Isaiah 49 - Ohiatonhseratokénti

Né Ranhá꞉tshera Tsi Nihohiothenseró꞉ten

¹ Takwatahónsatat, Ó kawenótons, sewatahónsatat, í꞉se ne tsiónkwes naʼinónsons nió꞉re tisewenhterón꞉tons! Né Roiá꞉ner ratiaʼtarákwen nohénton sakennákerate, shé꞉kon akenisténha tsi iewirarákwah shiʼtiáti wahatiataráko.

² Né warón꞉niaʼte ne tsitʼsaká꞉ronhte tsi ní꞉ioht ne iosarothíʼie, thóh tsi iotasátare ne ratshaná꞉ke wahatsatásehte; wahakónhnien ne teiostarát꞉the kaiénkwiʼre, thóh tsi watethahástha ne kaiénkwiʼre wahatsatásehte.

³ Wahakénhase, “Israel, í꞉se nakenhátser isesarí꞉wa; nonkweshónhas tenhionkenonwetrá꞉ton.”

⁴ Ók wakí꞉ron, “Tsi watioténʼén wakathaʼteronhiakénton, Wakatieshá꞉ton naʼkeshatsʼténhsera né iáh othènon tekarihwástha tánon iáh thènen teioríhonte; eʼthohʼsàne orihwiʼiohónwe naʼkerihwashón꞉has tsi Roiá꞉ner nón꞉we nikáien, tánon tsi nahiontiéritʼtse Rawenní꞉ioke né nón꞉we nikáien.”

⁵ Tánon ó꞉nen ne Roiá꞉ner rá꞉ton, ónhka iontsatónhni ne tsi watewiʼrahrákwa ne raonhá꞉tsera aká꞉ton, tsi tahontahiʼiaténhawe ne Jacob rahonhá꞉ke, tánon nètho Israerʼró꞉nons nontiérenk rahonhá꞉ke niaʼhonsahónhne, aséken tekerénhsaron raohénton ne Roiá꞉ner, tánon né꞉ne Rawenni꞉io naʼkeshatsʼténhsera wahá꞉ton—

⁶ rá꞉tons, “Shó꞉tsi iáh tehióst꞉te né nakarihóten ní꞉se akenhá꞉tsera ashá꞉ton né nahonshaʼsehkétsko ne raoʼtsiókwah ne Jacob tánon nahonshaʼsehkwahtákwahse ne iateonathaténhron ne Israerʼronónke; entkónhion ne kaswatʼthétshera rononháke ne ronhnonhontsakeró꞉nons, né naʼtienawaséhtshera ahónton iakanihaʼrá꞉ne ne tsi iehiotonhontiokʼtani:hon.”

⁷ Né aoríhwa rá꞉ton ne Roiá꞉ner, né꞉ne sehsakoniaʼkénton NʼIsraerʼró꞉nons tánon né énska ne Roiatatoʼkénti í꞉ken, né꞉ne rahonháhak né kwáh í꞉ken tsi ronwahthaʼkwaswénhon, ronwashónhon ne ronhnonhontsaʼkeró꞉nons, ronwatenaskonhniá꞉ton ne ratiʼkoráhsons, “Né Rontinontí꞉ios nenhonwá꞉ken tánon kwáh kí thenhatítaʼne, né ronaterihóntons, ó꞉ni kwáh enhatiʼiatakerónhtaʼne tsenhatiʼkonsótane nonhontsáke, né enkarihónhni ne Roiá꞉ner, rahónha ne roriwatóken, Rahonháhak khók ne Roiatatokénti í꞉ken NʼIsraerʼronónke, né꞉ne rahónha iahiaʼtarákwen.”

