Jeremiah 12 - Ohiatonhseratokénti

Jeremiah Wahoriwanonhthonniónhase Ne Roiá꞉ner

¹ “Saiá꞉ner, tó꞉ka tahithiniriwakéna nakeriwahsón꞉a, ensehriwanírathe tsi khaiéri. Shé꞉kon kíʼ ónenhk tsi enkeriwahnónhton tsi nòkwah ne ateriwakwarishióntshera ahoriwahshón꞉a. Nonhtiéren ne rononhkwetaʼhétkens tsi nihotiʼhianerasténnis? Nohtiéren ne rathinikonhrátha tsi ronateriwahthentsiénnis?

² Enséntʼtho, tánon enkaterónten; enkonhtehiáron tánon enwahianihiónten. Tiotkonhónwe iohiánere tsi ní꞉ioht tsi ieshatharákwen, shé꞉kon kíʼ kwáh iáh sóhtsi thènen tehiesónni.

³ Ók, Saiá꞉ner, tatsientéri; satkáthos tsi nikatiérah tánon tsi nióre tsi konʼnorónhkwa. Sehiatíser kí꞉ken ionkwetaʼhétkens tsi ní꞉ioht ne teiotinakarontón꞉a akonwanáhtsioʼwe; sehiatennikonhráhren tsi nióre iakáhewe nakonhwatinonhwarhakon.

⁴ Tóhʼ nióre nonhtionhóntsa ienwastátʼten, tánon nonhontesónhas ne kwáh niaʼtekahethákes nahonthakénheʼie? Konhtitʼtshénenhs ó꞉ni notsitenokónhas konnihéions ne tkarihónnis tsi nihotiriwáhnerens nonhtionkwetaʼshón꞉a, ónhka ne ónhkwe iónhthon, ‘Rawení꞉io iáh tehatʼkáthos tsi nitewahtiérah.’”

⁵ Ne Roiá꞉ner ráton, “Jeremiah, tó꞉ka tenswisénheie tsi natesehwaréron nonhkweshón꞉a, onhní꞉ioht tsi tahisehwaréron ne kosáhtens? Tó꞉ka iáh taskwéni ne shé꞉kon nék nastáke ne kahetáhke, onhní꞉ioht tsi ahishateriwaténtiaʼse ne ne karahkhonkó꞉wa ne Jordan?

⁶ Shé꞉kon ne sehwathaténʼon, ne rahtihiátare ne kwáh í꞉se shakwátsire, waheshatenní꞉non; wahontiáthare tsi iaheshatiatónti. Tó꞉sa thasehiétat, iawerohátien tsi ateróh꞉sehra tsi ní꞉ioht tsi rotíthare.”

Ne Roiá꞉ner Raonikonraʼtséntshera Ne Ne Rahonkwetaʼshón꞉a Raotirihwáhke

⁷ Ne Roiá꞉ner ráton, “Wakatewénhteʼthe ne Israel; Wahkhekénron ne kehiataráhkwen nonhkweshón꞉a. Tatkhéhion nónhkwe ne kenorónkwah thóh raothishaststenserákon ne ronwathísons.

⁸ Ne khehiatharáhkwen nónhkwe wahonkatkarahténi; tsi ní꞉ioht ne kénreks karhákon íhwes wathotihénreʼte nahkonháke, tánon káti wahkhéson.

⁹ Ne khehiataráhkwen nónhkwe thóh nihatihiató꞉ten tsi ní꞉ioht notsiténha kwáh tsík nitsiotseráhton ne ákweks tsi iahakotsiatónni. Iaséhnonhk ne kontírhios nahontahkónʼne kontiátahre tsi akonthekhónni!

¹⁰ Rohnatiokowáhnenh ne thihotiʼnakerasehrátes ratikóras rothiriwénhkton ne wakenenharahientʼthóhseron; rohtirathatiéson natkénthake; ne wakonhontsihione kahentakekóhwa wahonnónhniaʼte.

¹¹ Kwáh káiase wahonónhniaʼte nonhóntsa; akʼkénton káien iohiesáhon. Kwáh ohontsaʼkwékon kahentahkekówa iothónʼon, tánon iáh ónhka thènenh tehiontsterístha.

¹² Iatehioiahiát꞉ton akwékon ne tiothonhontsathónʼnions ne kahentahkekó꞉wa nonhkweshón꞉ʼa tahónne nahontiéronkwe. Iewakatheniéton nateriʼiósera nakariwénhtonke nonwenhtsiakwékon; ne kwáh iáh ónhka tahónton ne skénnen tsi aienáhkerehke.

¹³ Nakonkwetashón꞉a onátsa wahatiʼiéntʼtho, ók kahontátsen wahathiʼientʼtwáko; wahathironhiáke tsi wahothihióten, ók iáh kíʼ thènen tsatehionénon. Ne wakarihónni tsi niwakenakwénʼen ne raothiʼientʼthótsera kwáh wakaiésah.”

Ne Roiá꞉ner Wahshakorahrátsten Ne Israel Tehonthonhontsanekʼkhánions

¹⁴ Ne Roiá꞉ner ráton, “Wakateriwahiénni ne thènen akíron tsi nòkwah ne Israel tehonthonhontsanekʼkhánion ne ronhnonhontsatshá꞉ton ne thekhehiáwi nakonhkwetaʼshón꞉a Israel. Ahéren enkhehiatenháwiʼte thí꞉ken ionkwetaksénskwa ne rahothiʼnakerahserákons tsi ní꞉ioht ne kaiéntʼthon kahterhiótsion, tánon enskeniákente ne Judah ne rohnonháke.

¹⁵ Ók nónenh ahéren enkhehiatenhawíton, kwáh ensekʼkhétenre; Kwáh tentekhehiaténhaʼwe ne skentiokwátʼtion ensekʼkhéteron ne rahononhontsáke ó꞉ni ne raothinakerahserákon.

¹⁶ Tó꞉ka kwáh ronhnerhiasahkwékon tsi enhatihiéna ne akonhkwetaʼshón꞉a raothiriwiʼiostóntshera tánon enhatiriwahníraʼte, ‘Ne tsi rónnhe ne Roiá꞉ner’—ne tsi nithonwatiʼrihonniénni nakonkwetaʼshón꞉a nakonhwariwahníratse ne Baal—ethóhʼne kíʼ kwáh enhonwanatsatáhrahse nakonkwetaʼshón꞉a tánon kwáh enhotihianerásten.

¹⁷ Ók nónhka ne kentiókwa ne iáh tahontewénhnarakwe, ethóhʼne kíʼ kwáh enkheterhótsi tánon enkhehiáthonte. Í꞉i, ne Watiá꞉ner, wakatáti.”