Isaiah 45 - Ohiatonhseratokénti

Né Roiá꞉ner Cyrus Waoiatará꞉ko

¹ Né kí aoríhwa rá꞉ton ne Roiá꞉ner rahonhàke né roiatará꞉kwen né꞉ne Cyrus, tsi nikáien ne saweientetákwen riʼnentsawá꞉kon né nasakotsatakwení꞉ioste niaʼkahontsakeró꞉nons ne raohénton tánon naharíhsi ne rontiʼnontí꞉ios raonatiátawis wakóhses, né nahontenontonhkwehá꞉tons ne raohénton— tánon ne ioʼthenhenrenhtónhnions iáh thaʼhonsakanó꞉tonhke:

² Kwáh raohénton enkaténhti tánon entʼtakwahrísi ne tsi ionontowá꞉nens, kwáh kénk nenhwáske tsi thentʼrihtánion ne tsi kanonkarónhtons ne otsínekwar nikaristótens í꞉ken tánon ientsiatʼtánion ne tekaristharenhwá꞉nions,

³ Kwáh entʼkónhion nahotsiokowátsheras ne tsi tetsiókaras tánon né kanorónhsons ne wasehtánions tsi nonwésons ne iohterihwasehthá꞉nions í꞉kens, ká꞉ti naiʼsateriéntarane tsi I꞉i séh, ne Watiá꞉ner í꞉ken, I꞉i kheʼNí꞉io Israerʼronónke, tsi Í꞉i iekonhnáton ne kwáh tsi nisasenhnóten.

⁴ Asèken né raorihwá꞉ke nakenhá꞉tshera Jacob, tánon Israel né rihiaʼtarákwen, I꞉i iekonhnáton kwáh tsi nisasenhnóten, I꞉i konsenhnáwi, iawerohátien tsi iáh testsientérihkwe.

⁵ I꞉i ne Watiá꞉ner, tánon iah ónhka nakó꞉ren né꞉ne akénhake; né tsiaʼtákʼta iáh nó꞉ia tekáien ne Ní꞉io akénhake. I꞉i konshatstenhseráwi, iawerohátsien tsi iáh testsientérihkwe,

⁶ né ká꞉ti nahónton aonateriéntaraʼne, kwáh tsi nentkarakwínekenhne tánon kwáh tsi nió꞉re iatewatʼtséntʼthos iéken, iáh ónhka ne tiaʼtákʼta tèrate; I꞉i ne Watiá꞉ner í꞉ken, tánon iáh tekáien nakó꞉ren né꞉ne akénhake.

⁷ I꞉i wákshon ne teioswát꞉te tánon wák꞉shon ne tetsiókaras, I꞉i kónhnis ne kaiataterítsheras ó꞉ni kónhnis nateraswaksénhtshera; I꞉i ne Watiá꞉ner thóh nitié꞉ra ki naorihoténsons.

⁸ Iotsataratsiéson naiokénhnoʼre, Ó karonhiakésons, né éhʼneken nahontá꞉we, tánon ánion ne tsi karonhiátes ne tsiokénhnóre ne karihwakwahrishióntshera; ánion watenotónhko tsi ionwenhtsáte, né꞉ne kaienawaséhtshera ahontaká꞉reke, tánon né ahiónhni ne karihwakwahrihshióntsheras tahiót꞉kaʼwe; I꞉i ne Watiá꞉ner wakʼsahánion.

⁹ Rothentá꞉sere ónhka né teotirihwá꞉te ne rohiatíson, nonawatsʼtakarí꞉io kát꞉ses teotirihwate ken ne ratʼtsetónhnis! Nonawatsʼtakarí꞉io rawénhni kén tsi nikáien ne roierontónhni, “Onhnahó꞉ten shonhnihá꞉tie”? khés “Né sahioténsera iáh tehioshióntons”?

¹⁰ Roʼthentásere nónhka nahawénhase ne roʼníha, “Onhnahó꞉ten senakeráts꞉tha?” khés nakonwénhase ne tiotonwí꞉sen, “Onhnahó꞉ten tsi nisaronhiáken?”

¹¹ Né aoríhwa rá꞉ton ne Roiá꞉ner, né nek khók Roiatatokénti í꞉ken Israerʼronónke, tánon rahónha raiatíson: Kwáh kén enskerihwanontonhniónhase tsi nó꞉kwah ne khehiohokónha, khés nasekró꞉ri tsi nikaiothenseró꞉ten ahontsióten ne katsaná꞉kes?

¹² I꞉i wakonhontsíshon, tánon kehiatíson nonkweʼshónhas thóh khéteron; né꞉ne katsanákes tehiotakwahríhton ne tsi karonhiátes, tánon I꞉i kheriwáwi ratikwé꞉kon ne ratironhiakeró꞉nons.

¹³ I꞉i riʼkétskwen ne Cyrus thóh karihwaʼkwahrishiontsherákon, tánon kwáh ne enkónhniate ne tsi rohatá꞉tie nahiotʼtahakwahríhshionʼke; rahónha enhakenatónhnien ne kanatowánens tánon ensakorihwakwahtákwaʼse nahonsahontaʼtewenhní꞉ioʼne nakonkwetaʼshónhas, iáh né nahotʼkárhiakse khés ne tahonwarihwaserasákwahse, rá꞉ton ne Sakoiá꞉ner ne ratironhiakeró꞉nons.

