Jeremiah 10 - Ohiatonhseratokénti

Kahiatónni ó꞉ni Kwáh Oriwí꞉io Konwasénnaiens

¹ Israerʼró꞉nons, sewatahónshatat naʼteriwahnotátshera ne Roiá꞉ner tsi nenhtsisehwathárahse.

² Ráton, “Tó꞉sa ietsiweienhnáser nakorénshon; tó꞉sa tesehwathatenikonráhren ne sontekʼthíʼio ahisehwatʼkhátho ne tsi karonhiáte, ethohʼsáne nakorénshon tsi iakoteronienténni.

³ Ne rahothiriwiʼiostóntshera kí꞉ken onhkweshon꞉a iáh thènen tehioríhonte. Ne keríhthaʼkwe karontsiákon ne karhákon; né wátston tsi wahkarahtáhkwen tsi nihatstashón꞉a ne óiente rohiótens

⁴ tánon ne karahsesthákwen ne kawistaráhken ó꞉ni owistanóron. Tánon ne tehionathatsenawáhkon tsi kanonwahró꞉ton né ne tó꞉sa ahonthonsénʼne.

⁵ Nètho kahiatónnis ne tesontiéren ne hionthetorhiátha ne wahiáris kahéthaien; iáh thakontiʼkwéni nahkontáhti; ónenk tsi tenkonwahnaskwénhaʼwe tioríhwa tsi iáh takonthikwéni nahkonténni. Tó꞉sa sektsanísek: iáh thaʼkontikwéni nahieshakaréwahte, tánon iáh thakontiʼkwéni ne thènen ioiánere tsi naheshaʼtiérahse.”

⁶ Saiá꞉ner, kwáh iáh ónhka ne ahonshaieshaiérenʼke; shaʼshastsʼtenserowánen, tánon tsennowánen ó꞉ni sehshástsʼte.

⁷ Ónhka ónhte ne iáh thaʼieshaʼkweniénstaʼne, Sehnontí꞉io nonhkweʼókon? Teshaʼténtion nahieshaʼkwéniensʼthe. Kwáh iáh ónhka ne ahonshaʼieshaiérenʼke ne rahthihiatoʼrókʼkon ne rontenikonratʼthó꞉kha nonhkwèʼne ó꞉ni ne raotiʼnakerahserákons kwáh iáh ónhka teʼtseshaʼiéren.

⁸ Ratiʼkwékon tohʼnathónnokʼte ó꞉ni tehonatenonhwaroʼróhthonʼte. Onhnahó꞉ten ahathiwehientétahʼne ne óiente kahiatónnis nonʼnahontáh꞉we?

⁹ Ne raotiʼhiatónnis kwáh thitioróh꞉ron ne kawistaráhken ne ne Spain nónwe nitsawénon tánon ne owistanóron Uphaz né nónhwe nitsawénon, akwékon ne raothihioténseras ne rathirástha; ne kasehronniáton ne tehioterónhionte ne arihwakonnéha ó꞉ni ne arihwakonnéha oniatahrá꞉a ne rothíson ne rohthirennáhon tehatiʼserihiétarons.

¹⁰ Ók í꞉se, Saiá꞉ner, ne kwáh oriwiʼiohónwe Ní꞉io, Í꞉se ne shonnhehónwe Ní꞉io tánon tsi nénhwe Sanontí꞉io. Nónen shaʼnakwénʼen, ne tsi ionwenhtsiáte tenhiowísonʼkwe; nonkweshón꞉a iáh tahiekwéni nahiontahkátsthaʼte ne sahnahkwáhtshera. (

¹¹ Í꞉se ne tiónkwe ó꞉nenk tsi enhientʼtsiró꞉ri nètho onkweshón꞉a ne kahiatónnis iáh rohnónha tehothíson ne tsi ionwenhtsiáte ó꞉ni ne tsi karonhiáte ónenhk tsi enhonwanáthonte. Kwáh ónen iáh kahnèka tahonshahatiʼierónnike ne tsi ionwenhtsiáte.)

Ne Teharihwaʼkwáhtha Ne Tahonwanonhweratónthaʼkwe Ne Ní꞉io

¹² Ne Roiá꞉ner tsi róhson tsi ionwenhtsiáte raoshastsʼténsera rótston; tsi rokwahtáhkwen ne tsi ionwenhtsiáte raonikonhrowaʼnhátshera rótston tánon ne ne raonikonhraienʼtátshera wahtewatirónten tsi karonhiáte.

