Isaiah 59 - Ohiatonhseratokénti

Né Iáh Tetkarihwaʼiéri Tánon Né Kawisenhehiónsera Tsi Enkareʼwátonke

¹ Satʼkátho, né Roiá꞉ner ratsaná꞉ke iáh shó꞉tsi kentehiónhsa nahiaʼkonónsthate, khés ne rahontàke ne tahahontakwéʼkonhke ne iáh nahothónhteʼke.

² Ók khé꞉kenk, né꞉ne sarihwanerahák꞉tsheras kahió꞉tats tsi naʼtetiátere ní꞉se tánon ne Saní꞉io, tánon ne sarihwaneraháktshera né rokonshaséhtha tsi nó꞉kwah ní꞉se né ká꞉ti né tó꞉sa ahonsahiatʼthónteke.

³ Asèken né satshanáke kwáh tesanekwenhshó꞉hare, tánon teshasʼnonshátions né꞉ne sarihwaneraháktshera iorihónhni; né tiá꞉kes iotatíhon nonówenhs, né senhnasáke tehiotiénhon ne karihwahetʼkénhsera.

⁴ Iáh ónhka kaianerenhseráke tseiéntha niaʼtahiorihó꞉taʼke, iáh ónhka kaianerenhseráke tienénhtha nahontakarihwaiérihke; né ratiʼniahésen ne iáh othènon tahonwatiʼnitséron, ronhnowenhtánions, né ronatienawáston ne iotakónta tánon né iehontiʼhéntʼthos ne karihwaneraháktshera.

⁵ Né tehatiʼnónhsast nó꞉niaʼre ahonónhsa, tánon tehatiʼnonwaiéntha ne takwahá꞉son ahoʼáre; ónhka akénhake né aienón꞉sake kí꞉ken ahotiʼnónsas tsi enhiaʼiéheie, tánon ne tekanetsʼtoraráh꞉kon onhnón꞉sa thóh thenkawí꞉riake ne kaniaʼráksen.

⁶ Né raonáʼhares iáh thaʼhonton né꞉ne ahontakwenónhniaʼte; iáh thahatiʼkwéni né꞉ne ahonteróroksʼte tsi nahó꞉ten enhonnónhni. Né raotiʼiothénsera né꞉ne karihwaneraháktshera í꞉ken, tánon ne kahiothénhsera né꞉ne kaiatatón꞉tshera í꞉ken ne ratiʼtsaná꞉kes.

⁷ Né ronhshiʼtákes thóh nienkatá꞉ke tsi nó꞉kwah ne wahhét꞉ken í꞉ken, tánon teoʼtisteríhens nahonwahnéh꞉kwahte ne iáh othènon tehoníkon; né raonanontonhnióntsheras né꞉ne wanontonhniontsheráksens í꞉ken, né nahatiʼrihwéntʼtho tánon atkaronhniátshera í꞉ken ne tsi ronahatátie ne iohahowánens.

⁸ Tsi nihiohahó꞉ten ne skénnon iáh othènon tehatiʼientéri, tánon iáh tekáien ne kaiáneren ne tsi ronahatátie. Né raonahahashónhas tsi ronathaʼhónhni tehiotʼthahatʼtaníhon; iáh ónhka né nón꞉we nenhionténhti theʼieientéri ne skénnon.

⁹ Né ká꞉ti aoríhwa ne karihwenhthá꞉tshera ahí꞉non nió꞉re í꞉tewes nontionhá꞉ke, tánon ne karihwaʼkwahrishióntshera iáh tehionkwahiaʼtórens; né ionkwahrá꞉re ne teioswát꞉the, tánon sewatʼkátho! thóh káien ne tetsiókaʼras; tánon né tahioswátheʼke, ók thóh nón꞉we nítewe nasá꞉takon.

¹⁰ Tiosehrón꞉kwas né tsi wasonthaʼtátie kwáh né꞉ne teieronwékon, tiosehrón꞉kwas kwáh tsi ní꞉ioht ne iáh thatehatiʼkáras; tionkwasí꞉tsiaks nó꞉nen éntie nónh níkare kwáh né꞉ne asonhthénhne akénhake, tsi nón꞉we nihónhnes né ronathonhnatakaríh꞉te tsi sí꞉ken ní꞉ioht nahionkwenhéion.

¹¹ Tewaʼkwé꞉kon ionkwahtonrá꞉ien tsi ni꞉ioht nokwá꞉ri; kwáh né꞉ne oríh꞉te iontionsèhna tsi nihionkwahnikonráksens. Né tewaráre ne tkarihwaiéri, ók iáh kí kanèka tekáien; né kaienawaséhtshera, ók kwáh ahí꞉nonh nió꞉re í꞉tewes nontionhá꞉ke.

