Isaiah 29 - Ohiatonhseratokénti

Tsi Naʼtekonwahonwarónhni Ne Jerusalem

¹ Áh, Ariel, Ariel, né꞉ne kanatowanénke tsi nón꞉we ne Táwit nihothatohsehrótaʼkwe! Kwáh niateioseràke; áhnion ne tsi nihathiʼkwahéra iahonsakahésehke noʼiaioserátes.

² Kwáh kíʼ ó꞉ni tenhiʼhianikonrhiák꞉then ne Ariel, tánon thóh kí nónwe enhiakahonseniánion tánon enhiakonikonraksénhsheron, tánon ne Jerusalem nakonhá꞉ke kwáh thóh nenhiohiátawen tsi ní꞉ioht ne Ariel.

³ Tánon kwáh né꞉ne Táwit kwáh kí thenkonhnatáhnake; kwáh thenkonhnatáhnake né꞉ne kanikatótons énkatste tánon enkonhniá꞉nion ne ierenhtenstáhkwa niakoniatsiatónti.

⁴ Eʼthóhne ne kwáh tsioshón꞉wes ne tsi ionhontsàte nón꞉we entesatáti, kwáh okenró꞉ko ne sawenhnaókons nón꞉we nénhtewe; ne sawenhnaókons ohontsàke nón꞉we nénhtewe kwáh né꞉ne atʼtsanerónhsera, tánon ne tsi sáthare kwáh ontsahonskwákon enkénhake tsi nentkaiá꞉kenhne nokenhró꞉kon.

⁵ Ók tsi nihiakotsiokowánen ne ieshá꞉shons thóh nenhiotónhake kwáh né꞉ne kénk niwakénras í꞉ken, tánon tsi nihonatsiokowánenh ne ratinenhrénhtha kwáh né꞉ne kawáhe kontítses. Tánon kwáh óksak, thontaiawénhstsis,

⁶ Ní꞉se kwáh enianatarénase ne Sakoiá꞉ner ne ronterí꞉ios ratironhiakeró꞉nons né entahá꞉wite ne kawéhras tánon ne tahiahontsishónkwa tánon kowánen tsi nathenhiotón꞉hare, ne entahá꞉wite ne katsiskahionhniátha tánon ne iowerashátste, tánon notónhkwah ne watóntha ótsire.

⁷ Tánon tsi nihiakotsiokowánen nakahontsakerónons nètho ronaterí꞉io iekonwatsatóntion Ariel, ratiʼkwékon ne ronaterí꞉io ne iekonwatsiatónhtion nahónha tánon nahothenhenrashónhas ne tekanatanákton, tánon nónka konwanikonraronhiakéntha, thóh nenhiáwenhne tsi ní꞉ioht nahiakotéhtshen, atsanerónhsera ne tsi niwasón꞉tes.

⁸ Kwáh kí tsi ní꞉ioht ne iontonhkárhiaks ónkwe enhiakotétshen tehiakokskáhon tánon nenhiéie shé꞉kon kí iontonkárhiaks, kéhsne iakoniatáʼthens ónkwe wahakotétshen iakonekíren tánon nenhiéie shé꞉kon kí iakoniatátʼtens, etʼkinenhiáwenhne ne iakotsiokowánen ne iakahonwenhtsakeró꞉nons kí nètho ronaterí꞉io iekonwatsiatónhtion tsi Ionónte Zion.

⁹ Tasewathatonʼnotʼtat tánon tesewatenonwarorihthónhtat, tesewathaterón꞉wek tánon tesewaronwékonk! Sewatatenonwará꞉tont, ók iáh kí otsítsa thóh thakáiere; tesewatsiaʼténtonf, ók iáh kí ionekaníron thóh thakáiere!

¹⁰ Asèken ne Roiá꞉ner thowèron shonhá꞉ke ne wahientásten ne teioserenhtanó꞉tes; watetsisewaronwéke, í꞉se ne sewatókenhse, tánon watsiʼsewanontsistóroʼke, í꞉se ne tesewatkónstha.

¹¹ Ne iotenéstonh nakwékon kí꞉ken ne shonháke thóh nihiawénhon kwáh né꞉ne kanakentó꞉ronh kahiatónhsera, Tó꞉ka né enthonwénhnon nónkak aiekwéni nahiewenhnanhó꞉ten, nahonhwahnahtoktahkwen, “Sewahwenhnanhó꞉ten kí꞉ken,” enhonhníron, “Iáh thahiakwahkwéni, asèken kanakéntó꞉ron.”

¹² Tánon tó꞉ka né enthonwénhnon tsi nikáien ne iáh tehatiʼwenhnaʼnótha, rontón꞉nions, “Sewahwenhnanhó꞉ten kí꞉ken,” enhonhníron, “Iáh tahiakwahkwéni nahiakwaʼwenhnanóten.”

