Isaiah 48 - Ohiatonhseratokénti

Né Rawenni꞉io Rahónha Roshaʼáhnion Tánon Sesakohiatákwas

¹ Sewahthón꞉tek kí꞉ken, ne tsiónkwe NʼIsraerʼronónke, né ronwanatónkwen ne kasénhna Israel, tánon ne rahónha thóh nón꞉we nitawénon tsi nontakawatsiratátie ne Judah; rahónha rorihwaniráton raosénhnakon ne Roiá꞉ner, tánon iaohná꞉ton ne Sakowenní꞉io NʼIsraerʼronónke, ók iáh noriwí꞉io khés ne tkariwaiéri akénhake.

² Asèken né rontatenatón꞉kwah tsi niʼiosenhnó꞉ten ne ionatatokénti, tánon ne ronwaniahésen ne sakoʼNí꞉io NʼIsraerʼronónke; né Sakoiá꞉ner ne ratiʼronhiakeró꞉nons né꞉ne raosénhna í꞉ken.

³ Né tiotihénton norihwasónhas I꞉i tewakerihwatét꞉ton ne wahónhnise tkènhne, tsitʼsaká꞉ronhte tiotihiakénʼon tánon waʼkerihowanáton; eʼthó꞉ne thontaiawéhnstsi thóh nátiere tánon thóh nahá꞉wenhne.

⁴ Né aoríhwa waʼkateriéntaraʼkwe tsi niʼsewahtenikonrakʼsáton, tánon ne sewahniá꞉rake karisthá꞉tsi sewahtsinonʼiátare tánon ne sewahkenkwaráke otsínekwar niʼkaristó꞉ten í꞉ken,

⁵ Í꞉i tekwahrihwatʼtheténhni ne tsi niʼtiotásawe ne wahónhnise tkènhne, nohénton thóh saiáwenhne wakwarihowanáthen, né ká꞉ti ne tó꞉sa ahiʼsewénhron, “Né natiatónhni thóh naká꞉sa, né꞉ne wakaratákwen atiatónhni tánon né karístatsis atiaʼtonhnisónhas tahonanónhtonhse.”

⁶ Sewahrihwahrón꞉ken wá꞉hi; ó꞉nenh kí orihwakwé꞉kon kí꞉ken sewatʼkátho; tánon kwáh iáh thahiʼshewarihówanate? Kwáh kénʼen ienwatásawenh entsiónhnien nahiʼsewahthón꞉tene norihwáses, né꞉ne ioʼterihwaséntonh né iáh tesewahteriéntaraʼkwe.

⁷ Kwáh oríhwase tsi niʼkashaʼáhnion, iáh ne tèken ne wahón꞉nise ahontakáshonke; nohénton nón꞉wa wenhniseráte iáh othènon tesewarihwarónhken, né ká꞉ti iáh tahiʼsewakwéni nahiʼsewénhron, “Ó꞉nenk shiʼhionhkwahteriéntarahkwe.”

⁸ Iáh nonwénhton tesehwahrihwáronhke, iáh nonwénhton tesehwarihwaientérikwe, Tsi niʼtsiotásawen norihwakáion né sewahontakéshons iáh teiotenontónkwenhne. Asèken wakateriéntaraʼkwe ní꞉se tsi iáh tahiʼsewariwatokénhake, tánon kwáh shontesehwanákerate shiʼietsinatónkwah sehwarihwanón꞉we.

⁹ Asèken aksénhna aorihwá꞉ke tsi sakenískwahte naʼkenakwáhtshera, Asèken ne aorihwá꞉ke naʼkenonweratón꞉tshera tsi sakatatènese ní꞉se sewarihwáke, né ká꞉ti ne tó꞉sa akwathónhte.

¹⁰ Sewatʼkátho, I꞉i wá꞉hi skwahiathaʼkwahtákwen, ók iáh thóh tewahtieren ní꞉ioht ne kawistará꞉ke aiakóhetste tsi iotékha; wakwahteniénten thóh tsi iotékha ne waterihwentore.

