Isaiah 40 - Ohiatonhseratokénti

Ne Rawenni꞉io Rahonkwetaʼshón꞉has Tsi Wahonwatiʼnikonrahní꞉rate

¹ Sheʼnikonranírat, Ó senikonranírat nakonkwetaʼshón꞉has, ratónhnions ne Saní꞉io.

² Kariwaié꞉rik tsi sewathá꞉ras ne Jerusalem, tánon iasewanáton tsi iahotókʼten tsi ioterihiókwe, nétho tsi nikonwarewáthon tsi kakarhiákon, nètho tsi ioienáhon ne Roiá꞉ner ratsanàke tehiónaʼne akwékon naoʼrihwanerahák꞉tsheras.

³ Nowénhna tonʼtahiohénrete: “Thóh nahonwetsiaʼthénhake tsi sewahahaʼserónhnien ne Roiá꞉ner, sewatakwahríhsi thóh nahonwentsiaʼthénhake né iohahowánen né raorihwàke nón꞉kwah Ní꞉io.

⁴ Akwé꞉kon tsi níkon ionrakwánion tsi enkaná꞉nonke, tánon akwé꞉kon ne tsi iononténion tánon tsi ionhniaʼrónhnion ehʼtàke enwáton; ne iáh teiotonhontsaʼkwahríshion kwáh kí enkatakwahríshionʼke, tánon ne iohahaʼkarenré꞉nion enkatakwahríhshionʼke.

⁵ Eʼthó꞉ne ne raoʼiatanerakwáhtshera ne Roiá꞉ner enkarihotáshionʼke, tánon onkwetaʼkwékon tsi skát꞉ne enhiontkátho, asèken ne tsi rasakáronʼte ne Roiá꞉ner rotatíhon.”

⁶ Nowénhna watón꞉nions, “Tesahénret!” Tánon wakí꞉ron, “Onhnahó꞉ten aoriwàke tsi takaséntho?” Onkwetaʼkwékon seh óhonte nahatiʼiatótens, iáh sénha tatehatiwiʼshatsʼte tsi ní꞉ioht tsi iotsítsionte ne kahentàke.

⁷ Nóhonte wastátʼthens, notsítsa watashó꞉kwas, nó꞉nenh ne rahonhnísera ne Roiá꞉ner thóh enwatón꞉rie; oriwiʼiohónwe nonkweʼshónhas tsi óhonte nahatiʼiató꞉tens.

⁸ Nó꞉honte wastátʼthens, notsítsa watashó꞉kwas; ók ne raowénhna nónkwah Ní꞉io kwáh enkatàke tsi nénhwe enkénhaʼke.

⁹ Iasenontáraʼn ne tiotenón꞉thate, Ó Zion, sathontéhon ne karihwí꞉ios; né satewenhnakétskwat ne kashatsténhsera, Ó Jerusalem, sathontéhon ne kariwí꞉ios, serihówanat, tó꞉sa sateronhníhak; seró꞉ri ne tsi kanatowánens ne Judah, “Ne sahʼNí꞉io tsi tá꞉re!”

¹⁰ Satʼkátho, ne Roiá꞉ner Rawenni꞉io tsi tá꞉re nikweʼkonhátie ne kashatsʼténhsera, tánon ne ranenhtsàkes né thoniaró꞉taron; né raoiatateríhtshera nikweʼkonhátie, tánon ne kakarhiátsera raohénton í꞉we.

¹¹ Kwáh ensakónonʼte ne raotsiókwas tsi ní꞉ioht ne teotinakarontónha sakónonʼne; kwáh ensakoiataʼróhroʼke ne teotinakarontónhas owiraʼsónhas tsi ensakokitároʼke, tánon ensakohiaʼthenhawíson thóh ranáskwahkon, tánon kwáh skén꞉nonk tsi enhahéntenhse ne teiotinakarontónha kanisténsera.

¹² Rahónha roteniénhten ne kaniaʼtarakhekówa thóh ratsaná꞉kon tánon wahaierónhnitsʼte ne tsi karonhiáʼte tsi wathaʼtirónhten, wahatiénawasʼte nokénra ne tsi ionwenhtsáte tsi wahakontseríharen, tánon wahakontseríharen ne tsi ionhnontaʼrónhnions tánon ne tsi ionhniaʼrónhnions kwáh satahiótsʼteke?

¹³ Rahónha rohnikonraientáton ne raonikónra ne Roiá꞉ner, khés né꞉ne rotienhaiénhni rorihonnién꞉ni?

¹⁴ Ónhka sakotenikonríhsakon ne tahonwarihwathé꞉ten, tánon nahonwarihónhnien ne tsi ioháte ne kaiáneren? Ónhka ronhwarihonhniénhni natʼtokhátshera, tánon ronwanatónhni tsi nihiohahó꞉ten ne kanikonhraientátshera?

¹⁵ Iekaníhare niaʼkahontsakeró꞉nons tóh niʼiehiaʼtóten tsi ní꞉ioht ne kastárens nonhtát꞉ne, tánon thóh nitonwátiʼte tsi ní꞉ioht nokénra ne iekontseʼrihará꞉kwahke; satkátho, thóh ní꞉ioht tsi tehá꞉kwah ne tsi kawenó꞉tons tsi ní꞉ioht nokénra.

