Isaiah 24 - Ohiatonhseratokénti

Ó꞉nenh Thóhwa Akonwaríwenhte Ne Tsi Ionwenhtsàte

¹ Nón꞉wa ne Roiá꞉ner ó꞉nenh thóhwa ahatsiésate ne onwènhtsa tánon ne enronhniá꞉te iáh ónka tahonsaienákerehke, tánon kwáh tenhawahtáse ne éhʼneken tsi ionwenhtsàte tánon teshakokthó꞉kwahte né thóh ienakerénion.

² Tánon thóh kí nenhiáwenhne, kwáh satenhkatá꞉tonhke nonkwehhó꞉kon, ó꞉ni ne ratiʼtsihénstatsis; ó꞉ni ne rahnáskwah, ó꞉ni ne rahiatahkweʼní꞉io, ó꞉ni ne kaʼnhátshera, ó꞉ni nohén꞉ton iékate ne kanónskon; ó꞉ni ne ranínons, ó꞉ni ne ratkérons; ó꞉ni ne sakoníhas, ó꞉ni ne ronhwaníhas; ó꞉ni ne sakokaró꞉tanis, ó꞉ni ne rotkárote.

³ Ne tsi watonwenhtsá꞉te kwáh í꞉ken tsi enwatsesátonhke tánon kwáh í꞉ken tsi sén꞉ha enhontsaʼtakwení꞉ioste; asèken Roiá꞉ner kí꞉ken thowenninekénhen kí꞉ken owénhna.

⁴ Né tsi watonhwenhtsá꞉te wahotsiʼióhaʼne tánon wahoshatstenserón꞉ti, ne thonattsenhnates ne tsi watonwenhtsá꞉te wathontonhnaténi; ne tsi karonhiáte wahoshatstenhserónhti ská꞉ne tsi ionwenhtsàte.

⁵ Ne tsi ionwenhtsá꞉te thóh káien iotaksénhen thóh ratiʼhiató꞉ron ne etʼienákere; asèken tekonwatawenhráti ne kaianerénhsera, tehotiʼiákon nateriwaseronʼniáhtsheras, tehotiʼhiákon ne tsi nènhwe akátake nʼaterihwaseronhniátshera.

⁶ Né thóh ní꞉iot ne kariwaieshá꞉hon enwá꞉ke ne tsi ionwenhtsàte, tánon èhʼthoh ienakerénion né enhiakoronhiákente nakonhí꞉tshera; né káti aoríhwa ne ienakerénion tsi ionwenhtsáte iáh tetiontonkwetaká꞉te, tánon kénk nihionkwé꞉take iatetsakothaténhron.

⁷ Notsítsia ienekirátha ienwasteske, Né watenenharíhseres onhtakénheie; ratiʼkwékon ne ronhtenikonró꞉ris tahonhnonhníserenhne.

⁸ Natenikonrorhiá꞉tshera ne kén niʼkanakwá꞉ha ienakwahetʼtákwah kwáh sakʼthí꞉ken, ne iotsiaró꞉kwen ne iakotenikonró꞉rih ronatkáwenh, ne hiontenikonrorhiatákwah iehonrawátsta sák thí꞉ken.

⁹ Iáh ó꞉nen tesatinekíra notsítsa ne tahatirihkwákwaʼte; ne kanekashátste enhotiʼtskaráthen tsi niháti né꞉ne rotinekíren.

¹⁰ Né tsi kanatowanénhke tsi naʼtekonwanitonhniaténhni tekonwanataríhton, kwáh tsi niaʼtekanónsakes tsi ronatenonhtónhnion né꞉ne tó꞉sa ónka aiekwéni niahiontáwehiaʼte.

¹¹ Tsi niʼiakonakwénhen thóh tsi tekanatokénserons asèken tiotnekokte notsítsa; akwékon natsenhnonniátsheras iáh teskáien; nahotsenhnonniátshera ne tsi ionwenhtsàte iotón꞉hon.

¹² Ononwénhserat khók iatetiotaténron ne kanatowanénhke, ne tsi iothenhenrakarónhtons kwáh tewatʼtokwáhton tsi nihiorihwenhtáhons.