¹³ Nónen enhatewenhnátesʼte enwatnekahkarénisʼte ne tsi karonhiátes; tánon rónnis nahioháweiasʼte ne tsi iehiontonhontiotʼtaníhon Tánon rónnis ne tahonnihnekarahwáhnion nónen iokennóron tánon tahtheniétha nòwerah thóh nitewèhtha tsi nónhwe nihaientákwa.

¹⁴ Tsi nenhiontkathóseron kí꞉ken, nonhkweshón꞉a tahiakotonniótʼtahne tánon iáh othènen karihwatésken; tánon tsi niháti ne ratihiathonniserónnis entʼthatinikónrenʼne, tioríhwa ne rahothihiatónnis tsi iáh oriwí꞉io tèken tánon iáh tekonnónnhe.

¹⁵ Iáh othènen tehioríhonte kwáh tehiothonwenhtsióhon nakonhwatikénron; kwáh enkonhwanátonʼte nónen ne Roiá꞉ner éntre ne ken kennienʼshakóhiere.

¹⁶ Ne Jacob Raoní꞉io kwáh iáh thènen thateskahieróntare; rahónha séh norihwaʼkwékon rohshahánion, tánon Israel washaʼkohiataráko ne kwáh rahónha rahonkwetaʼshón꞉a ahónton. Né ne Roiá꞉ner Roshastsʼtenserowánen ne raosénna.

Tsi Táwe Nahonwanahnakeráhkwaʼthe

¹⁷ Ne Jerusalemró꞉non, ní꞉se ónen teietʼtsiwáhnen! Sehwaróhrok ne sewahwenhshón꞉a.

¹⁸ Ne Roiá꞉ner entsisehwahiaʼtínekenʼkwe ne kénʼen ionhontsiáien; kwáh tentsisehwaskwásehron tsi nióre ne iáh ónhka tiaʼtahonsahiakothaténronʼke. Ne Roiá꞉ner wahatáti.

¹⁹ Ne Jerusalemró꞉non wathonséntho, “Tsi nihionkwatkaréwaton! Tsi hionkwatkarewaton iáh tahonsahionkwatewirónnien. Tánon ionkwéron né kí꞉ken ahónton ne ahiakwatakátsthaʼte!

²⁰ Ne onhkwahtóh꞉sehras ioriwahieríton; nahsehrí꞉ies ne iothihienawáhkonsʼkwe wahtewahtsiákon. Ne hiakiienokón꞉a akwékon kenkʼtshiehonénon; iáh ónhka tsiatetiakothaténron ne shé꞉kon ahonsahiothoserahkétsko; iáh ónhka tetiontaharahnihióntʼtha.”

²¹ Watʼkeriwahseráko, “Ne ionkhihéntense thonatónnhokʼte; iáh tehonwariwahnonhtónni ne Roiá꞉ner nashaʼkohéntenʼse. Ne kíʼ tsioríhwa tsi wahothiriwahnóronse, tánon nonhtsionkwetashón꞉ʼa tehonatʼthókwen.

²² Sewatahónsatat! Noríhwa ónhwe! Kwáh íken tsi ronatʼtsarokwáhton nonhkweshón꞉a nothoréhke nokwáhti; ne rahononhkwetaʼsón꞉a ne ronterí꞉ios kahentáke enhonnónhniaʼte ne tsi kanatowáhnens ne Judah, ethóh nónhwe ne érhar nihatinákere.”

²³ Saiá꞉ner, wakateriéntahre iáh ónhka ne tsi nihiátion tetsionkwahniaróh꞉tahron tsi niahonkweʼnonhátie; iáh ónhka ne tsi nihiátsion tetsionkwaniaró꞉tahron ne tsi iatiónnhe.

²⁴ Shaʼsehkwatáhko ne shonkwetaʼsón꞉a, Saiá꞉ner, ók tó꞉sa kíʼ sóhtsi tahkwahteniakátsʼtats tó꞉sa ó꞉ni askwahréwate nónen sahnahkwénʼen; tótʼ tsienhionkwathókʼthase.

²⁵ Thóhʼniahásaf ne sanahkwáhtshera tsi nónhwe ne onhkweshón꞉a ne iáh tehieshaʼsénnaiens tánon ó꞉ni ne ónhkwe ne ieshakenrónni. Sahkotinonhwarhiákon ne shonkwetaʼsónha; kwáh tohkénʼen tsi hionkhiʼiatónton tánon nonhkwanahkeʼráhsehra hioriwahiesáhon.