Isaiah 34 - Ohiatonhseratokénti

Karihwentátshera Wahotíraʼne Né Ronhnonhontsaʼkeró꞉nons

¹ Ákta í꞉sewek, Ó tionhontsakeró꞉nons, naisewathóntene; Ó tsiónkwes, sewatenhnikonhrá꞉ren! Áhnion nohóntsa ióthonhthen, tánon akwékon ne thóh kananóntʼtons; ne tsi ionhontsáte, tánon akwékon tsi nahó꞉ten né thóh nón꞉we nitewètha.

² Asèken ne Roiá꞉ner tsi wahotenakwahwénhratʼtse kwáh ratikwékon wahotíraʼne niaʼkahontsakeró꞉nons, tánon tsi nathaterhiatítkon ratiʼkwékon tontashaʼkókwekte tsi nihotiʼtsiókwahs; wasakoríwenhte, wasahkotsakwahrísi nahonwatiʼnonwarhiá꞉kon.

³ Tsi ronwatiʼnonwarhiákon átste khók tsewátsion, tánon tsi niʼwenhserátsen ne raotiʼierónhta kwáh tewenhserateníhons; ne tsi ionontarón꞉nions kwáh ne tenwatnáwenhte ne raoʼtinekwénhsa.

⁴ Akwékon tsi nihioteriwatiéren ne tsi karonhiáke kwáh enhiotishatstenhserónhti, tánon ne tsi karonhiáte kwáh enwatʼwenónhni tsi ní꞉ioht nohorótha. Akwékon nahoshatsténhsera kwáh enhiotistatáse kwáh tsi ní꞉ioht nónerate iostatʼtenhenhátie ne tsi watenenharíseres, khés ne káhik iostatʼthenhénhase ne tionnionwarontonhakówa tsi kérite.

⁵ Nó꞉nen nakwasarekó꞉wa iatehioiérise tsi niʼionekíren ne tsi karonhiáte, sewathenhnikonhrá꞉ren, kwáh iaʼthenhiotásenhte ne Edom, rononháke nonkweshón꞉has ne kherihwénhton nahonwatiríhwenhte.

⁶ Né Roiá꞉ner raosharehkówa; kwáh ionekwenhsarón꞉nion, né iawerónhnion ne iorénhsen, né꞉ne raotinekwénhsa ne teiotinakarontónhas owirasónhas tánon ne kaiatákeras, né iawerónh꞉nion ne ioréhsens raotistiéseris ne teotinakaronhtón꞉has owirasónhas. Asèken ne Roiá꞉ner rateskóntane ne Bozrah nón꞉we, né꞉ne teiotenonhianíton tsi nenhionthatenonwarhiakónhnion ne tsi ionhontsáien ne Edom.

⁷ Né karakónha teonákares skát꞉ne tsi enhatihiatiénenhne, tánon ne kenhnithohiónha teonákares skát꞉ne ne raʼshátstes raʼtítsinn. Né raononhontsákes kwáh thenhiahonkótonhke nonekwénsa, tánon ne raonakénras tsi nihiokenhrá꞉resen.

⁸ Asèken ne Roiá꞉ner rawenniserará꞉kwen ne karewathá꞉tshera, né ioseráte enskakarhiákon ne Zion aoriwàke.

⁹ Tánon ne tsi kahionhaténions ne Edom né iatenwatʼténi ohnéta ienwáton, tánon naohkenràke iontenathentástha ienwáton; nahohontsàke kwáh né꞉ne né enkénhake ionehtaté꞉kha.

¹⁰ Nasonʼthènhne tánon nenhniseràke kwáh kí iáh thaonsonswáhtonke; ètho enhioienkwaró꞉thake né꞉ne tsi nénhwe enkénhake. Né tsi wahenekwensatátie kwáh thóh enkaiéntake watsiesá꞉ton; kwáh iáh ónka thohʼnónwe thahonsahiontohétsthake né꞉ne tsi nénhwe enkénhake.

¹¹ Ók nákweks tánon nanén꞉taks kwáh tsienhatiʼiatakwení꞉ioke; né kwareró꞉ha tánon ne tsokawekó꞉wa thóh nón꞉we nenhatiterón꞉take. Kwáh thenhatirón꞉ten naserí꞉ie né꞉ne tahiakonitonhniá꞉then, tánon né ieseriʼiethentákwah né thenhonanitonhniáthen ne ratisenhnowánens.

¹² Iáh othènon thaʼkonwaʼsénhnon né nón꞉we nikanakeraseráien, tánon ratikwékon ne ratikorá꞉shons iáh thotahonsahonhnéseke.

¹³ Ohíktas enwatónhni thentsorohrók꞉te ne tsi rotinonshótons, kahontáksens tánon oniónʼwaras thenhiówanake ne tsi watenhenró꞉tons nosténhras. Kwáh ienhotikontákwen thóh enhonhnésehke nokwáho, né raonatená꞉tha enkénhake ne skawirowanekówa.

¹⁴ Karakón꞉has tàkos thenhontát꞉ken ne kahentakéha éʼrhars né iotʼtsinonwákterons thóh nón꞉we iatenhontatenatónhnion; thóh ó꞉ni nón꞉we ne onhé꞉tsien watkonseráksen nenhwaʼtoríhsen, tánon enhiawesakonhatsésheʼke tsi nón꞉we nahontorisenhtákwahke.

¹⁵ Kwáh thóh nón꞉we ne kwareró꞉ha enkóntʼtsi nakonhníseke tánon nenkonhninonshó꞉seke tánon naʼthenkontiwirákseke tánon enhiakohiataróroke nakoiohokónhas thóh tsi ioterakwáhweron; kwáh ó꞉ni thóh nón꞉we ne kontiweró꞉kwats nenhkonteróroʼke, satihiatátʼtshons ne thonathenró꞉hon skát꞉ne.

¹⁶ Shésak tánon sewenhnanóten ne raohiatonhseráhkon ne Roiá꞉ner: Iáh nénska kí꞉ken thakanikonrénhʼen; iáh onhka ne iáh thahatikweʼkónhake ne tehatíteron. Asèken ne tsi rasakáronte ne Roiá꞉ner nón꞉we nishakoró꞉ri, tánon né꞉ne raonikónhra iakohiataróron.

¹⁷ Rahónha sakohiakhónhni, ratsanàke tehiakonarihthénhni né rókston ne ieseriʼiethenhtákwah; kwáh kí enhonatsenawastón꞉hake ne tsi nénhwe enkénhake, né tsi wahatinekwenhsatátie kwáh thóh nón꞉we nenhatinákereke.