¹³ Asèken kwáh kí thóh nenhiawénhne ne tsi ionwenhtsàte tánon ne tsi ratiʼnakeréhnion ne ronhnonhontsakeró꞉nons, kwáh kí tsi ní꞉ioht nó꞉nen ne iakeniewátha karónhta konwawahétshion, kwáh teʼthonhnonhrónhkwas nonénhare nó꞉nenh rotíshon tsi rotiʼnenhará꞉kwen.

¹⁴ Wahontewenhnakétsko, wathatirihwákwe tsi nihonatʼtsenhnónhni; thontahotihénrete ne tsi iatewattséntʼthos èhʼneken wahonhnó꞉heste ne raiatanoronkó꞉wa Roiá꞉ner.

¹⁵ Né káti aoríhwa ne tsitkarakwínekens nokwàhti tatsítsion ne kaiatanerakwáhtshera ne Roiá꞉ner; ne tsi kawenhokwatʼtóntses ionhontsakérons ronwasenhnówanat ne Roiá꞉ner, ne Sakoní꞉io í꞉ken NʼIsraerʼró꞉nons.

¹⁶ Tsi iehiotonhontsiotʼtaníhon ionkwát꞉tonhte ne karenhnasónhas ne kanonweratónhtshera, né꞉ne raoʼhiatanerakwáhtshera í꞉ken ne rotonhkweʼtakwahríshion. Ók káton, wakanikonrókten, wakanikonrók꞉then. Wakenikonrák꞉sens! Asèken ne ioteriwát꞉teron ne kén niekaiéra ne ioterihwát꞉teron, ne ioteriwát꞉teron ne kén niekaiéra ne kwáh í꞉ken ioteriwát꞉terons.

¹⁷ Kateróntshera, tánon ne iosonhwakáronhte, tánon ne tewanikarará꞉kon sewatʼráni, Ó ne tsi ionwenhtsàte sewanákere!

¹⁸ Ónhka aiontèko nék nahiakothónteʼne katerónhtshera kwáh kí ienieiáthenhne ne tsi iosonhwakáronhte; tánon ónka ne tahontaierát꞉then nosonhkwákon kwáh kí né enhiakoiéna ne tewanikárare. Asèken ne tsi iononstonkwahʼkarónhton ne karonhiáke tekanonhontséseron, tánon ne tsitkenskwáhere ne tsi ionwenhtsáte teiowishónhkwa.

¹⁹ Ne tsi ionwenhtsáte kwáh í꞉ken tsi tehioríhon, ne tsi ionwenhtsáte tehiotó꞉re asénhnon, ne tsi ionwenhtsáte kwáh í꞉ken tsi kashátste tsi iowákon.

²⁰ Né tsi ionwenhtsáte tehiowénhtons tsi ní꞉ioht ne iakoneka, tehiawénhtons tsi ní꞉ioht ne kénk nakanonsáske; nahohteriwaʼtewahtón꞉tshera thóh káien iókste èhʼneken káhere, tánon karéhniens, tánon iáh shé꞉kon thatahonthontʼkétsko.

²¹ Ne thóh entewenhniseráteke ne Roiá꞉ner kwáh ensakoréwaʼte ne ratironhiakeró꞉nons thóh karonhiáke, tánon nonwenhtsáke ne rotinontí꞉ios ne tsi ionwenhtsáte.

²² Kwáh kí skát꞉ne tsi enhonwatiʼhiataró꞉roʼke kwáh né꞉ne ratinhó꞉tons ne tsi iosonwakáronhte; kwáh kí enhonwatinó꞉ton ne tsi iontatenotónkwah, tánon tohʼkárah nónta onakènhke kwáh kí enhonwatiréwaʼte.

²³ Eʼthó꞉ne nasontʼthenhnékha karákwah kwáh enhioneráko, tánon nentsekhenékha karákwah enwatéhen; asèken ne Sakoiá꞉ner ne ronterí꞉ios ratironhiakeró꞉nons kwáh kí enhatenontí꞉ioste ne tsi Ionónte ne Zion tánon ne Jerusalem nón꞉we, tánon raotihénton ne rahonkwetashón꞉has ne rotiʼtstenhokónhas kwáh kí enréhneste ne raoʼhiatanerakwáhtshera.