Isaiah 41 - Ohiatonhseratokénti

Né Rawenni꞉io Orihwí꞉io Washakahónhnien Israerʼró꞉non

¹ Takwahtahónsatat kwáh sakʼthikénhak, Ó né tsi kawenó꞉tons ionhontsakérons; Ánion nonkweshónhas áse shonónhni ne raotisatsʼténhsera; ánion ákta nitón꞉ne, tánon rontáti; ánion skát꞉ne tsi ákta í꞉tewet ne karihwenhtátshera.

² Ónhka rokétskwen natesenhniénhtshera ne tsitʼkarakwínekens nokwáhti, iehonónhkon nahoterihwatsterístaʼse? Sesakoniakéntha niaʼkahontsakeró꞉nons ne rahonhàke, tánon ne tesakositakenhserákwah ne rontinontiʼióshons; tsi ní꞉ioht nokénra sakahónhnis né꞉ne raoʼsarekówa ráts꞉tha, kwáh tsi ní꞉ioht notsináhara ahiaʼkorehátie né꞉ne raoʼiénhkweri thóh nahioierenhátie.

³ Sakósehre tánon sakotohetsténhnis kwáh skén꞉nonk thí꞉ken, kwáh seronhkenéhak tsi tseharátas ne tsi iohatáse.

⁴ Rahónha thóh nihohiothénhon tánon thóh kí kén nioiéren, iesakonatón꞉nions ne tsi tahatinekwenhsatátie ne kwáh tsi tiotásawe? Í꞉i, ne Watiá꞉ner tewakatierenhton, tánon kwáh oná꞉ken enwakónhniaʼte.

⁵ Né tsi kawenó꞉tons ionhontsaʼiéntons ionatkáton tánon kí waotí꞉teronhne, ne tsi iehiotonhontiotʼtaníhon watsahontsíshionkwe; ákta wakontkwiʼtánion tánon takónhne.

⁶ Skát꞉tsions tsi watʼkontatiénawaʼse, tekontatʼrohrhiá꞉nions, “Sewanikonranirónhak!”

⁷ Né rakaratákwas enʼonikonraníraʼte ne rawistanoronhtserónhni, tánon tsi nikáien ne rakétas iehnekonréksta rátstha enʼonikonranírate tsi nikáien ne raientánions notsikwahkó꞉wa rátsta, rohrorhiánions ne raristó꞉seras, “Kwáh í꞉ken tsi ioiánere”; tánon wahatinonwarotónhnion né ká꞉ti ne tó꞉sa ahontorhiáneron.

⁸ Ók ní꞉se, Israel, akenhá꞉tshera, Jacob, rahónha rihiatará꞉kwen, Abraham nón꞉we nitotʼwatsirínon, onhtiaʼténhro;

⁹ í꞉se ne ieskonhnón꞉kon tsi iehiotonhóntioʼte, tánon iewakenáton ne kwáh ahí꞉non í꞉ken ne tsi iaʼtekahiósaiens, konrorhiánions, “Í꞉se nakenhá꞉tshera í꞉ken, í꞉i konhiatarákwen tánon iáh teskoniatekwáhton!”;

¹⁰ tó꞉sa sáteron, asèken í꞉i tenikwé꞉kon, tó꞉sa sáteron, asèken í꞉i ne Saní꞉io í꞉ken; Kwáh kí enkonsasténhseron, kwáh kí enkoniénawaʼse, Kwáh kí enkonhiatenháwa né watesenhniétha ne tsi keweientetákwen.

¹¹ Hén, ratikwé꞉kon ne iesanákwahse kwáh enhontéhen tánon enhonwanatéhaʼte; tsi niʼiákon nenhieshaʼtsatónhti thóh nenhotiʼiátawen tsi ní꞉ioht ne iáh othènon thaʼkénhake tánon kwáh enhatiʼiatáton.

¹² Ní꞉se kwáh enseiatísake tsi nikáien ne tesewarihwawénhron, ók iáh kí tasehiaʼtatʼtsénhri; tsi niháti ne ronhteriʼioseranónh꞉we ne shonháke kwáh thóh nenhotiʼiátawen tsi ní꞉ioht ne iáh othènon thakénhake.

¹³ Asèken í꞉i, Watiá꞉ner sah Ní꞉io í꞉ken, konnenhtsawá꞉kon ne sehseweientetákwen; tsi Í꞉i ne konró꞉ris, “Tó꞉sa sáteronh, Kwáh seh enkonsniénon.”

¹⁴ Tó꞉sa sáteronh, í꞉se notsinonwanhéta Jacob, í꞉se nontsinón꞉wa Israel! Kwáh kí enkonsniénon, rá꞉ton ne Roiá꞉ner; né shiaʼiatákwen né꞉ne Roiatatokénti khók í꞉ken ne Israerʼronónke.

¹⁵ Nón꞉wa, kwáh kí enkonhiónhnien ne iewahék꞉tha kásehre, iohiothí꞉ie, áse í꞉ken, tánon kanotsótons; ní꞉se kwáh kí enswáheke ne tsi ionhnontarónhnions tánon tesaskwáhseron, tánon né enshónniaʼte ne tsi ionhniarónhnions tsi ní꞉ioht ne kawá꞉he.