¹⁴ Né kí aoríhwa rá꞉ton ne Roiá꞉ner: Naokwahséhtshera ne Egypt tánon naothenhninónseras ne Ethiopia tánon ne Sabeans, ratiʼnenhiésons, í꞉sehke nenhtón꞉ne tánon í꞉se ensatonhkweʼtaráko, kwáh kí eniesanonteratsésehke; kwáh entón꞉ne oronwása tehatiʼnenhstérens tánon thenhontsákete ne shonháke. Kwáh kí eniesaterenhnaiénhase, rontón꞉nions, “Rawenni꞉io kwáh shonhahákʼkhok senikwékon, tánon iáh ónhka nakóren akénhake; iah nó꞉ia tekáien né Ní꞉io akénhake tsi nòkwah ne rahónha.”

¹⁵ Oriwiʼioónhwe, í꞉se ne Ní꞉io í꞉ken í꞉se sataséhtha ne sonháke, Ó Sewenní꞉io NʼIsraerʼró꞉nons, ne Sakoiatákwas.

¹⁶ Ratikwé꞉kon tsi enhonwanatéhaʼte tánon tehonanitonniénhni, ne ratiʼiatonhniserón꞉nis teonanitonhniénhni tsehatiʼkwékon.

¹⁷ Ók né Israel Roiá꞉ner né shaʼnónstaton né꞉ne tsi nénhwe enkénhake ne kaniakénsera; kwáh iáh taiesatéhaʼte khés ne taiesanitonʼniáthen né tse wakwé꞉kon tsi enkatátseʼke.

¹⁸ Asèken ne aoríhwa rá꞉ton ne Roiá꞉ner, tsi rahónha ró꞉son ne tsi karonhiá꞉tes (rahónha ne Ní꞉io í꞉ken!) rahónha raieronhtón꞉ni ne tsi ionwenhtsáte tánon rahónhni (rorihwanirá꞉ton; iáh né teosahá꞉ton ne tsikʼtsaiawénhon, né rahonhniá꞉ton naienákereke!): I꞉i ne Watiá꞉ner, tánon iáh ónhka nakó꞉ren né꞉ne akénhake.

¹⁹ Iáh othènon tewakatatíhon notsahonskwáhkon, thóh tsi ionhontsáien ne tetsiókaras; Iáh tekheiénhni tsi nitotʼwatsiríhnon ne Jacob, “Takwahiaʼtísak ne tsikʼtshiewátion nón꞉we.” I꞉i ne Watiá꞉ner né katróris norihwí꞉io í꞉ken, Né kenéstha tsi nahó꞉ten ne tkarihwaiéri í꞉ken.

Né Kahiatonhnisónhas Iah Thaʼkontikwéni Nakonwanónsthaʼte Ne Babylon

²⁰ Tesewatatsataʼrórok tánon skát꞉ne sewáton, ákta í꞉sewet, í꞉se ne iatesewataténron tionhontsakeró꞉nons! Iáh teotí꞉ien naʼtokhátshera— né꞉ne tsi niháti ratihawinóntses nó꞉iente raoʼtihiatonhnisónhas, tánon thoʼtikontákwen konwaterenhnaiénhni ne raotiní꞉io né꞉ne iáh thaʼkakwéni naʼhiakonónsthaʼte.

²¹ Tesewariwát꞉tet tánon tsiotá꞉si né sewarihwasónha; ánion skát꞉ne ratiʼtsiénhaien! Ónhka kí꞉ken iakokʼróri ne wahónhnise tkènhne? Ónhka iakorihotáshion norihwakáion? Iáh kén Í꞉i tèken, né Watiá꞉ner? Iáh kén ónhka né Ní꞉io akénhake tsi nó꞉kwah ní꞉i, né꞉ne roiánere Ní꞉io tánon Sakoiatákwas; iáh ónhka nó꞉ia tekáien ne ók ní꞉i.

²² Akonhàke nontashátserat tánon enshaʼtatenónsthate, tsewakwé꞉kon ne tsi iehiotonhontsioktaníhon! Asèken I꞉i ne Ní꞉io í꞉ken, tánon iáh tekáien nakó꞉ren akénhake.

²³ Iahteʼtsiáti khók wakerihwanirá꞉ton, tsiksakáronte tioiakénʼen tsi nieʼiawénon ne karihwaʼkwahrihshióntshera né nowénhna né iáh thatahontónkete: “Ní꞉i kwáh tsi niaʼteiekwitsàke tsi thenhiontentʼtsóten, kwáh tsi niaʼtewenhnasàke tsi enkarihwaníraʼte.”

²⁴ Kwáh rahonháke khók ne Roiá꞉ner, nón꞉we nenhionkʼthá꞉rakwe, né꞉ne karihwaʼkwahrishióntshera tánon kashatsténhsersa; tshiehatiʼkwé꞉kon ne ronhwaná꞉kwase kwáh rahonhàke nentʼthón꞉ne tánon enhonwanatéhate.

²⁵ Rahonhàke né Roiá꞉ner nón꞉we ratiʼkwé꞉kon ne sakoiohokónhas ne Jacob kwáh kí enhontkwéni tánon enhontonnháren.