Isaiah 50 - Ohiatonhseratokénti

¹ Né aoríhwa rá꞉ton ne Roiá꞉ner: Kaʼnónwe nikáien ne sanisténha akohiaʼtónsera ne tetiontekhaʼshátha né tsi í꞉seh ieshékhere ne sanisténha nakonháke? Khés ká꞉ton kén ónhkak tsi nihá꞉ti ne khekaròtani ronón꞉ha ne wakheiathenhnínonse ní꞉se? Iáh, né wakarihónhni ne sarihwaneraháktsheras tsi wahesathenhnínon, tánon né꞉ne saterihwatewatónhtsheras wakarihónhni ne sanisténha tsi wahontateʼnhó꞉ton.

² Onhnontiéren tsi iáh ónhka thóh tèienskwe ne sháʼkewe? Nontiéren tsi iáh ónhka thaʼieiakorihwasehrá꞉kwen shaʼthontonkhénrete? Niskaʼtianésa kén, tsi iáh takakwéni nahonsahiakoniá꞉kente? Khés iáh tesewakeshatsʼtenhseráien nahonsakʼkhenónsthate? Né tsi wakatewenhnaiéntonʼwe wasthátʼthate ne kaniatarakhekó꞉wane, Né wakónhniaʼte ne tsi kaniataraténions iahonwenhtsaʼthénhake iahónton; nahotiʼtionʼshón꞉has waʼkentsakérane ne tsi iáh teskanekáien, tánon wahonhníheʼie ne tsi nihotiʼniatáʼthens.

³ Né wakserónhniate ne tsi karonhiáte kahontsistóskon, tánon káiare wakónhni né꞉ne ahonteróhrotste.

Né Ranhá꞉tsera Rahotehénsera Tánon Shonʼwahsenhnaserónhni

⁴ Né Roiá꞉ner Ní꞉io thaʼkáwi né rawenhnáson ne naʼsakoʼrihón꞉nien, ó꞉ni tsi niʼiákon nó꞉nen ronwatirihʼhonhniénhni né nahón꞉ton nahonkateriéntaraʼne onhní꞉iot tsi akheʼiatiénawaste ne teiakowiʼsenhéion tsi akhethá꞉rase. Niaʼtehioronhketsheráke ratiétha— raiétha nakwahónta né nakatahonsaʼtáte kwáh tsi ní꞉ioht tsi niʼiá꞉kon ne ionthaterihʼhonhniénhni.

⁵ Né Roiá꞉ner roʼnhotónhkwen ne tsi tekahontakáronhte, tánon kwáh iáh tewakateraiátakwen, iah tewakatsʼwaténion.

⁶ Thaʼkheiénhase neksónhne tsi nikáien ne iontsientánionskwe, tánon ne kenhokwáhkes tsi nikáien ne ionsthonhronhrtákwasʼkwe; iah teʼwakatkonsaʼséhton tsi nihionkenikonratsátakwe tánon tsi nihionkanitskerohseráskwe.

⁷ Né Roiá꞉ner Ní꞉io ratiénawahse; né ká꞉ti aoríhwa iáh kí tehionkatéhaton; né káti aoríhwa thóh nakatʼkonsanírate tsi ní꞉ioht nonénhia, tánon wakateriéntare tsi iáh kí tahionkatéhaʼte;

⁸ tsi nikáien ne satiatotaríshion ákta í꞉res. Ónhka ká꞉ti taiakenirihwakèhna? Ánion kí skát꞉ne tsi tethewá꞉tann. Ónhka ná꞉ha ne hionkát꞉konte Ánion kí ionkenenrót꞉tas.

⁹ Kwáh seh Roiá꞉ner Ní꞉io rahónha takéhnes; ónhka nahionkerihwàroh nahonkeníkon? Ratiʼkwé꞉kon enhotirihwakáhionse tsi ní꞉ioht ne iohkweniakahiónhon; kokhówa enhiakowará꞉ke.

¹⁰ Ónhka ne tsi nítsion tsiʼsewakweniénstha ne Roiá꞉ner tánon sewatewenhnará꞉kwah ne raoʼwenhnaókons ne raonhá꞉tshera, ónhka thóh nón꞉weh niien ne tsi tetiókaras tánon iah teiakóien ne kaswathétshera, né kí tsakétat thóh raosénhnakon ne Roiá꞉ner tánon ne ronhwaniá꞉hes ne akoʼNí꞉io?

¹¹ Ók sewakwé꞉kon kí sewahtekátha nó꞉tsire, sewaienthóntos tánon ne tesewatsiaʼtháton ne waʼtsiratónhkwas. Thóh sathénti notonkókon ne sátsire, tánon thóh tsi waʼtsiratónkwas ne satekàton! Né kí꞉ken ensèhna tsi nentká꞉tkaʼwe ne katsanáke: thóh ensatsatiónhnite ne karonhiakenserákon.