Né Zion Akohiohʼokónha Tsi Thentonwatiʼiaténhawe Tsi Nón꞉we Nihotinón꞉shote

⁸ Né aoríhwa rá꞉ton ne Roiá꞉ner: Nó꞉nen shesaianerásthen tekonrihwaserakwéni, né tewenhniseráteʼkwe ne kaiatakeʼnhá꞉tshera konsnié꞉non; koniatienawáhstonʼne tánon tkonhiawíhon tsi ní꞉ioht naʼterihwaseronhniátshera nonkweʼtakwékon akorihwáke, né naʼkarihwakwathákwenhke nonhóntsa, takaiakhónhionke ne iahontsaiesáhon tionhontsaʼshónhas;

⁹ sakawenhníhaʼkwe ne ratinó꞉ton, “Tasewahiáken,” né tsi nítsion ne tetsiókaras nón꞉we sewénhteron, “Sewathaté꞉nest.” Kwáh enhonwatinón꞉te tsi niʼiohá꞉hes, akwékon nentʼthón꞉nete ne éhʼnekens ionhniaʼrónhnions kwáh thóh nón꞉we naʼthenhontskahónsehke;

¹⁰ kwáh iáh tahontonkárhiake khés nahotiniatákʼthen, iáh ne iowerataríhen khés ne kará꞉kwah thaʼtahiakowisenhéiate, asèken tsi nikáien né tesahkoró꞉ton kwáh né ensakohéntenhse, tánon ákta tsi kaionhatáties nonèkanos nón꞉we nenhsakohénthenhse.

¹¹ Tánon kwáh né iatentʼkaraténiaʼte ne tsi wakatenontarónhnions nowahashónhas iahónton, tánon ne akáwenk iohahowánens kwáh kí enkaharatátonʼke.

¹² Satʼkátho, kwáh ahiʼnonkówa nón꞉we nentónhne, tánon satʼkátho, né kí꞉ken nothoré꞉ke tánon tsi iatewatʼtsénthos, tánon né tsi nikáien thóh nentʼthón꞉ne tsi tiohontsáien ne Syene.

¹³ Tesehwarí꞉wak natonnarátshera, Ó karonhiakésons, tánon satonnáren, Ó ohóntsa; thontasótkaf, Ó tsi ionontarón꞉nions, tesewarí꞉wak! Asèken ne Roiá꞉ner wasakonikonraníraʼte ne rahonkwetashón꞉has, tánon kwáh ensakótenhre tsi nikáien ne rotironhiákens.

¹⁴ Ók Zion wakénron, “Né Roiá꞉ner rakatewentéton, natiá꞉ner ratiaʼtanikonrénhʼen.”

¹⁵ Ahkakwé꞉ni kén ne iónkwe ahiakohiaʼtanikónren ne iakostarónt꞉tha ieksá꞉a, khés ne iáh tawénesʼte nahontahiotenonwát꞉then nahiakoténhre ne ieksá꞉a né kwáh ahónha tsi watewiraʼrá꞉kwah nitsakawénon? Iekaníhare kí꞉ken ahónton nahiotinikónren, kwáh kí ní꞉i iáh takonhiatanikónren.

¹⁶ Satʼkátho, konsénhnare né katshánakon; né shaʼshontahshón꞉ʼahs ieiokonthá꞉kwen tsi akʼkhénton ká꞉ien.

¹⁷ Né tseʼsatenhenronniénhnis tsi nihatiʼiatastó꞉re tesakotiʼiataskénhnies ne teiesathenhenraʼriténhnis, tánon tsi nihá꞉ti ne ieshaʼtsesaténhnis éhʼren shonnhétha ne shonháke.

¹⁸ Satarakétsko tesatʼkarateníhon tánon satkátho; ratikwé꞉kon ronanitsiokwahró꞉ron, shonháke tahón꞉ne. Tsi niʼioriwí꞉io tsi nikónnhe, rá꞉ton ne Roiá꞉ner, kwáh ratikwé꞉kon ensehiátste tsi ní꞉ioht natʼnió꞉ta, tánon ní꞉se enseráseste tsi ní꞉ioht ne ioniá꞉kon.

