Isaiah 51 - Ohiatonhseratokénti

Kaiataterítshera Wateweiénton Ne Raotiʼrihwá꞉ke Ne Rawenni꞉io Rahonkwetaʼshónha

¹ Takwahtahónsatat, í꞉se ne nètho sewásehre naʼterihwakwahrihshión꞉tshera, í꞉se ne tsiʼsewahiatísaks ne Roiá꞉ner. Iasatʼkátho nosténhra tsi nón꞉we tsesakwétaron, tánon ne tsi ienenhiokwáts꞉tha tsi nón꞉we tsesakenratákwen.

² Iatsiatʼkátho ne Abraham ianíha tánon ne Sarah tsi nikáien iesanakeráts꞉ton; asèken raonhatsíwa khók kènhne nó꞉nen shiaʼhináton, ók wahiʼhiathatériste tánon wahihiónhnien nahotsiokowá꞉na.

³ Asèken ne Roiá꞉ner kwáh kí enhakwahtshésten ne Zion; kwáh enhakwahshésʼten akwékon ne watiesátons nahohontsákes, tánon né ienwahtónhniaʼte nahonhontsáke ne iahonwenhtsáthen thóh nenhiotónhake tsi ní꞉ioht tónhne ne Eden, né iahontsáʼthen ahohóntsa thóh nenhiotón꞉hake tsi ní꞉ioht ne Roiá꞉ner raohé꞉ta; atonnhá꞉rah tánon atsenhnonʼniátshera enkatʼtsénrionh nahonháke, kanonhweratónhtsera tánon thenhiakorihwákwen né karenhní꞉ios.

⁴ Takwahtahónsatat, akonkwetaʼshónha, tánon takwahtahónsatat, akitiókwa; asèken ne karihonhnienhnítshera kwáh akonháke entkaiákenhne, tánon nakerihwakwahrishióntshera né nakoswatʼthétshera í꞉ken nonkweshón꞉has.

⁵ Kwáh iostó꞉re ákta entékhaʼwe nakatesenhniéntshera, naká꞉wenk kaiatakenhá꞉tshera iehiohiaʼkénʼen tánon ne kenenhtsháke kwáh ne enhiakokʼkó꞉raste nonkweshón꞉has; ne tsi kawenhó꞉tons í꞉i wakèrare, tánon né꞉ne kenenhtsháke ronská꞉neks.

⁶ Satarakétsko tsi karonhiáte niashatiérat, tánon iasatʼkátho nákon ne tsi ionwenhtsáte; asèken ne tsi karonhiáte enwatóhetste tsi ní꞉ioht noienkwáhra, ne tsi ionwenhtsáte enwakáhionhne tsi ní꞉ioht natserón꞉nia, tánon tsi niʼiá꞉kon né nón꞉we niʼienákere kwáh kí enhiaʼiéheie tsi ní꞉ioht ne kén nikatsinonwásas; ók naʼkatanithenrá꞉tshera kwáh kí nenhnéʼe tsi nénhwe enkénhake, tánon naʼkatesenhniéntshera kwáh iáh nonwénton tsiahontókten.

⁷ Takwahtahónsatat, tsi nítsion ne sewateriéntare ne karihwakwarihshíonhtsheras; í꞉se ne tsiónkwe né sewáhawe nakerihonhnienʼnítsheras ne seweʼriá꞉nes; tó꞉sa ietsitshániset nonkweʼshónhas tsi nisakotiʼkenhrenhserón꞉nis nakorénshons, tánon tó꞉sa tasewanikónren nó꞉nenh enietsikenrenhserónhni ní꞉se.

⁸ Asèken ne kokhó꞉wa kwáh thóh ní꞉ioht tsi eniakowáraʼke tsi ní꞉ioht tsi wakwe:niaks, tánon notsinonhwanhé꞉ta kwáh eniakowárake tsi ní꞉ioht tsíwaks nononhwé꞉rhon; ók nakatesenhniéntshera tsi né nénhwe enkénhake, tánon nakatanithenrá꞉tshera tsi wahenenhkwensatátie akowenhkhón꞉we enkénhake.

⁹ Í꞉tie, í꞉tie, Saiá꞉ner kashatsʼténhsera tesatewehiáren, Ó tsi nihashátste ne Roiá꞉ner! Í꞉tie, kwáh tsi nitiotón꞉ne ne shiʼtsiotenhniserakáionskwe, tsi nontaienekwenhsatátie ne wahón꞉nise tkènhne! Í꞉se tèken tsi natetsiaʼtiákon ne Rahab, í꞉se tetsiaʼtawehéston ne iononwaronhtsiétha.

¹⁰ Í꞉se ken ne watsʼtátʼthate ne kaniatarakhekó꞉wane, né꞉ne iohnotésonhne; í꞉se wasatʼthahónhni thóh nón꞉we tsi nihionótes ne kaniatarakheʼkówane né꞉ne tiontatheniaʼkénton thóh nón꞉we natahatihiáiaʼke.

