Isaiah 37 - Ohiatonhseratokénti

Né Hezekiah Wahoriwanóntonʼse Ne Isaiah Nahotenikonrashónteraʼse

¹ Nó꞉nen ne Ronnontí꞉io Hezekiah sahariwáronʼke, waharatiónko ne raotserón꞉nia, káiare wahaterórokste, tánon raononsatokentikówaʼne ne Roiá꞉ner iahatáwehiaʼte.

² Tánon Eliakim iahothó꞉ri, rahónha né roterihón꞉takwe né tsi kanonhtiʼiotsheráien, tánon né Shebna, né꞉ne sakohiatónhni, tánon né éhʼneken thoʼnatʼtónhnions ratiʼtsihenstowánens, káiare ronateróron, tsi thénteron ne rotó꞉kense Isaiah né꞉ne Amoz roiénha.

³ Wahonwénhase, “Káti rá꞉ton ne Hezekiah, Kén wenhniseráte né꞉na né kanikonhraronhiakénsera í꞉ken, né꞉ne tahiontatenikonrakaréwaʼte, tánon tahiontatéhate; ratiksaokónhas iaká꞉hewe nahonhnákerate, tánon iáh tekashatstenhseráien nahonwanaʼnákeratsʼte,

⁴ Tó꞉ka nón꞉wa ne Roiá꞉ner saní꞉io wahothónteʼne ne raowenhnashónhas ne Rabshakeh, tsi né꞉ne ronnontí꞉io ne Assyria rohiatakweʼní꞉io í꞉ken ieothó꞉rion ne thaʼoiéron ne ronnhehónwe Ní꞉io, tánon kwáh aharihwáiaʼke nowenhnashónhas nètho Roiá꞉ner Saní꞉io rotontéhon; èhʼtho ká꞉ti kwáh sewaharátat ne sewaterénhnaient ne akorihwáke tsi niʼiákon iateiakothaténhron.”

⁵ Nó꞉nen né sakó꞉nhas ne Ronnontí꞉io Hezekiah wahonwahiató꞉renhne ne Isaiah,

⁶ Né Isaiah wasakawénhase, “Tsi sewaró꞉ri ne tsi sewánhas, ‘Asèken rá꞉ton ne Roiá꞉ner: Tó꞉sa sewaterónhsek né akarihónhni tsi nikawenhó꞉tens ne wesewathón꞉tene, né nétho ne sakónhas ronnontí꞉io ne Assyria thahontiéron.

⁷ Kwáh iatetiá꞉ti enhinikonhráta, né ká꞉ti nahothóntene ne karihhontsenón꞉tses, tánon thóh nón꞉we nienhensre tsi nón꞉we tahonwénhtsaien; Kwáh í꞉ih enkerihhónhni nahaʼhiatiénenhne èhʼtho nasarák꞉ta né kwáh raónha raotonwenhtsake.’”

⁸ Né Rabshakeh sahaténhti, tánon wahohiatatʼtsénhri ne ronnontí꞉io né Assyria ronaterí꞉io iehotsatónhtion ne Libnah; asèken waharihwatsénhri nètho ronnontí꞉io tsi éhʼren tethawéton ne Lachish.

⁹ Nón꞉we ne ronnontí꞉io waharihwáronhke tsi niotiéren ne Ronnontí꞉io Tirhakah ne Ethiopia, “Iehawénon nahitsaterí꞉io ní꞉se.” Nó꞉nen sahariwáronhke, iasakotóri ne ratiriwakarénies tsi thénteron ne Hezekiah, ratónhnions,

¹⁰ “Ká꞉ti ó꞉nenk tsi ensthá꞉raʼse ne Ronnontí꞉io Hezekiah ne Judahró꞉non: Tó꞉sa tserí꞉hon ne Saní꞉io tsi nikáien tseniaʼhésen nahiaʼnikonráten né tsi iarahratsʼténhnis nètho Jerusalem tsi kwáh iáh tahontahónhnion ratsanàke ne ronnontí꞉io ne Assyria.

¹¹ Satkátho, sarihwáronhke tsi nahó꞉tens né rontinontí꞉ios ne Assyria tsi nihotiʼierá꞉nion akwé꞉kon nonhontsashón꞉has, washakonátonhte thontasakókwekte. Ahonsaiesaniá꞉kenʼte onhtèken ní꞉se?

¹² Né raotiniʼiohokónhas né thiʼiakahontsáte shonwatiniakénton kén, né꞉ne thiʼononhontsátes nohénton thonaterihóntakwe tsi ní꞉ioht ní꞉i sakonáthonton, né꞉ne Gozan, Haran, Rezeph, tánon nonkweshón꞉has ne Eden Telassar nón꞉we nihatinákerekwe?

¹³ Kaʼníres ne ronnontí꞉io ne Hamath, ne ronnontí꞉io ne Arpad, ne ronnontí꞉io ne tsi kanatowanénke ne Sepharvaim, ne ronnontí꞉io ne Hena, khés ne ronnontí꞉io ne Ivvah?”