¹⁶ Né Lebanon kwáh iáh tsatekaiéri nahontakáiesʼte ne kénhie, iáh ó꞉ni tsatekaiéri tsi níhkon ionáskwahiens naʼiakoteskónten.

¹⁷ Akahontsaʼkwékon kwáh iáh othènon tesakahónhnis ne raohénton; thóh ní꞉ioht tsi tesakokánere tsi ní꞉ioht ne iáh othènon tehatirihwáhstha tánon iáh othènon satèkena tsi nihatiʼiató꞉ten.

¹⁸ Ónhka ká꞉ti tahontatsiaʼteniénhtenste ne Rawenni꞉io, khés onhnahiotón꞉hake tsi tashé꞉ron ne rahónha?

¹⁹ Né kahiatónhni? Né꞉ne rorenhnáhon nahakaratáko né rónhnis, tánon ne otsínekwar rawistón꞉nis né tehananétahʼas nowistanóron, tánon né rárasʼtánions ne kawistarákens oronkwáhsas.

²⁰ Nathatawítshera aiakónhniaʼte né iontaterakwénhnis orihkó꞉wa óienhte —né nó꞉iente iáh tewatiésen naiótken— ehʼthó꞉ne enhonwaiatísaʼke ne rorenhnáhon ahakaratáko né nenhahiatonhniseró꞉ten né iáh taʼkarénienhne.

²¹ Iáh kén tesateriéntaraʼkwe? Iáh kén tesariwarónhken? Iáh kén teʼiesaró꞉ri ne kwáh tsi tiotásaʼwe? Iáh kén tesanikonraientáhon ne kwáh sahontenonʼkónhni ne tsi ionhontsàte?

²² Kwáh séh rahónha ne thóh rénskote ne tsi tehiotwenón꞉ni ne tsi ionwenhtsàte, tánon né thóh ienákere ne teshontiérens ne tsistáraʼre; rahónha ne tehatakwahríhtha ne tsi karonhiáte tsi ní꞉ioht ne ioharénhton, tánon tehatakwahríhtha tsi ní꞉ioht natóhsehra ne thóh ahieterónhtake;

²³ rahónha tesakohiaténtha ne rontiʼnontí꞉ios ne iáh othènon tahatiʼrihwakwéni, tánon ne sakahónhnis ne ratiʼkorá꞉sons ne tsi ionwenhtsáte tsi ní꞉ioht ne iáh othènon thahatiʼrihwásthaʼke.

²⁴ Kénk níkon tsi ratiʼiéntʼthos, kénk nikonhátie ne kánen tsi ronáties, iáh kwáh arèkok thehioteronhtáhon ne kontistawínahke ne tsi ionwenhtsáte konhnète, nó꞉nen ensakotonhniseraʼiénte, tánon onstaʼthen, tánon ne tsi tehioweratàse iakáhaʼwe tsi ní꞉ioht ne kaʼwá꞉he.

²⁵ Ónhka ká꞉ti né kénʼen kwáh ní꞉se taskwáhron ní꞉i, ónhka né sahtahontahiontsiát꞉teke akénhake? rá꞉ton ne rahonháha khók né roʼiatatokentíʼonwe í꞉ken.

²⁶ Satarakétsko éhʼneken niaʼsatiérat tánon satkátho: Ónhka kí꞉ken rosahánion? Rahón꞉ha enthaʼiákenhwe notsistokwahsónhas tánon thensakohiatónhnion, ienshakonatónhnion ratiʼkwé꞉kon tsi niotisenhnoténshons; tsioríhwa tsi nateiotenonianíton roshatstenhserowánen í꞉ken, roshatstenhserowanenhkówa, iáh nénska tehiotón꞉on.

²⁷ Nontiéren tsi sá꞉ton, Ó Jacob, tánon tsi sathá꞉tis, Ó Israel, “Né tsi wakʼkhatátie iothaʼhahaséhton rahonhàke né Roiá꞉ner, tánon nakerihwakwahrihshióntshera kwáh iáh othènon karíhwa tehahonhniáton nakeʼNí꞉io”?

²⁸ Iáh kén tesateriéntaraʼkwe? Iáh kén tesarihwarónh꞉ken? Né Roiá꞉ner tsi nénhwe enkénhake tsi Rawenni꞉io í꞉ken, Rahónha Roshaʼáhnion kwáh tsitʼtsehiotonhóntsiókʼte. Iáh thehatesasthenserót꞉tha khés ne tahawisénheʼie, né raoʼnikonraientátshera iáh thaʼónton nawésakon.

²⁹ Shakoshatsʼtenhseráwis ne tehiaʼkowisehéion, tánon shaʼkosatsʼtenhseráwis ne iáh othènon teiéstha.

³⁰ Iekaníhaʼre ne kén nithonʼtihiónsas enhontesatstenhserók꞉ten tánon tehatiwisénheʼie, tánon ne kén niksakohiónsas kwáh enhatiʼiatiénenhne tsi niʼiakotónhriokʼte;

³¹ ók tsi niʼiákon ne ronhwá꞉rahre ne Roiá꞉ner kwáh kí á꞉se ensewáton ne raoʼtisatsténhsera, kwáh kí tenhhatiʼnerahhontʼtsiónhtaʼne tsi ní꞉ioht nakweksʼkówas, kwáh kí tenhhonrátaʼte tánon iáh kí thaʼtaatiwisénheʼie, kwáh kí thenhontekháʼhakwe tánon iáh kí tahontesatsʼtenhserót꞉ten.