¹² Asèken nonkwaterihwatewaʼtónhtshera ne sahénton tsi niʼiaweʼtowáhne, ó꞉ni nonkwahrihwaʼneraháktsheras né karihwanírats ionkwatʼkónte nontionhá꞉ke. Nonwaterihwaʼtewatón꞉tshera kwáh í꞉ken tsi iakwahkwékon, tánon iakwahriwaʼhientéri nonkwarihwaʼneraháktsheras:

¹³ tsehionkwahtaʼtewenhniʼiostonháties, tánon tsi tewatonhníha ne Roiá꞉ner, tánon hionkwatsʼwaténion ne tó꞉sa atsitewá꞉sehre nónhkwah Ní꞉io, né ionkwahthaʼrákwen ne karonhiakénhsera tánon nahiaʼkinenraká꞉ri, né iatiónnhets nonówens owenhnaʼókons tánon tsi nihionkwahthaʼrákwen tsi nitewé꞉tha nonkweʼriá꞉ne.

¹⁴ Né kaiáneren onàken skahawíton, tánon né karihwakwahrishióntshera ahí꞉non nió꞉re ít꞉kaʼte; asèken norihwí꞉io íken thóh tsioshiʼtsiásks tsi iontkenhnisahá꞉tha nón꞉kwe, tánon né tkarihwaiéri iáh takakwéni niahontáweiaʼte.

¹⁵ Noriwí꞉io í꞉ken né tioteríhokʼte, tánon ónka akénhake tahonsahiontkaraténi tsi nó꞉kwah ne karihwahetkénsera wahonthaʼtenenhskwenháton. Né Roiá꞉ner wahatʼkátho, tánon iáh tehawerientiʼióhon né tsi iáh tekáien ne tkarihwaiéri í꞉ken.

¹⁶ Wahatʼkátho tsi kwáh iáh ónhka, tánon wahorihwaneráko tsi kwáh iáh ónka teiakotsiaʼtóronh; sók kí rahónha raonénhtsa khók tsi wahatesénhnieʼte, tánon né꞉ne iaʼtehahiáti khók raoʼrihwakwahrihshióntshera wahotiénawasʼte.

¹⁷ Né wahatserón꞉niaʼte ne karihwaʼkwahrihshióntshera kwáh tsi ní꞉ioht ne iontetskweʼnorókʼtha, tánon né nanónwaroʼre ne kaiatakenáhtshera wahanonwaróroʼke; né wahatiátawí꞉te ne karewatátshera aotsherónh꞉niaʼt, tánon watatatwahʼwénheke thóh kanakwahtsherákon tsi waʼthatewehiáren.

¹⁸ Né entsoianénhaʼwe tsi nihotiʼiothenseró꞉tens, ne ká꞉ti nahonsahaká꞉riaʼke; tsi sakonákwaʼse ne ronhwásons, iensheʼsakotiatónhti ne ronwáswenhs; tsi nó꞉kwah ne kawenó꞉tons ionhontsaʼkérons kwáh kí ensheʼsakokáriakʼse tsi iensakotsatón꞉ti.

¹⁹ Káti tsi nihiá꞉kon né tsi iatewatshéntos nókwahti iakoʼtohetstákwen tsi enhieʼkweniénstake ne raosénhna ne Roiá꞉ner, tánon tsi nihiá꞉kon ne tsitʼkarakwínekens iakoʼtohetstákwen né nenhʼné꞉e enhiekweniénstake ne raoʼiatanerakwáhtshera; asèken thóh ní꞉ioht tsi éntre tsi ní꞉ioht ne iawenhó꞉tonhtse né꞉ne raonhniséhra ne Roiá꞉ner iorehátie.

²⁰ Tánon kwáh iénhraʼwe ne Zion nón꞉we né꞉ne sakoʼiatákwas í꞉ken, né tsi nihiá꞉kon né Jacob rawatsiraʼtátie tsi nihá꞉ti ne teshonatkaraténion tsi nó꞉kwah ne raoʼtirihwaneraháktshera, rá꞉ton ne Roiá꞉ner.

²¹ Tánon ní꞉i, né kí꞉ken naʼkaterihwasheʼronhniátshera tsi naʼteiakwáhtere, rá꞉ton ne Roiá꞉ner: nakenikónhra né tionháke káien, tánon nakewenhnaʼshónhas né thóh wakéthen tsi sewasaká꞉ronhtes, kwáh iáh thaʼtahontakaiákenhne né tsi sewahsaká꞉ronhte, iáh ó꞉ni ne tsi ratiʼsakarónhtons ne ietsiʼiohokónhas, iáh ó꞉ni né tsi ratisakaróntons né ietsiʼiatereʼokónhas, rá꞉ton ne Roiá꞉ner, kén ienwatásawen tánon né꞉ne tsi nénhwe enkénhake.