Isaiah 33 - Ohiatonhseratokénti

Né Iekarihwáken Nahonsaʼhionthateniá꞉kenʼte Tsi Nòkwah Ne Tehiontáʼtshons

¹ Áh, í꞉se ne sehiatónhtha, ní꞉se iateshiá꞉ti khók iáh teiesatónhton; í꞉se nènska ne satonkwetátʼteron, iáh ónhka ní꞉se teiesathenhnínon! Nó꞉nen ensát꞉kaʼwe tsi sehiathón꞉tha, kwáh kí thó꞉ne ní꞉se eniesathón꞉te; tánon nó꞉nen ensát꞉kaʼwe tsi né saterihwahthéntsaton naʼsehiathenhnínon, kwáh kí thó꞉ne ní꞉se entsesathenhnínon.

² Ó Saiá꞉ner, taʼkwénhtenr; Í꞉se kwahrá꞉re. Í꞉se takwahtenenhtsaʼshónteras né niatehioronkétshera, ne nonkwahiatakená꞉tshera í꞉ken nó꞉nen thènenh tekanikónrare.

³ Tsi nenhkaritsʼtáren, nonkweshón꞉has wahontèko; sahénton sahiatanerákwat, nonkweshónhas wathonwanatʼthókwahte.

⁴ Ne kanénhskwen wahatiróroʼke kwáh tsi ní꞉ioht nofará꞉re tsi karóroks; tsi naʼtewanitsionkwáhkwah ne tsitáraʼre, thóh kí ní꞉ioht tsi wathonhniʼtsionkwahkwánion.

⁵ Né Roiá꞉ner ronwasenhnaʼkaratáton, éhʼneken nón꞉we nihanákere; né wahaná꞉nontʼte ne Zion né tkarihwaiéri tánon karihwaʼkwarihshiónhtshera;

⁶ kwáh rahónha enhiaienáwaʼse tsi nenhsenhteniseraténionʼke, enhiawetowánenhke ne kahiatakenátshera, atʼthokhátshera, tánon ne karihonhnienhnítshera; nahonwaʼtsianísehke ne Roiá꞉ner né꞉ne Zion aotsokowáhtshera í꞉ken.

⁷ Satahónshatat! Ne ronikonraktsáni tehaséntʼthos tsi tekanatokenháton; ne sakonatátiaʼse ne skénnon tehonséntʼthos wahotiʼtsitowána í꞉ken.

⁸ Né tsi hiohahowánenhs kwáh iáh ónhka tètiens, ne tehontstikáfas iah teshontahítahas. Naʼterihwaseronniátshera tekaiákon, tsi nikarihwanirá꞉ton wahekénron, tsi nihioterihwaiénhni iáh othénon teshatiniahésen.

⁹ Nonhóntsa iotʼtiónhnion tánon ioteshatstenhseroktáhon; ne Lebanon hiorihwaʼnerakóhon tánon etʼtsiahotashókwahse; ne Sharon kwáh né꞉ne iahontsathénhake í꞉ken; tánon ne Bashan tánon ne Carmel wahotineráthenhse nenhné꞉e.

¹⁰ “Ó꞉nenh kí kwáh tetétʼtane,” rá꞉ton ne Roiá꞉ner, “ó꞉nenh kí kwáh entkatsaʼtakaráthaʼte; ó꞉nen kí kwáh enhiontsenhnakaráthaʼte.

¹¹ Tsi wasatʼtháwa nahisahwiʼraiéntaʼne osewá꞉sehri ienwá꞉ton, tánon tsi ní꞉ioht nowirá꞉a ahisawiraiéntaʼne kawá꞉he ensehnáhkeratsʼte; ne sonhnísera kwáh né꞉ne ótsire né nètho kwáh enshá꞉tonhte.

¹² Tánon nonkweshón꞉has Kwáh né thóh nenhiotónhake tsi shí꞉ken ní꞉ioht ne kentarakeríhton iakotsatatʼtsaháton, tsi ní꞉ioht ne ohíkta kaiákon, né꞉ne tsi iotétkha watsaháhton.”

¹³ Sewathóntek, í꞉se ne ahí꞉non nió꞉re teséwas, tsi niwakatiéren; tánon ní꞉se ne ákta í꞉sewes, sewarihwanírat nakesatsténhsera.

¹⁴ Né rotirihwaneraháts꞉kon ne Zion nón꞉we kwáh rotíterons; ne iakohiatiʼshiónkwah ne wahakoiéna ne iáh teotiniʼioseráien: “Ónhka tsi nítsion ahitewakwéni né kénʼen ahitiónnheke ne iakotónhtha ótsire? Ónhka tsi nítsion ahitewakwéni thóh nahiʼtiónnheke ne tsi nénhwe í꞉ken notonhkókon?”

