Isaiah 42 - Ohiatonhseratokénti

Né Ranhá꞉tsera Ne Nakoswatʼthétshera Niaʼkahonwenhtsakeró꞉nons

¹ Kénʼen í꞉res nakenhá꞉tsera, rahónha thiʼiatsʼwanónhne, í꞉i rihiaʼtarákwen, rahonháke nakwatón꞉nhets iawerientiʼióstha; wá꞉tsien nakenikonratokentítshera rahonháke; kwáh enthesakohawíthen ne kariwakwahrishióntshera niaʼkawenhtsakeró꞉nons

² Kwáh sèh iáh thaʼtahaséntʼtho khès nahatewenhnáthete, khès né꞉ne arón꞉niate naiakothón꞉tene tsi tekanatokenháton;

³ ne iohiothontakwarátshon kwáh iáh thaʼtaháiake, tánon ne kénk nitsiótʼte tsi iotèkha ne wathaserotákwah aseríʼie kwáh kí iáh tahaswá꞉the; kwáh kí enhiorihwatókenke tsi enthá꞉hawe ne kaiáneren.

⁴ Kwáh iáh thaʼhontahoserónhnenhte iáh ó꞉ni tahanikonrók꞉ten tsi nió꞉re enhá꞉ien ne kaiáneren tsi ionwenhtsáte; tánon ne tsi kawenó꞉tons iotirá꞉re ne raorihonhnienhnítshera.

⁵ Asèken rá꞉ton ne Rawenni꞉io, né Roiá꞉ner, tsi rahónha róshon ne tsi karonhiáte tánon waʼthatirónhten, rahónha teotakwahríton ne tsi ionwenhtsáte tánon tsi nahó꞉ten ne nón꞉we nitkáhas, rahónha shaʼkotonrietserá꞉wi nonkweshón꞉has ne tsi ionwenhtsáte ó꞉ni nonikónra tsi nihiákon né thóh nón꞉we naʼtehiontekhaʼhákwah:

⁶ í꞉i ne Watiá꞉ner í꞉ken, kariwaʼkwahrishiontserákon tsi iekonhnáton, Iekonhiaténha tsi wakonhiaʼtsána tánon wakoniatiénawasʼte; Shonhàke nón꞉we nenhkónhni naterihwasehronniátshera né nonkwetaʼkwékon akorihwàke, né꞉ne akoswaʼthétshera nonkweʼshónhas,

⁷ né꞉ne tahonsahiontkakwahrísi ne teieronhwé꞉kon, né nahonsahiontaʼtsatínekenhwe ne ienhó꞉ton ne tsi ionthaʼtenotónhkwah, né tsi iontaʼtenhotónkwa tsi niháti thóh ratíteron ne tsi tetiókaras.

⁸ Í꞉i ne Watiá꞉ner, né naksénhna í꞉ken; natiatanerakwáhtshera kwáh iáh nónka nakóren tethekheʼiáwis, khès naʼkerenhsarónhtshera né satahionkwáhwenhke ne kaiatonhnisónhas.

⁹ Satkátho, né tsiotihénton noriwashónhas wakontóhetste, tánon né norihwá꞉ses ó꞉nen sakatróri; nohénton nahontakónt꞉reke, í꞉se wakonró꞉ri nahotiʼrihwasónhas.

Né꞉ne Karénhna Ne Teiontenonweratónkwah

¹⁰ Thetsisewarihwá꞉kwas ne Roiá꞉ner né norénhnase, né raohiatanerakwáhtshera né꞉ne tsi ioiotonhóh꞉tiokʼte iekaníharas! Ánion ne kaniatarakhekó꞉wane iorákarak tánon akwé꞉kon nètho nón꞉we natekontawénries, né tsi kawenhó꞉tons tánon né ienakekenion.

¹¹ Ánion ne iahonwenhtsaʼthénhake tánon ne kanataiéntons kontewenhnakétsko, né nikanatásas né Kedar nón꞉we niʼienakeré꞉nion; ánion ne tsi ienakeré꞉nion ne Sela teieríwak natsenhnonhniátshera, ánion thethoʼtihénret ne onhnotoharakéshons tsi ionhnontarónhnions.

¹² Ánion thón꞉ion ne kaiatanerakwáhtshera ne Roiá꞉ner, tánon rontʼró꞉ri ne kanonweratónhtsera ne tsi kawenhó꞉tons.

¹³ Né Roiá꞉ner iahaténti tsi ní꞉ioht ne raterí꞉ios, tsi ní꞉ioht ne raterí꞉ios tahonakwénhsere; iathohénrete, iorakaréni tsi wathohénrete, teiotenonʼianíton tsi wahathaténesʼte rahotihénton ne ronwáshons.

