Isaiah 26 - Ohiatonhseratokénti

Né Judah Aorénhna Naʼtesenhniéntshera

¹ Né éhʼtho entewenniseráteʼke kí꞉ken karénhna kwáh thenkarihwá꞉kwenh ne tsi watonhontsáien ne Judah: Kashátste nonkwahnáta; rakétskwas natesenhniétshera tsi ní꞉ioht ne wathenhenró꞉tons tánon ne kanikató꞉tons.

² Sewaʼthenhenraʼnontonkwenhátons, né káti nahónton ne tionkwetaiéris ne ratíhawe tewetákwen ahónton iahontáwehiaʼte.

³ Tsi nihiákon ne rotiʼnikonrató꞉ken seiatienawast ne skénnon í꞉ken— né꞉ne skénnon tsioríhwa tsi tsesehtákwen.

⁴ Tatsisewetakwénhak ne Roiá꞉ner né꞉ne tsi nénhwe akénhake, asèken rahonháke ne Roiá꞉ner Ní꞉io sáien ne tsi nénhwe ostʼténra í꞉ken.

⁵ Asèken ehʼtàke naʼthetesakohiaténha; né thóh nón꞉we nihatinákere tsi nón꞉we ne kwáh éhʼneken tiót꞉te í꞉ken; kwáh kasenhnowáhnen kanatowánenhs rahón꞉ha ehʼtàke sarón꞉ni. Èhʼtho ehʼtàke sahá꞉ien ohontsá꞉ke, thonsahakenróiente.

⁶ Thóh ratiratáties, né꞉ne ionshitàke ne iakóten, Tsi natehontekhahákwah ne teiontkárhias.

⁷ Tsi nihotihahóten ne tionkwetaiéri iotʼthahakwahríshion í꞉ken; Ó Saiá꞉neren, í꞉se stakwaríhshions tsi ronaháte ne tionkwetaiéris.

⁸ Ne tsi iohatátie ne sarihwenhtátsheras, Ó Saiá꞉ner, í꞉se kwahrá꞉re; ne shasénhna tánon thisatʼtsénhnate né natónnhets waskáneks.

⁹ Nakatónnhets í꞉se saskánets ne tsi niwasónhtes, nakenikonrá꞉kon iehiokontákwen saiatísaks. Asèken nó꞉nenh ne sarihwenhtátshera ohontsàke í꞉wes, ne ienakeré꞉nion ne tsi ionwenhtsá꞉tes ieweienhtétas ne karihwakwahrihʼshióntsheras.

¹⁰ Tó꞉ka shí꞉ken kaiataterísera ionthatenatónhni ne ionkwetakétʼkens, iáh kí tehatiweientétas ne karihwakwahrihshióntsheras; ne tsi ionwenhtsáien ne tkariwaiéri né kénh enhonteriwaténtsiaʼte ne iáh tetkariwaiéri tánon iáh tehontkáthos ne raoʼiatanerakwáhtshera ne Roiá꞉ner.

¹¹ Ó Saiá꞉ner, ne satsianàke iotharatáhton, ók iáh kí tehontksatos. Sheríhon nahontkátho tsi nisateriwaién꞉ni ne shonkwetaʼshónhas, tánon ronhtéhen. Serí꞉hon nótsire ne iesáskwenhs ne ahonátonhte.

¹² Ó Saiá꞉ner í꞉se enserihwanírate ne skénnon í꞉ken nonkwahrihwàke, asèken kwáh í꞉ken, tsi thokʼníkon ionkwáhien, ne tsi niskwahtsheràse.

¹³ Ó Saiá꞉ner onkwahʼNí꞉io, thiʼhátite ne rotiʼiáners waʼhonkiʼiatkoraserónhnien, ók ionkwahrihwanirá꞉ton ne sasénhna iatekaiáti khók í꞉ken.

¹⁴ Ne ronenʼhéion iáh tehonónhnhe; ne tsi iothasátahreh iáh thatahonthontkétsko— tsioríhwa tsi sherewáton tánon shehiatónhton, tánon akwékon sarakéwenh ne nahonwenehiarastáhkwahke.

¹⁵ Ók sheʼtsiokowanáton ne rononhontsakeró꞉nons, Ó Saiá꞉ner, shetsiokowanáton ne ronhnonhontsaʼkerónons; wahesahiatanerákwahte; sakowaná꞉ton akwékon ne tsi karistatátie ne tsi ionwenhtsàte.

¹⁶ Ó Saiá꞉ner, aterientakariahtserákon tsi wahesahiatíshaʼke, tahonwéron naʼterenhnaientátshera nó꞉nenh ne sáwenk karehwatátshera sahotíraʼne.

¹⁷ Kwáh tsi níoht ne tsiothonhwísen ne iowíraien, tsi natewatsiathatahséons tánon tehiohenrétha tsi naʼtehiowehestánions nó꞉nenh ákta í꞉wes niahiohiátiʼwe, èhtho ó꞉ni ní꞉i nihionkwahiátawenhskwe Í꞉se saríhwah, Ó Saiá꞉ner;

¹⁸ aionkwahwiraién꞉taʼon, ionkwatʼkarateniáton, ók nekʼkhók wahakwanákeratsʼte nowé꞉ron. Iáh thahóthen tatehionkwahténtion nonwenhtsàke, tánon iáh ónhka teiakawenhnahkeráton nahienákereʼke nonwenhtsàke.

¹⁹ Ne iesenhé꞉iaseh kwáh kíʼ entionhthonʼnhete, ne raoʼnonheióntas kwáh kíʼ tentewatʼkétsko. Ó nokenhràke sewaná꞉kere, sewá꞉ie tánon tesewarí꞉wak natsenhnonhniátshera! Asèken ne sahaweiásera kwáh teiostarát꞉te tsi iohá꞉weien, tánon ne tsi ionwenhtsá꞉te kwáh entsaʼkahónnhete ne wahónhnise tsi ná꞉he thonenʼhéion.

²⁰ Káts, akonkwetaʼshón꞉has, iaʼsewatáwahiat ne sewáhwenk kahnaktaiéntons, tánon thontasewanhó꞉ton ne tsi sewatenonhkáronʼte ne sewásonhne; sewatáset niʼkarihwésha tsi nió꞉re ienwatohetste ne kanakwáhtshera.

²¹ Asèken ne Roiá꞉ner thahiákens tsi nón꞉we thénteron ne nasakoréwaʼte ne ratinákereh nonhontsàke ne raoʼtirihwaneraháktsheras entkarihónhniaʼte; nonwenhtsa kwáh enweneste nó꞉nekwenhsa nètho ionekwáhon, tánon iáh shé꞉kon tahonsahiakoróhroke ne ronhwatíʼrio.