¹¹ Né ká꞉ti ne shesakoiatákwen ne Roiá꞉ner kwáh iensónhne, tánon tentʼthón꞉ne ne Zion tsi tenhotiʼrihwakwenhátie; né꞉ne tsi nénhwe natonnhárat enká꞉raʼke ne ratinontsínes; kwáh kí enhatiʼiéna natonnhárat ó꞉ni natsenhnonniátsheras, tánon ne kanikonraksénhtsheras ó꞉ni naiakahónsene tsi éhʼren enwé꞉te.

¹² Í꞉i, Í꞉i ne konhnikonranírats; nontiéren ká꞉ti tsi asetʼtshaníseke nonkweshónhas ronónha ónenk tsi ronhniheiónhsere, né nonkweshón꞉has ne ronatashokwénhnis tsi ní꞉ioht nóhonte?

¹³ Tsiaʼtanikonrénhen ne Roiá꞉ner, né iahiaʼtíshon, rahón꞉ha tehotíronhte né tsi karonhiátes tánon thononhkónhni ne tsi iohontsáte. Iesakontákwen sáterons ne tsi niwenhníseres tsioríhwa tsi nihotenakwahwenhráti ne sakowisátha, né rahónha thóh iatehotsátʼton karonhiakentserákon. Ók kaníwes ne raonhakwáhtshera ne sakowisátha?

¹⁴ Né iontatʼwiʼsátha kwáh iosthó꞉re tsi entiontatátʼkaʼwe; kwáh iáh tahonníheʼie tánon iáh tshiaʼhóntsnenhte ne tsi tiosonhwakáronhte, iáh ó꞉ni tahotiʼnatarahnorónhsten.

¹⁵ Asèken Í꞉i ne Watiá꞉ner í꞉ken né sah Ní꞉io í꞉ken, rahʼonha tehanonwafʼfátha ne kaniatarakhekówaʼne ne ká꞉ti ne tsi ionontakwahrontónhtses tahiahónhare— né Sakoiá꞉ner ne ratiʼronhiakeró꞉nons né꞉ne raosénhna í꞉ken.

¹⁶ Iewakéthen ne tsákon nakewenhnaókons, tánon konhiatashé꞉ton thóh tsi iotasátaʼre ne katshanàke, watʼkatirónhthen ne tsi karonhiátes tánon tewakatenonkónhni ne tsi ionwenhtsàte, tánon kroʼriánionskwe ne Zion, “Í꞉se nakonkwé꞉ta í꞉ken.”

¹⁷ Í꞉i tie, Í꞉tie! Téstan Ó Jerusalem, í꞉se ne sanekíren thóh ratshanàke ne Roiá꞉ner né꞉ne tehiotnekonthá꞉kwah kátshe ne raonakwáhtshera í꞉ken, wasnekíra kwáh tsiʼnió꞉re nonón꞉wa í꞉ken né nakéra ne tehiakoiatakentónhtha.

¹⁸ Kwáh iáh ónka thaʼhontetʼtsénhri nahonsakonwasaríhne iekaníhare ratiʼkwékon ne ratiksaʼokónhas tsi nihá꞉ti ne kwáh ahónha iakawenhnakeráts꞉ton; iáh ónka tahonteʼtsénhri nahontakonwanénhtsa iekaníhare ratiʼkwékon ne ratiksaʼokónhas ne kwáh ahónha iakawehiáron.

¹⁹ Né kí꞉ken teiorihwá꞉ke tsi nenhsahiatórenhne —ónka né skát꞉ne ahiʼseninhikonráksen?— kaieshá꞉tshera tánon atkaronhniátshera, atonhkariákon tánon nasareʼkó꞉wa— ónka nahonsaʼiesanikonraʼnírate?

²⁰ Né seiohokónhas wahotiʼnikonráton, thóh ratiʼiatakérons tsi tekaiósaiens ne tsi naʼtekanatokénhserons kwáh tsi ní꞉ioht noskenón꞉ton roʼiatotaréhon ahá꞉rake; kwáh né ratiʼiataná꞉non ne raonakwáhtshera ne Roiá꞉ner, né꞉ne raoʼtewenhnaientónhtshera ne sahʼNí꞉io.

²¹ Né ká꞉ti aoríhwa satahónsatat kí꞉ken, í꞉se ne sewatkarewá꞉tons, í꞉se ne sewanonwahratónhon, ók iáh kíʼ onenhará꞉keri thóh teioiéren:

²² Né kí aoríhwa rá꞉ton ne Rawenni꞉io, né Roiá꞉ner, né sahʼNí꞉io rahónha tesakorihwakénhaʼse ne raoʼtirihwasónhas ne rahonkwetaʼshónhas: Satkátho, wahkónkwah ne tehiontnekontákwah ne tehiakohiathaʼkentónhkwah; iáh nonwénton shé꞉kon tahonsasnekíra nètho katʼsákon nakenakwáhtshera.

²³ Tánon né entekhéhion ne iesaronhiakéntha, tsi nikáien né iesénhni, “Tesatsáket, né nahónton nakwahrathatséshon”; tánon né washón꞉niaʼte ne tsi tiónnhe tsi ní꞉ioht nokénhra tánon thóh ní꞉ioht kwáh né꞉ne tsi takanatokénserons tsi nón꞉we nihonténties.