Isaiah 27 - Ohiatonhseratokénti

Israel Aoiatakeʼnhá꞉tshera

¹ Ne eʼtho entewennhniserateke ne Roiá꞉ner skát꞉ne ne raoniakátstensera tánon ne teotenonhianiton washá꞉rowahne kwáh enhá꞉rewate ne katsinón꞉iowanen ne iotekwenhá꞉tse oniá꞉re, ne ne katsinón꞉iowahnen tewatsiá꞉thatatseons oniá꞉re, tánon kwáh enhanonwa꞉riákon ne ionnonhwarón꞉tietha ne kaniatarakekó꞉wane í꞉wes.

² Né thóh enwenhniserateke: Né ioiá꞉nereh tsi iotenenhará꞉reh, neh teserí꞉wahkwat!

³ Í꞉ih, ne Watiá꞉ner, kenikonrá꞉re; kwáh tsi niatekawistaheks tsi knehkanón꞉tens. Kenikonrá꞉re ne tsi niwasonhtesons ó꞉ni tsi niwenhniseré꞉sons ne káti ne tó꞉sa onhka aiekweni nakonwakaronhni;

⁴ Iah tewakenakwens; Tó꞉ka ne entewakon nohiktas tánon nhó꞉nionhwaras, kwáh thóh nienhenke nahiatsaterí꞉io. Kwáh kí enkatsahá꞉thakwe.

⁵ Kes serí꞉hon naonkatsatanenhtát꞉ten ne nahontakene, kwáh kí skennon tionhni tsi nòkwah ní꞉ih, kwáh kí skennon tionhni tsi nòkwah ní꞉ih.

⁶ Nenhtewenhniseratenionke ne Jacob rahonhake kwáh enkateronhten, Nisrael kwáh enkatsitsionten tánon thenkarenharon, tánon kwáh ne tentkarate ne tsi ionhwenhtsate ne kahiksonhas.

⁷ Sakohiatsenenhton ken tsi ne nihsakohiatsenenhte tsi niká꞉ien ne ronwatiièn꞉ton? Katon ken ronwatinonhwarhiakon tsi neh nihonwatinonwarhiá꞉khon tsi niká꞉ien ne ronathawenthon tsi wahonwatinonwarhiá꞉khon nonhneʼe?

⁸ Tsi wahétsirekwahte, wahehtsinientó꞉rahkwen ne rohnón꞉ha; ne ne raowé꞉rashatstensera tsi éh꞉ren washá꞉kohiathenhawite nètho wenhniserá꞉teʼkwe ne tsit karakwinekens nontakawerenhawe.

⁹ Né꞉tho í꞉ken neh ne raonhí꞉tsera ne Jacob kwáh kíʼ éhren enkahawí꞉tonke, tánon né kí kí꞉ken né kwáh enkaná꞉nonhake tsi enkariwanirate tsi eren enskahawitonhke ne raorihwanerahát꞉tshera: né nó꞉nenh neh enrón꞉niate nó꞉nenhiaokons ne tsi wát꞉tsenharakwahs tsi ní꞉ioht ne ohsawé꞉ta oneniá꞉okon tekarí꞉ton kenknihwas, iah kaneka ne iotó꞉kenti kanawahatásonhas kes nahontsienkwahronhniate ne ietsienharaʼkwà꞉ke ne shé꞉kon akatá꞉ke.

¹⁰ Asèken ne tekanatanaktonhkwe nek khok iatetsó꞉thatenhron, nètho ratinakerekwe ró꞉nanahkerakwen tánon ronatewenteton, kwáh né꞉ne iahonwenhtsiát꞉thenhake í꞉ken; thóh nón꞉we ne tionhnonskwahrons owí꞉ras nikontihontats, thóh kontenaskwahiens, tánon enkontinahtoskaronhko nahonhatasonhas.

¹¹ Né nó꞉nenh ne kanhá꞉hatakwení꞉io iostatʼtenhén, tekaiá꞉khons; konhnón꞉kwe entkonhne ne enkontʼtsenhonhniate. Asèken né kí ken nonkweokons né iah tehotiien nahotinikonraientane; ne neʼtho í꞉ken tsi niká꞉ien ne sakohiatison iah tahontahó꞉tenonwák꞉then, né sakohiatonhnianion kwáh iah thá꞉sakawehnesthen natatithenhron.

¹² Né thóh entewenhniserateke ne Roiá꞉ner kwáh enhá꞉waheke tho tsi kanatserathá꞉tse ne Euphrates tsi nió꞉re tsik kahionhá꞉tatse ne Egypt, tánon ní꞉se kwáh enhietsiiá꞉tarohroke tsi sewahiá꞉tatʼtions, Ó tionkwe ne Israerʼronónke.

¹³ Tánon nètho entewenhniserate kowanenh iehonrawátsta enwatatiston, tánon tsi nihiakon ne iakotsiá꞉thatonhon ne tsi ionhontsaien ne Assyria tánon tsi nihá꞉ti ne ronwatihiatinekenhen ne tsi ionhontsaien ne Egypt kwáh tentonhne nahonwasenhnaien ne Roiá꞉ner nètho nón꞉we tsi iononhtató꞉kentike ne Jerusalem.