¹³ Né Roiá꞉ner wahénron: Tsioríhwa kí꞉ken onhkwehókons ákta tahatiʼháwiʼte ne tsi ratisakáronʼte tánon tehionkerenhsarónhnions ne ratirí꞉tsakes, tsi ná꞉he ne raonerhianéshons ahí꞉non ít꞉ken nakonhàke, tánon tsi iontsénhnaiens né꞉ne ónhkwe akohtsiaʼwenhrátshera neh rotiweienhteʼtáhon néh thiwehiaráhsheron;

¹⁴ káti kwáh shé꞉kon thóh nénstiere iorihwanerakwahténions tsi nahoténsons tsi nenkheiatié꞉ras kí꞉ken onhkwehókons, tiotónnek tánon ionerákwat. Ne raonatʼthokhátsheras ne raononhkwetaʼshón꞉has ne rontʼthókas kwáh kí enwáton, tánon ne rotiʼnikonraientáʼon tsi niekarihwáken kwáh kí enwahséhtonke.

¹⁵ Há! Í꞉se neh sarihwahséhton ne wahtenikonrón꞉ni só꞉tsi teionhó꞉tes ne raorihwàhke ne Roiá꞉ner, ne raotiʼioténhsera tsi tetiókaras nón꞉we ní꞉ken, tánon ronónha ne rónhton, “Ónhka hiontʼkhíkens? Ónhka nahionkhiʼienhtérihke?”

¹⁶ Ní꞉se tesewanonwetsawéronhs norihwahókons! Ahówenh onhtèken ne rattsetónhni thóh nahontahonwáhthate tsi niiót nonawastakarí꞉io? Ahówenh onhtèken ne nahó꞉ten káhson nahawénhase ne ró꞉son, “Iáh rahónha tehatsatónhni”; khés tsi nahó꞉ten ne kaieronhtónhni nahawénhase ne roieronhtíson, “Iah thahóten tehonikonraienʼtátskon”?

Nararát꞉tsera Tsi Niaʼhawenonhátie

¹⁷ Iáh onhtèken ne Lebanon kwák kénk nikariwésha né ienwáton ne kwáh í꞉ken tsi enkaiáneraste kahentàke, tánon ne hioianeráhston kahentàke thóh nentʼkonwáhthate tsi ní꞉ioht ne karakhonkówa?

¹⁸ Né thóh entewenhniseráteʼke ne tehionhontaʼkwékon kwáh kí entsakoktón꞉teʼne naowenhnaʼhókons ne kahiatonhserakweʼnónhni, tánon thóh entkahiákenhne tsi naʼtetiosaʼtahkéras ó꞉ni tetsiókaras tánon ne teieronhkwékon kwáh kí entiékhenhne.

¹⁹ Né tiʼiakawé꞉ron iaweronhátie enhieiéna náse atonhnarát꞉tshera rahonhàke ne Roiá꞉ner, tánon ne kwáh iakotenhténion nonkwehókons kwáh kí enhiontonhnáren rahonhàke tsi nikáien ne Roiatatokénti khók í꞉ken ne Israerʼronónke.

²⁰ Asèken ne ranatakárias iáh kanèka tahonsaré꞉sehke, tánon ne thiʼsakoiéron kwáh thenhonwátaste; ratiʼkwékon ne ronathateweienhnenhtáʼon kenhniahatí꞉iere ne karihwahetkénhsera tsi enhonwatíʼiakʼse—

²¹ nón꞉ka neh aiakoriwahióten nón꞉kwe aiakó꞉ti ne kaianerenhseràke, nón꞉ka ne ronhwateristaiénhni ne rarihwénhtha ne tsi iothenhenrakáronhte, tánon né iáh othènon tahontakarihónhniaʼte ahiontonhníhen ne karihwakwahrihshiónhtshera tsi nikáien ne tseiérits.

²² Ne káti wahón꞉ni rá꞉ton ne Roiá꞉ner, ónka shoiatákwen ne Abraham, tsi niʼiotiéren tsi ronónhshote ne Jacob: Iáh ónenh tetsió꞉wenk ne Jacob ahonsahatehénseʼke, iáh ónenh tetsiówenk ne rakonsàke tahonsahatskenenhnatónhten.

²³ Asèken nó꞉nen enshakóken ne sakohioʼokónhas, né nahohioténhsera ne katsanàke, ne thóh rahohénton, kwáh enhatiʼhiatatériste naksénhna; kwáh kí enhonwahiaʼtatériste ne Rotokénti Rahonhatsíwa í꞉ken ne Jacob, tánon thenhatítaʼne nahonwahsénhnaien ne raotiní꞉io NʼIsraerʼronónke.

²⁴ Tánon tsi niʼiákon ne tenhionterientawénhrie ne tsi iakónnhe kwáh kí ienhotiʼnikonraiéntaʼne, tánon tsi niʼiákon ne iakorihwakaténhen kwáh kí enhieiéna ne karihonhnienhnítshera.