¹⁴ Asèken karíhwes shiʼwatienawákon nakáwenk ne skénnon í꞉ken, sakʼtiwakatatón꞉nikwe tánon wakatatienawákon; ó꞉nenh kí kwáh thenwakhénrehte tsi ní꞉ioht ne iónkwe iowiraientásere, enkatonrióthaʼke tánon thenwakenakwahráhonhke.

¹⁵ Kwáh enkerihwaiésate ne tsi ionhnontarónhnions ó꞉ni tsi ionhniarónhnions, tánon enstatʼthá꞉te nahotiʼientʼthó꞉tsheras; kwáh né iatentʼkaraténiaʼte ne tsi kaniatarénions ne kawenhó꞉tons ahónton, tánon enstátʼthate tsi kanekón꞉nions.

¹⁶ Kwáh enkhehéntenhse ne teieronhwèkon né tsi iohatátie ne iáh tehatihaientéri nakohianaken ioháte ne iah tehatiʼientérihkwe Kwáh í꞉i enkeiatenhnikonráren. Kwáh tentʼkaraténi ne tetsiókaras thóh rahotihénton tahioswát꞉thene, ne watenatáʼshens nahontonhontsakwahrísi. Né kí꞉ken nahorihoténshons tsi thóh nénhtiere, tánon iáh takheiatewénhtethe.

¹⁷ Kwáh kí thenshonwatiʼkaraténi tánon kwáh í꞉ken tsi enhonwanatéhaʼte— né꞉ne tsi niʼiákon tkonʼwetákwen ne kahiatónhni né wakaratákwen tsi tetkonwatenienténston, ronón꞉ha ne rónhton í꞉seh iasewáti ne kaiatónhnis, “Í꞉se nón꞉kwah Ní꞉io í꞉ken.”

¹⁸ Sewatahónsatat, í꞉se ne tesewahontaʼkwákon; tánon ní꞉se ne tesewaronhwèkon, sewatarakétsko tánon sewatkátho!

¹⁹ Ónhka ne teieronhwèkon ne ók nakenhá꞉tshera, khés ne tehionhontaʼkwékon kwáh tsi ní꞉ioht nakonkwé꞉ta ne rakerihwakareʼniénhnis tsi nikáien iehiʼiatórion? Ónhka ne teieronhwékon kwáh né꞉ne akonkwéta ne riniahésen, khés taieronhwèkonh kwáh tsi ní꞉ioht ne raonhá꞉tshera ne Roiá꞉ner?

²⁰ Wé꞉so iorihwàke ratkáthos, ók iáh kí tehatenikonráh꞉ra; né rahóntake iotenontónhkwen, ók iáh kí tahothónhtene.

²¹ Né Roiá꞉ner rawerienhtí꞉ios, asèken né aorihwàke ne raoʼrihwakwahrihshióntsheras, né nahakówanate ne raorihonhnienhnítsera tánon ne enrónhniaʼte nahiorihwanerakwáhtonke.

²² Ók né kí꞉ken nonkweʼshónhas ne ronwatiʼnenskwenháton tánon okontʼronhwenhnón꞉ni, ratikwé꞉kon rotiʼiatotarehon ne tsi iokarónhtons tánon ronwatiʼiatashé꞉tons tsi ionthatenotónkwas; wahatiʼronhiáken iáh ónhka teshonwatiʼniakénton, rotihetʼkénʼen iáh ónhka teiáwen, “Tsetikwahtáko!”

²³ Ónhka ne tsi nítsion ahiontahónsathaʼte kí꞉ken, ónhka naʼionthenhnikonhráren tánon ahiontahónsathaʼte né tsi nienkáhewe?

²⁴ Ónhka iehonwatʼkáwen ne Jacob rahonhàke ne rahetkéntha, tánon ne Israel rononhàke ne ratinénskwas? Iáh kén Roiá꞉ner tèken, ne tsi ionkwahrihwáneren tsi nòkwah ne rahónha, ne tsi nihaweienó꞉ten iáh ehʼthohnónwe thaʼteonatekhahákwen, tánon né raoianerénhsera iáh teonatewenhnarákwen?

²⁵ Sók kí tahawe:ron rahonhàke ne iotaríhen raoʼnakwáhtshera tánon nateriatitkhóntshera nateriʼiósera; kwáh wathokwahtásete tsi wahoiatáteke, ók iáh kí teonikonraientáhon; wahohiaʼtáteke, ók iáh kí tsèhio ne raweriá꞉ne.