Isaiah 7 - Ohiatonhseratokénti

Ne Isaiah Kwáh Kí Oriwí꞉io Wahahón꞉nien Ne Ronnontí꞉io Ahaz

¹ Ne sihothenhniseraʼténionskwe ne Ahaz né roʼníha ne ne Jotham né ne ieshoién꞉ha ne Uzziah, rahónha rononhtí꞉iokwe ne Judah, ne Rezin ne ne ronnontí꞉ioʼkwe ne Aram nón꞉we tánon ne Ronnontí꞉io Pekah ne roién꞉ha ne Remaliah ne ne Israerʼronónke iahá꞉re niahatsatónhti Jerusalem, ók iáh kí tehoteriwathentsiénhni niashakotsiatonhtion.

² Nó꞉nen ne tsi rononshó꞉te ne Táwit wahatirihwáronhke nètho Aram tsi iathonhnitsokwátseste ne Ephraim, ne raweriá꞉ne ne Ahaz tánon ne ronhneriá꞉nes nonkweshónhas wathonhneriashísonʼkwe kwáh tsi ní꞉ioht ne kerítons ne karakonhkówa tehiotʼkarénhron tsi niháhote.

³ Ethó꞉ne ne Roiá꞉ner waʼhawénhase ne Isaiah, wáhs iatsaténhaf ne entsiénha Shear-jashub né꞉ne tahitsatátken Ahaz ne tsi ieióte tsi tehiahontsakonhátie ne éhʼneken tsi watnekaientáhkwa tsi wahohatá꞉tsie ne tsi iehatinoharestáhkwa ne raonatserónnia tkahén꞉taien.

⁴ Tánon tsró꞉ri, rathaʼtenhnikonhrá꞉ren, sakthiʼkénhak, tánon tóh꞉sa teshonnaríkʼkhon, ne ne akeniʼrihónhni kíʼken tekatsinaharáke ioienkwárote tsi ioʼtsinaharatéken-ne tsi nahotinakónhniaʼte ne Rezin tánon ne Syria, tánon ne raonekenteronhtsheraʼshónhas ne Remaliah.

⁵ Tsioríhwa ne Aram—skát꞉ne ne Ephraim tánon ne raonekenteronhtsherashónhas ne Remaliah—rontenikonrónhnis naiesakarónhni, ronhtónhnions,

⁶ Ánion iétewe ietewatsatónh꞉ti ne Judah tánon tewáiaks ne Jerusalem tánon tewasénhni iatethewahiáti tánon kwáh ne tewanontiʼiotserónhni ne raonekenterónhtshera Tabeel né nón꞉we;

⁷ Né káti aoríhwa rá꞉ton ne Roiá꞉ner Ní꞉io: Iáh thaʼkátake, iáh èʼtho taiáwenhne.

⁸ Asèken naʼonón꞉tsi ne Syria né꞉ne Damascus, tánon ne aʼonón꞉tsi ne Damascus né꞉ne Rezin. (Ohénton ne iáhʼiak nenhioserásenhke ne Ephraim kwáh thenhonwanattókwahte, iáh ónhkwe tahonsakénhake.)

⁹ Naʼonón꞉tsi ne Ephraim né꞉ne Samaria, tánon nohénton iehónhnete ne Samaria né꞉ne raonekenteronhtsherashónhas Remaliah. Tó꞉ka iáh tahisarihwaníronhke tsi niʼtisetákwen, kwáh kí iáh tástahke.

Né Isaiah Tahá꞉wenh Ne Ahaz Tsi Niweʼnéston Ne Immanuel

¹⁰ Sók꞉hare ne Roiá꞉ner sahothárase ne Ahaz, rá꞉tons,

¹¹ Tserihwanóntons raoʼtenienténhtshera ne Roiá꞉ner Saní꞉io í꞉ken; thóh nahionsonhwésonhke tsi ní꞉ioht ne Sheol (ne ne tsi tsiohontsáien ne kenhéion) khés thóh nahontahiótʼteke tsi ní꞉ioht ne tsi karonhiáte.

¹² Ók ne Ahaz wahénron, “Iáh takerihwanónton, iáh takatʼthontáte ne Roiá꞉ner aiʼiateniénhten.”

¹³ Ethó꞉ne ne Isaíah wahénron: “Satahónshatat kí ó꞉nen, Ó tsi ronón꞉shote ne Táwit! Shóʼtsikén kén niʼiorihwáha ne thénhnen ní꞉se asateniénhten ne raotinikonriʼioserákon ne ronhnón꞉kwe, nètho ní꞉se kwáh sateniénhten ne raonikonriʼioserákon ne ná꞉ke Ní꞉io ó꞉ni?

