Isaiah 25 - Ohiatonhseratokénti

Tehiontenonweráton Tsi Enʼtionthateniákente Tsi Nòkwah Ne Kaniakatsténsera

¹ Ó Saiá꞉ner, í꞉se ná꞉ke Ní꞉io í꞉ken; ní꞉i Kwáh enkonsenhnakaráthate, ní꞉i kwáh tenkonshennanerá꞉kwaʼte; asèken iorihwanerakwahténions tsi nisatieránion, tisatenonkónhni tsi nisheiatonhniánion tsi nahoténsons ne ionnhé꞉nions ne wahonhní꞉se tkènhne, iorihwatóken tánon tokenhskeʼónwe í꞉ken.

² Asèken né wasónhniaʼte ne kanatowanénhke naiotsʼtohkótane, tánon ne watenhenraiénʼtakwe ne tekanatanákthonhkwe ioriwénhtahon; ne tsi rotinonsó꞉ton ne kenkthithonénon né꞉ne thóh kanátakon iáh kí ó꞉nen teskahnátaien, kwáh iáh nonwénhton thahonsahionhníhake.

³ Ne káti né꞉ne ratiʼshátstes onkwehókons kwáh eniesahiatanerákwahte; né kannatowánens ne iáh tehonanitenrátskon onkwehókons kwáh enhieshatsánike.

⁴ Asèken í꞉se sehiatewehién꞉ton ne iakóten, í꞉se sehiénawase ne tehontʼkárhias thóh tsi natehonanikónrahre, ronaskwáhere nó꞉nenh iokenhnó꞉ron tánon ronterakwahwerostákwah nó꞉nen iorakwahtaríhen. Nó꞉nenh tehonateraʼnekarénhni ne iáh tehotí꞉ien nataniténron thóh niʼiohtónhne kwáh né꞉ne koseràke nó꞉nen iowisónhtion,

⁵ tsi nihontsarokwáhtha ne tihononhontsàte kwáh né꞉ne iohtarí꞉hen tsi nónwe nihiostát꞉then í꞉ken, í꞉se teshaseronhnénhtha ne iotaríhen né shátstha tsi nihiorakwaʼweróston ne iotsatarónhnions; ne raotirénhnas ne iáh tehonanitenrátskon sák thónton.

⁶ Né kénh꞉en tsi ionontáhereh ne Sakoiá꞉ner ne ronterí꞉ios ratiʼronhiakeró꞉nons kwáh tsi ensakahónhnien ratikwé꞉kon nonkweʼhókons tsi ensakhokʼkhwahéraʼse né꞉ne iotkhwarésenhs, tánon ne ne kwáh í꞉ken ionekaksʼténha otsítsia enhatinekí꞉ra, né꞉ne iokhwarésenhs ne tekaiéston nostarònwa, tánon ne ne kwáh onekasthénha otsítsia ne kanonwakénston ne aóskon í꞉ken.

⁷ Tánon kwáh kénhen tsi ionontáhere enhátonhte ne iakoteroróks꞉ton ne iehonwanatseténhni nonkweʼtakwékon, náshiʼre tekatakwahrítʼton ne raotirihwáke ne ronhnonhontsakerónons; kwáh kí ienhatsiaʼtanékwahne ne kenhéion né꞉ne tsi nénhwe enkénhake.

⁸ Eʼthó꞉ne ne Roiá꞉ner Ní꞉io kwáh ensakokaseró꞉keʼwe tsi niaʼteiekonsákes, tánon ne raonatehénseras ne rahonkwetaʼshón꞉has kwáh akwé꞉kon enren enshaháwiʼte ne tsi ionwenhtsáte, asèken né꞉ne Roiá꞉ner thoʼwenhninekénʼen.

⁹ Kwáh enwahʼtsá꞉tonke ne thóh entewennhniseráte, tiaʼtkátho, né kí꞉ken nónkwah Ní꞉io í꞉ken; asèken raón꞉ha ne tsi tewarhárekwe; ne káti ne raón꞉ha ahón꞉ton ashonkwanónsthaʼte. Né kí꞉ken ne Roiá꞉ner rahónha tsi tewarhárekwe; Ánion kíʼ tewatsenhnónhni tánon tewatonhnáren thóh raoʼiatakenahtsherákon.

¹⁰ Asèken ne ratsanàke ne Roiá꞉ner kwáh enká꞉rane kí kénhen ionónte. Ne Moabites kwáh enhonwatiʼratatsiéson tsi nón꞉we nihotinákʼte tsi ní꞉ioht ne kawá꞉he ieráthatses tsi iehiakotsetákwah.

¹¹ Eʼthohsàne tehonatsakwahríhshion nasénhnon nón꞉we í꞉ken, tsi ní꞉ioht ne ronhtáwenhs tsi tehonatsakwahríhshion tsi ronataʼwenhátse, tsi nihatinaie kwáh kí ehʼtàke enkénhake iawerohátien tsi niwenhtorá꞉tie.

¹² Tsi nitsiótʼtes tsi naʼtekanatanátʼtons ne rahosontasónhas kwáh kí ehʼtàke enwátionke, ehʼtàke iónhni, iewátion nonhontsá꞉ke, iekaníhare nokenhràke nón꞉we.