¹¹ Asèken I꞉i akerihwá꞉ke, asèken I꞉i akerihwá꞉ke, ehnéntiere, asèken nontiéren naksénhna tsi akonwasenhnáksaʼte? Naʼtiatanerakwáhtshera kwáh iáh ónka nakó꞉ren tethekheiaʼwí꞉re.

¹² Takwahtahónsatat, Ó Jacob, tánon Israel, ronónha iekhená꞉ton: I꞉i ne Ní꞉io í꞉ken; I꞉i nó꞉henton í꞉ken, tánon I꞉i nonàken í꞉ken.

¹³ Katshanáke iotskwáhere ne tsi ionwenhtsáte, tánon né kheweientethákwen watʼkatakwáhriʼte tsi karonhiátes; nó꞉nen shontakatáhti, óksak thóh nahá꞉wenhne.

¹⁴ Sewatsatarórok, sewakwé꞉kon, tánon sewatʼthóntek! Ónhka né tsi nítsion tahorihwathéthonʼke kí꞉ken naorihoténsons? Né꞉ne Roiá꞉ner ronorónhkwah; né enhohióten ne raoʼioténhsera ahonháke ne Babylon, tánon ne raoʼshatsténhsera né enhiaʼkokʼkónten ne Chaldearó꞉nons.

¹⁵ I꞉i, kwáh ó꞉ni I꞉i, wakatatíʼhon tánon iehináton, I꞉i thiʼhiathénha, tánon kwáh enhoianerásthen tsi nienhénre.

¹⁶ Tiaták꞉ta nontáse, sathón꞉tek kí꞉ken! Né kwáh shiʼtiotásaʼwe tsi wakatatíhon kwáh iáh tewakerihwaséhton, né shiaʼkáhewe nètho naʼiáwenhne kwáh èhʼtho Í꞉keskwe. Tánon nón꞉wa né Roiá꞉ner Rawenni꞉io thaʼkatórion tánon né raonikonriʼiosthóntshera.

¹⁷ Né aoríhwa ráton ne Roiá꞉ner, Né shiaʼiatákwen, né꞉ne Roʼiatatokénti khók í꞉ken NʼIsraerʼronónke: I꞉i ne Watiá꞉ner Saní꞉io, tsi nikáien ne iaʼrihonhniénhnis né꞉ne iateshiá꞉ti khók sarihwá꞉ke, tsi nikáien iahéntenhse tsi nihiohahóten asatʼthahíta.

¹⁸ Ó ní꞉se nahiʼsathahonsatá꞉tonhke naʼkwatsawenhrátsheras! Eʼthó꞉ne ne sahiataterítshera thóh nahiotón꞉hake tsi ní꞉ioht né nakaniaʼtaratátie, tánon tsi niʼsaterihwathentiáton kwáh né꞉ne tsi ionontakwarontátses kaniatarakhekówaʼne;

¹⁹ tsi waswá꞉tsi ratátie thóh nenhnéʼe nahiotón꞉hake tsi ní꞉ioht nonesarónhkwah, tánon tsi niensatʼwatsiríhne kwáh né꞉ne ahotsinétaras, né raoʼtisénhna kwáh iáh nonwénton tahonthón꞉tonke khés nahiónthonʼte nakʼkhénhton.

²⁰ Thonʼtatsiákenk ne Babylon, thonʼtasatèko ne Chaldea, satʼró꞉ri kí꞉ken tsi naʼtenhsahénreʼte natʼtsenhnonhniátshera, serihó꞉wanat, iaʼsaténiet ne tsi ieiotonhontioktaníhon; tsíronh, “Né Roiá꞉ner shoʼhiatákwen ne raonhá꞉tshera Jacob!”

²¹ Iáh teotiniaʼtatʼthénʼen nó꞉nenh shaʼsakohéntenhse ne iaʼhonwenhtsaʼthénhake; tahanekóten nosthenràke ne raotirihwá꞉ke; waʼtatsthenró꞉ren tánon takanawí꞉nekenʼne.

²² “Iah tehotí꞉ien ne skénnonk thaʼkénhake,” rá꞉ton ne Roiá꞉ner, “né rotiʼrihwanerahátskon.”