¹⁴ Né ká꞉ti aoríhwa ne Roiá꞉ner rahonhatsíwa éntʼhion natenienhténtsera. Satkátho, ne kawí꞉non í꞉ken iowiraientásereh tánon enhionekenteronhtsheraiéntaʼne, tánon Immanuel enhonátonhkwe.

¹⁵ Kwáh néh enrát꞉sehke ne Ioteniokwahkwenonhníhon onón꞉ta tánon otsinakontakwáhne otsikéta enronhnhékwen kwáh tsi nió꞉re iehoteriéntarane naharihwáson ne kariwahét꞉ken tánon nahataterákwahse ne ioiánere.

¹⁶ Asèken nohénton ne raksáha ahoteriéntarane onhní꞉ioht tsi aharihwáson ne wahét꞉ken tánon ne ahataterákwahse ne ioiánere, nonhóntsa ónka kíʼ teninontiʼioseráke ní꞉se iesateronkwénhnis kwáh kíʼ enhonwanakerakwáhte.

¹⁷ Né Roiá꞉ner entʼthiahawítaʼse tánon ne shonkwetaʼshón꞉ʼahs ó꞉ni sheʼshotʼthonkonhkénʼen tsi rotinonshó꞉tons ne enwenhniserontákwen ne takanikonrá꞉ren ne ne iáh nonwénhton tehiakokʼkáton tsi ná꞉he ne Ephraim sakotsatonhtakwénhni ne Judah né enthohiaténhawe ne ronhnontí꞉io ne Assyria.”

¹⁸ Né thóh entewenhniseráteke ne Roiá꞉ner kwáh ienhrenhnákare niasakónonke notsíks ne tsi tsiotáhsawe ne tsi kaniataratátie ne Egypt, tánon notsinakonhtakwáhne nahontahónhne thóh tsi tsohontsáien ne Assyria.

¹⁹ Tánon kwáh ratikwékon entón꞉ne tánon enhontenatónhni ne tsi nihiotstenhrakárenhre ne teióhnitstenró꞉ren, tánon ne tsi tehionitstenhrorénhserons, tánon akwékon ne tsi iokwiró꞉tons ne ohíktas, tánon kahentakwékon ne tsi konwatiʼteronhtákwah ne raotiʼtsenenhó꞉kons.

²⁰ Né thóh entewenhniseráteke ne Roiá꞉ner kwáh enhakéte ne énratsʼte iotkonstonhrhiákstha áhsare rotenhnáhon í꞉se nakaniataráti—ó꞉ni ne ronhnontí꞉io ne Assyria—ne ranontsíne ó꞉ni tsi rononwé꞉rote rashitáhke, ó꞉ni kwáh enhokonstón꞉rhiaʼke.

²¹ Né thóh entewenhniseráteke saiáta kwáh enhanónsthate nahiónhneke ne nitsonaskwahiónha tionhnónskwahron tánon teniʼiáse kaiatákeras,

²² tánon kwáh ne enronhnhékwen ne teiotenioʼkwahkwenónhni onón꞉ta tsioríhwa tsi niiawetatʼtsáni káien nonónhta nètho thonatkáwen; asèken tsi nihiákon ne iateiakotathénron ne tsi ionhontsáte kwáh kí ne enhónnheke ne teioteniokwahkwenónhni onónta tánon notsinakontakwáhne otsikhéta.

²³ Né éhʼtho entewenhniseráteke kwáh tsitnonhwésons ne énska tewenhniawehʼetsheráhsen níkon rotiʼiéntho ne watenenharíseres, énska tewenhniawehʼetsheráhsen saʼtèkena kawistaráken tsi níkon kaientʼthóseronkwe, kwáh kí né thentsoró꞉rokste noniónwaras tánon nohíktas.

²⁴ Nonkweshónhas thóh nienhénien nahiontorát꞉tha ahénhna tánon kaiénkwires ienhatíhawe, asèken ohontsakwékon ne tsionió꞉hon ne oniónwaras tánon ohíktas;

²⁵ tánon akwékon ne tsi ionhniarónhnions shés atsókten rónhstakwe tsi ronhtonhtaiáksʼkwe, iáh tó꞉tsase nahsetsanísehke noniónhwaras tánon nohíktas; ók ne kí ienwáton tsi nónwe ne tionhnónskwahrons enkonwanátkaʼwe tánon ne teiotinakaronhtónhas nahtenkontawénhreh.