Isaiah 35 - Ohiatonhseratokénti

Tsi Nionsahónhne Né Zion Ne Shonwatihiatákwen

¹ Ne iahonwentsaʼthénhke kwáh kí enwatʼtsenhnónhni, né iahonwentsaʼthénhake kwáh kí enwatonnáren tánon thenkatsitsanékare; tsi ní꞉ioht ne onekwénhtara nikaʼtsitsóten

² kwáh í꞉ken tsi enkatsitsónten, tánon né enwatonnáren natʼtsenhnonhniátshera tánon tenhkaríhwaʼkwe. Né naoiatanerakwáhtshera ne Lebanon kwáh entʼkonhwénhnon, né nahonatkweʼnienstátshera ne Carmel tánon ne Sharon. Kwáh né entsiatʼkátho ne raoʼiatanerakwáhtshera ne Roiá꞉ner, né nah ne rahotʼkwenienstátshera nonkwahʼNí꞉io.

³ Sheʼshatsténseron ne ietsanàhkes, tánon snírat ne iotsiʼióha iekwitsàkes.

⁴ Sheʼiénhas tsi nihá꞉ti ne kwáh ne titkáhere ne raonerhiá꞉ne ne katerón꞉tshera, “Sheʼshátstek, tó꞉sa saterónhsek! Kénhen í꞉res ne Saní꞉io. Entʼtháhawe ne karewatátshera, né꞉ne teiotenonianíton tsi nenskakarhiákon. Kwáh éntʼre nahonsahiaiatanóns꞉thaʼte.”

⁵ Eʼthó꞉ne kí ne teieronwékon kwáh thentiontʼkakwahrísi, tánon ne tehionhontakwékon entsakoktónhtene;

⁶ ehthòne ne ióntsi nokátha iaʼthenhionhnitsiónkwahkwe tsi ní꞉ioht noskenónton, tánon nawenhnáson né iáh tewatátis tekarihwákwe natʼtsenhnonhniátshera. Asèken nonékanos kwáh entʼkanekóten ne iahonwenhtsaʼthénhake, tánon enkahionhatenionhne ne iahonwenhtsathénhake;

⁷ ne ionesharonhkwathé꞉kha né ienwáton ne tsi watnekarákwah, tánon ne ioniatátʼthens nohóntsa entkanekóthen nonèkanos; ne tsi rontsientákwahs ne okwáhos kwáh néʼe né ienhwáton kanawàkon, ne ohontesónhas né꞉ne ienwáton oiónwi tánon ne onó꞉tas.

⁸ Né iahohowánenn thóh nón꞉we nenhioháteke, tánon né enkonwanatónhkwahke Iohahatokénti; ne iáh tehiakokʼkwéniens kwáh iáh thóh nón꞉we tahionʼthahíta, ók né kí ne Rawenni꞉io rahonkwetaʼshónhas khók raotirihwàke; iáh ónhka ne tehiontstikáfʼfas, iáh shé꞉kon ne tsakotónhnokte, kwáh ahiakohiatátonhte.

⁹ Iáh ne kénreks thóh nón꞉we takontináhkerehke, iáh ne ionatekwahtétsien kontírios thóh niakónhne; kwáh iáh thakonwatiʼiatatʼtsénhri né nón꞉we, ók né꞉ne tiontaneniakénton thóh thenhontekhahákwahke.

¹⁰ Tánon né꞉ne sesakohiatákwen ne Roiá꞉ner kwáh thentónhne, tánon enshónnewe ne Zion thenhotiʼrihwakwenhátie; né꞉ne tsi nénhwe enkénhake natsenhnonniátshera ratinontsíne enwatake; kwáh ne enhatiʼiéna natonhnárat ó꞉ni natsenhnonhniátshera, tánon ne kanikonraksénhtshera ó꞉ni ne taieríhwaʼkwe kwáh kenktshiénhwe.