes ó꞉ni teskáwis ne kashastsʼténsera; í꞉se tatienahwáse nónen ne thènen tekanikónhrahre. Nonhkweshón꞉a tsi iotonhontsiokʼthaníhon tsík nonhwéson nenthónne tánon enhiahiéron, “Hiaʼkhisotʼthonkonhkénʼen nék khók rotiʼiénthaʼkwe ne iáh tekonnónhneʼkwe niʼiohokónhas, ne kwáh iáh thènenh tekariwástha kahiatonnisónhas.

²⁰ Ahiekwéni kén nonhkweshón꞉a akaónha ahionthateniʼiosehrónnien? Iáh, tó꞉ka thóh nenhiéhiere, nètho kwáh íken tsi iáh niʼiohokónhas thakénhake.”

²¹ “Éhthoh káti,” ráton ne Roiá꞉ner, “Énskak ienwáteratsʼthe enkhehiónnien nonhkweshón꞉a naʼiakoteriéntahrahne nakeshastsʼténsera ó꞉ni tsi niʼwakeshastsʼtenserowáhnen; enhonaʼteriéntahrahne tsi Í꞉i ne Watiá꞉ner.”