Né Hezekiah Raoterénhnaient

¹⁴ Né Hezekiah wahaiéna né kahiatónhsera tsi nontahát꞉kaʼwe ratsanáke ne rariwakarénies tánon wahawenhnaʼnhó꞉ten; eʼthó꞉ne ne Hezekiah iahá꞉re raononsatokentiʼkó꞉wane ne Roiá꞉ner tánon wathaʼtakwáhrite raohénton ne Roiá꞉ner.

¹⁵ Tánon né Hezekiah wahaterénhnaien rahonhá꞉ke ne Roiá꞉ner ratónhnions:

¹⁶ “Ó Saiá꞉ner ne ratiʼronhiakeró꞉nons, Sení꞉io NʼIsraerʼró꞉nons, thóh rentskwáhere éhʼneken tsi niteron ne niʼnikonhrare iotokentis, í꞉se ne Ní꞉io í꞉ken, ieteshiáʼtiʼkhok, akwékon ne tsi kanakeraserakérons ne tsi ionwenhtsáte; í꞉se shá꞉son ne tsi karonhiáte ó꞉ni tsi ionwenhtsáte.

¹⁷ Satahonsí꞉iost, Ó Saiá꞉ner, tánon satahónsatat; tesateronwéksi, Ó Saiá꞉ner, tánon satkátho; satahónsatat akwé꞉kon ne raowenhnashón꞉has ne Sennacherib, tsi nithoteniéton ne thaʼoiéron ne ronnheónwe Ní꞉io.

¹⁸ Oriwiʼioónwe, Ó Saiá꞉ner, ne rotinontí꞉ios ne Assyria wasakonatsiésaʼte ratikwé꞉kon ne thiʼononhontsátes tánon ne raononhontsashón꞉has,

¹⁹ tánon otsirá꞉ke iaʼteonatesenhniá꞉ton ne raotiniʼiohokónhas, iawerohátien tsi iáh ratiní꞉ios tèken, ók ónhkwe akosnón꞉sa thiʼiosahánion—óiente tánon onénhias—tánon ká꞉ti kariwathóntons.

²⁰ Ká꞉ti nón꞉wa, Ó Saiá꞉ner onhkwahNí꞉io, saskwahnóns꞉tat thonsatʼtsiotarísi, né ká꞉ti akwé꞉kon tsi kanakeraserakérons ne tsi ionwenhtsáte ahónton ahiakoteriéntaraʼne tsi kwáh iateshiá꞉ti khók Saiá꞉ner í꞉ken.”

²¹ Eʼthó꞉ne ne Isaiah né roiéhna ne Amoz iaoterihwaniéten ne Hezekiah, ratónhnions: “Asèken rá꞉ton ne Roiá꞉ner, né sakoní꞉io í꞉ken NʼIsraerʼró꞉nons: Né wakarihónni tsi wasaterénhnaien akonhá꞉ke tsi nihatsiéra ne Ronnontí꞉io Sennacherib ne Assyria,

²² Né kí꞉ken nowenhnasónhas nètho Roiá꞉ner thotatí꞉on tsi nihiotiéren ne rahonhá꞉ke: ‘Sariwakenrónh꞉ni, thisaiéron— né꞉ne kawí꞉non akoiénha ne Zion; tehiononkarénhron—ne saná꞉ken, né akoiénha ne Jerusalem.

²³ “‘Ónhka ónhte sherákwe tsi thiʼtierónhakwe tánon tienikonratsʼsáthakwe? Ónhka rahonhá꞉ke tsi satewenhnakétskwen tánon tsi nisathatónhni tsi ní꞉ioht tsi wasatarakétsko? Rahonhàke ne Roiatatokénti NʼIsraerʼronónke!

²⁴ Sanhá꞉tshera nón꞉we nontá꞉we tsi thatsiéron ne Roiá꞉ner, tánon í꞉sen, “Né tsi wé꞉so wakeserethá꞉ien nó꞉tionkwas Iewakenontaráhon né kwáh tiotenontatón꞉nions, né kwáh ahí꞉non ít꞉ken ne Lebanon; Wakerontsenénhton ne kwáh tkaronhtésons nonenhtaʼkwenhtétshera, ne kwáh tkaʼronhtí꞉ioskwe ne cypress; Iewáko né kwáh ahí꞉non ítʼken ne tiótʼte, né kwáh ioteratóhon.

²⁵ Wakʼnaweronhniánion tánon waknekíren nonékanos, wastʼtatháton ne wakáts꞉ton ne tsi kenskáron ne kashitàke akwékon ne tsi kahionhaténions ne Egypt.”