¹⁹ Oriwiʼiohónwe ne satsesátons tánon ne iáh othènon teskarihwásthas ne tsi tsíteron tánon ne shonhóntsa ne iahontsaiesáhon— oriwí꞉io ó꞉nenh kí shó꞉tsi thentisewá꞉rake ne tsi sewaná꞉kere, tánon tsi nihá꞉ti né iesahetkenténhni ahiʼnonkó꞉wa ienhonhnésheʼke.

²⁰ Né ratiksaʼokónhas ne ronahnakerá꞉ton ne shiʼsatʼtiónhnionkwe kwáh kí ensí꞉ron tsi nenhsathón꞉teke: “Né tsi kíteron shó꞉tsi titkanenhráhere nakerihwá꞉ke; takenatʼtasehrónhnien tsi nón꞉we nakiterón꞉take.”

²¹ Eʼthó꞉ne ensí꞉ron ne seriá꞉ne, “Ónhka rakenakeratsʼténhni kí꞉ken ratiksaʼokónhas? Wakatʼtiónhnionkwe tánon iah thaʼhónton nahonsonkewiʼraiéntaʼne, wahonkanakerákwahte tánon wahonkatékwahte— ká꞉ti ónhka ronwenhnehiáron kí ratiksaokónhas? Iaʼtesewatsiatístonkwe— kaʼkáti nón꞉we nithonénon kí꞉ken ratiksaʼokónhas?”

²² Né kíʼ aoríhwa rá꞉ton ne Roiá꞉ner Rawenni꞉io: Kwáh iostó꞉re enkheianentsakétsʼkwase ne ronhnonhontsakeró꞉nons, tánon entkétsko naʼkatenienténtshera nonkwé꞉ne; tánon kwáh enthonwatiʼhiaténhawe ne sewanekenteronhtsheraʼshónhas enhonwanakí꞉taronh, tánon ne sehiohonkónhas tsionathonwísen ratiʼnenhsá꞉ke nenhʼnéʼe enkontitskwáhratse.

²³ Rontinontí꞉ios kwáh né thensakotísnieʼne ne kanísera enhónton, tánon né iotinonhtí꞉ios né thenkóntsniene né kanisténhsera enkónton. Onhwenhtsáke nienhontserá꞉te tsi thenhontʼtsakéte ne sewahénton, tánon eniesasitakànonte tsi enhonkenrarónhko ne sasitàke. Ethó꞉ne ensateriéntarane tsi I꞉i ne Watiá꞉ner í꞉ken; tsi niʼiákon ne ionkerá꞉re kwáh kí iah tahonwanatéhate.

²⁴ Ahónton kén nahonwariotákwah ne roshatsʼtenhserowánen, khés nahonsahionthatenhotónko tsi nisakonhó꞉ton ne ranatakáriaks?

²⁵ Ók ne kí aoríhwa rá꞉ton ne Roiá꞉ner: Iekaníhare ne sakonhó꞉ton ne roshatsʼtenhserowánen tsi ienhiontatsaténhaʼwe, tánon ne raorió꞉ta ne ranatakáriaks tsi entiontatewenhní꞉ione; asèken enhiʼiatʼkónthen tsi niʼiákon eniesatʼkónthen, tánon kwáh ensehkhenónstate ne sehioʼokónhas.

²⁶ Kwáh I꞉i enkhehiónhnien ne teieshonnaríkʼkhons né꞉ne ahónhneke né kwáh roʼnónha raotiwá꞉ronhne, tánon kwáh kí né enhotiʼnonwaráthonʼte ne roʼnónha raoʼtinekwénhsa tsi shí꞉ken ní꞉ioht nonenhará꞉keri. Eʼthó꞉ne onhkweʼtakwékon enhiakotó꞉kenhse tsi I꞉i ne Watiá꞉ner í꞉ken né꞉ne shiaʼiatákwen, tánon né꞉ne shiaʼiathotaríshions, né꞉ne Roshatsʼtenhserowaʼnenhkówa né Énska í꞉ken ne Jacob.