¹⁶ Ní꞉se kwáh kí ensheiásehwe tánon tsi iowerá꞉re ienhkáhawe, tánon ne tsi teioweratáse kwáh kí tenhiakoréniaʼte. Eʼthó꞉ne kí ní꞉se kwáh ensatonhnáren rahonhá꞉ke ne Roiá꞉ner; rahonhá꞉ke né Roiatatokénti khók í꞉ken NʼIsraerʼronónke ní꞉se kwáh kí ensará꞉sehse.

¹⁷ Nó꞉nenh ne iakóten tánon ne tehiontkárias enienekí꞉shaʼke, tánon iáh kanèka tekanekáien, tánon ne ronhnenhnásake iostáthen tánon rotiniatáʼthens, í꞉i ne Watiá꞉ner kwáh tenkheriwasehrá꞉kwahse, í꞉i ne KheʼNí꞉io NʼIsraerʼronónke kwáh kí iáh takhehiatanikónren.

¹⁸ Kwáh kí enkenontonkwenháton ne tsi kaniataraténions tsi nón꞉we ne iáh othènon tewatonhniá꞉tha ne tsi ionhniaʼrónhnions, tánon entkanekóten nasénhnon nón꞉we nonhrahkwahkónshons; Kwáh né enkónhniaʼte nahonwenhtsaʼthénhake nakanekónhnionhne, tánon ne iahonwenhtsátʼthen enkanawerónhnionhne nonékanos.

¹⁹ Kwáh thóh nón꞉we ne iahonwenhtsaʼthénhake enkeronhtaiéntʼtho nonenhtakwentétshera, tánon ne ohiktakó꞉wa, tánon ne kaientanó꞉ron, tánon ne iakeniewátha karónta; kwáh thóh iahonwenhtsáthénhake entiéntho ne ohnetóia, otiehwá꞉ta karónhta tánon nonetakówah né enkontikwékonhke,

²⁰ né nahónton akwé꞉kon ahiontkátho tánon aiakoteriéntaraʼne, akwé꞉kon taieiató꞉rete tánon aiakonikonraiéntane, né꞉ne raohtsá꞉na ne Roiá꞉ner kí꞉ken thóh niʼioié꞉ren, né꞉ne rahonhatsíwa khók Roiatatokénti ne Israerʼronónke rohsahánion.

Né Roiá꞉ner Waʼsakonenhrót꞉thaʼse Ne Rotinówenhs Niʼiohokónhas

²¹ Ohénton sewáien ne sewarihwashónhas, rá꞉ton ne Roiá꞉ner; tasewá꞉haf ne sewarihwanirátʼtsheras, rá꞉ton ne Raonontí꞉io Jacob.

²² Ietsirí꞉hon nahontahatíhawe, tánon nahionkhiró꞉ri tsi niʼiawénhsere. Ionkhiró꞉ri nahoténshons nohénton tkènʼne, tsi nihiotá꞉nionwe, né ká꞉ti nahónton taiethiʼiatoretáse, tánon nahónton nahionkwahteriéntaraʼne tsi nienhiáwenhne; khés nahionkhiró꞉ri tsi nahoténshons tsi nontaiawenonhátie.

²³ Takwahró꞉ri tsi nahó꞉ten tá꞉we ne kénʼen ienwatá꞉sawen, né nahón꞉ton ahionkwahteriéntaraʼne tsi í꞉se ne niʼiohokónhas nisewahiaʼtótens; ioiánere akénhake khés nahonhetʼkéntake, né nontiérenk ahionkwáhteronhʼne tánon ahionkwahteronʼiénthen.

²⁴ Í꞉se, ne kwáh í꞉ken, né iáh othènon satèkena tsi niʼsewaiatótens tánon né sewahioténseras kwáh iáh othènon tsiaʼteioríhonte; nón꞉kak ahiontonkwetaráko ní꞉se né꞉ne atatswénhonh í꞉ken.

²⁵ Saiá꞉ta wahiʼiatorhiá꞉neron nothorèke nonkáhti, tánon kí wáh꞉rawe, kwáh tsinentʼkarakwínekenʼne ienhakenáton Kwáh kí tensakoskwahserón꞉kwahte ne ratikoráshons tsi ní꞉ioht nonawástha, tsi ní꞉ioht ne ratʼtsetónhni teonawatsʼthawénrie ne ionawastʼthakarí꞉io.

²⁶ Ónhka rotʼróri ne kwáh shiʼtsiotásawe, né ká꞉ti nahónton ahionkwahteriéntaraʼne, tánon né kwáh ohénton tkènʼne, né nahónton ahiʼtewénhron, “Thaʼiérits”? Thóh nón꞉we kwáh iáh ónhka teotʼró꞉ri, iáh ónhka teohrihotáshion, iáh ónhka teiakowenhnarón꞉ken ne sawenhnaókons.

²⁷ Né tewakatierénhton wakatró꞉ri ahonhàke ne Zion, né nahontiénawaste tánon tekheiáwi ne Jerusalem ne kariowanáton ne karihwí꞉ios.

²⁸ Ók nó꞉nen shiakatkátho né nón꞉we iáh ónhka; tsi nihá꞉ti né nón꞉we nasakotenikonrawíseke ónhka, né sakerihwanónhton, ne taharihwaseráko.

²⁹ Iáh, kwáh ratikwé꞉kon thiʼhatirihónhni; ne raotiʼioténseras kwáh iáh othènon tekariwásthas; ne raotihiaʼtonhnisónhas oweroskonkʼtíken.