²⁶ “‘Iáh kén tesarihwarónhken wahónhnise tsi ná꞉he iaʼtewakeriwaientáse? Wahónhnise tsi ná꞉he tewakatenikonrí꞉shon ok ó꞉nenh kí entekhá꞉we nahontóhetste, ní꞉se tsi ó꞉nenk tsi enshón꞉ni ne tasenatánake ne kanatowánenhs tahonsʼkwaserónkwenke akentonhionhniá꞉nionke ne iorihwaieshá꞉seron,

²⁷ Tsi nikarí꞉wes né thóh ratinákere, teonatesatʼtsentseriákon, thoʼnanikonrénhen tánon teonanitonniénhni; thóh nahatiʼhiatóthenhne tsi ní꞉ioht ne kaientʼthó꞉tsheras ne kahentàke tánon nohontáses, kwáh tsi ní꞉ioht nóhonte iorát꞉ten ne kanonsakésons, onstátʼthen nohénton akonteiáron.

²⁸ “‘Wakateriéntare tsi nathentéstaʼne tánon tsi niensehshá꞉tien, tsi nieshiá꞉kens tánon tsi nieʼsehshataweiátha, tánon tsi niskeʼnákwahse.

²⁹ Né aoríhwa tsi niskeʼnákwahse tánon tsi nisatatkowanáhton ón꞉we ne tsi tekahontaká꞉ronhte, kwáh nakariotaróktsera enkonʼiarhiotároke ne sehnionsáke tánon nakáwenk wateristanonhtáhastha enkonristanón꞉ta ne tsitʼtsakáronhte; Kwáh enskonhiákthaʼte ne tsi iohatá꞉tie tsi nón꞉we nontá꞉se.

³⁰ “‘Tánon né kí꞉ken nenwatenienténstonke ne sariwá꞉ke: Nón꞉wa ioseráte né énsehke tsi nahó꞉ten ne ók thiʼiotón꞉nionh, tánon ne teioserakeháton tsi nahó꞉ten entkánio né kwáh né sá꞉ka; eʼthó꞉ne nasénhaton nenhioseráteke tsiéntʼtho, tientwá꞉ko, tsiéntʼtho ne watenenharísehres, tánon sahient nahohiksónhas.

³¹ Né tsakoniakénʼen ne iateiakothaténron nonkweshónhas ne Judah kwáh kí shé꞉kon enskaterónhten tsi tenhwatonhontsawéheste, tánon enwahiaʼnihiónten né éhʼnekenh;

³² asèken Jerusalem nón꞉we nenhtón꞉ne ne iaʼteonathaténhron tsi enhatiʼiákenhne, tánon tsi Ionón꞉te ne Zion nenhtón꞉ne raoʼtitiókwah ne iatehonathaténron. Né꞉ne raonhetoraráktshera né Sakoiá꞉ner ne ratiʼronhiakeró꞉nons thóh kí nenhkáiere.

³³ “‘Né ká꞉ti wahónni ratónhnions ne Roiá꞉ner tsi nihatsiéra ne ronnontí꞉io ne Assyria nón꞉we: Kwáh kí iáh thahóntare kí kénʼen kanatowanénke, naharóntate ne kaiénkwiʼre né nón꞉we, nahontá꞉re ne ohénton ahóthatse ne teioniatastákwah, khés nahenthonhiontón꞉nion okénra tahakwahtásehte nasakohahanótonhse.

³⁴ Né tsi tahiohatá꞉tie tsi nontáre, kwáh kí thóh nón꞉we nienhénsre; kwáh kí iáh tsahanatárane kí kénʼn kanatowakénke, rá꞉ton ne Roiá꞉ner.

³⁵ Asèken kwáh kí éntkene kí꞉ken kanatowanénke nakenónsthate, asèken Í꞉ih akerihwá꞉ke tánon ne raorihwá꞉ke nakenhá꞉tshera Táwit.’”

Né Sennacherib Wahonwasénhni Tánon Warénheie

³⁶ Eʼthó꞉ne ne raoronhiakeró꞉non ne Roiá꞉ner iahahiakénʼne tánon washakowéntho énska tewenhniá꞉we shatèkonʼniwáhsen-wísk niwenhniaʼwehetsheráhsen ne tsi ronanátaien ne Assyriaró꞉nons; nó꞉nen sahiórenhne, kwáh ratikwé꞉kon ronenhé꞉ion tewenhehiontó꞉taron.

³⁷ Ethó꞉ne ó꞉nen né Ronnontí꞉io Sennacherib éhʼrenh sárete, sahaténhti, tánon Nineveh nón꞉we ionsarenhnákerate.

³⁸ Tsi nihoterenhnaiéntakwe raononsatokentíke ne raoní꞉io Nisroch, ne roiénha Adrammelech tánon ne Sharezer wahonwanonwaʼrhiákon asarekó꞉wa waiástʼte, tánon thóh iahiatekwáhsen tsi tiohontsáien ne Ararat. Né roiénha Esarhaddon né tonsaonatʼthákwen.