¹⁵ Tsi nikáton né thóh nón꞉we nihiakothahí꞉taʼke ne kariwakwahrihʼshiontsherákon tánon ne iakotharáhkwen ne tkarihwaiéri í꞉ken, rotikenrá꞉tani né thènen ahatiʼiéna ne kawisenhehióntshera akarihónhni, tehonhnentsateníhons skonwatʼtátha ne kanikonrá꞉ton né꞉ne tó꞉sa ahatiʼiéna, tehonatahonthaʼkwékton né꞉ne tó꞉sa ahonatʼtónhtene naienékwah tánon tehonatateronhwékon né꞉ne tó꞉sa ahontkátho ne karihwahetkénhsera,

¹⁶ né꞉ne kwáh éhʼneken nón꞉we nenhatinákereke; ne enhontaséhtaʼkwe né kwáh osténhra wathenhénrote; ne raothí꞉kwah kwáh kí entonhwanatkawenhníheke, ne raoʼtinékanos kwáh kí ronwanaratátstenhni.

Né Tsi Ionhontsáien Né Raohiatanerakwáhtshera í꞉ken Ne Ronnontí꞉io

¹⁷ Né skará꞉ke enóken ne ronnontí꞉io thóh raoʼrasehtsherákon rénteron; tánon entsiatʼkátho ne ohóntsa tsi waonhontsatatséshion ahí꞉non nió꞉re iéʼken.

¹⁸ Né sanikónra kwáh ne enonontónhnionwe ne ranatakárias: “Kaní꞉res tsi nikáien ne rosé꞉ton? Kaní꞉res tsi nikáien ne rokontseríhare ne kawistaró꞉ron? Kaní꞉res tsi nikáien rosé꞉ton ne tsi kanikaʼtótons?”

¹⁹ Iáh shé꞉kon tahonsashé꞉ken ne rotihiaʼnerenhseráksens onkweʼshón꞉has, né nonkweʼshón꞉has ne thethonákaras tsi ní꞉ioht tsi ronhthátis né iáh taskwéni ahisanikonraiéntane, né꞉ne rotiʼnahsanénhtas né thiʼwaronkhatsheráte ronhtátis né iáh taskwéni ahisanikonraiéntaʼne.

²⁰ Iasatkátho ne Zion, né꞉ne kanatowanénhke ne ionkwará꞉kwen nón꞉we nahitewaʼkhwaheráke! Né skaʼràke kwáh kí enwatkátho ne Jerusalem, né꞉ne sakʼthíken tsi ienákere, né꞉ne iáh tehiontohserotákwas, nahoʼwasʼtesónhas kwáh iáh nonwénhton tahiótsionke, tánon kwáh iáh nahoseriʼiesónhas thaʼtahontsáke.

²¹ Ók thóh nón꞉we ne Roiá꞉ner raoiatanerakwáhtsherakon kwáh enteshonkwahrihwáwaʼse thóh tsi nón꞉we ne tekaniataraʼkáron ó꞉ni né kahionhatátie, thóh nón꞉we ne wathénhnios kahonhiowá꞉nen ne ratikáwes iáh thaʼhónton né nón꞉we niá꞉we, khés ne kwáh kahonhiowanenkówa iáh thaʼhónton né thóh nón꞉we nahontó꞉hetste.

²² Asèken né꞉ne Roiá꞉ner nonkwá꞉wenk rarihwéntʼtha í꞉ken, né꞉ne Roiá꞉ner nonkwahkóra í꞉ken, né꞉ne Roiá꞉ner nón꞉kwah nontí꞉io ní꞉ken; kwáh rahónha enshonkwahiatanónsthaʼte.

²³ Né shaʼseriʼiesónhas thiʼhiorentónhnions; iáh taʼkakwéni nahioníronhke nakawánerentsthe ne watʼtsirótʼthas tsi nón꞉we nateʼhiotonhontsóhon, khés ne thakatakwáritʼte ne watʼtsirót꞉tha. Eʼthóhʼne ne karhiotanénskwe ó꞉ni ne kanenskwenhátons tehatiʼhiákon; iekaníhare ne osinó꞉kwas enhatiʼhiatsiénenhne tsi enhatiʼnenskwenháton.

²⁴ Tánon iáh ónhka ne thóh ienákere nahiaiéron, “Wakenonwákʼtani”; nonkweshón꞉has né nón꞉we niʼienákere kwáh kí enskanikonrénhenke ne raoʼtirihwaneraháktshera.