Isaiah 23 - Ohiatonhseratokénti

Nowenhnasónhas Ne Aorihwàke Ne Tyre

¹ Ne watewenhnakaratá꞉ton ne aorihwàke ne Tyre. Sewatewenhnó꞉ten, Ósewahhonweiaʼkowátshons ne Tarshish, asèken ne tesanatanákʼton watónhton. Iáh teská꞉ien ne ionrarókstha Nó꞉nen satonhtahónhne ne Cyprus wahónt꞉toke.

² Sák tahsewathatón꞉ni, ne sewanakerá꞉tie tsi kawehnótons, ne sewatkérons ne Sidon, ne ietsirihwakareniénhnis wathatiʼniatarí꞉iaʼke ne kaniatarakhekó꞉wa, saietsiʼhiéritʼtse tsi nahoténsons tesewatonhontsóni

³ tánon thóh tsi niwé꞉so kanekónhnions; né sewatwistonhniátha ne ohnátsias ne Shihor, né꞉ne Nile nón꞉we tkaientwákwen; í꞉se sehiathenhnínonhse ne ronhnonhontsakeró꞉nons.

⁴ Satehénhsek, O Sidon, asèken ne kaniatarakhekówa hontáti, netekaniataranák꞉ton ne kaniatarakhekó꞉wa, watónhnions: “Iáh ó꞉ni tewakeronhiakénhen khéhs nakenákeratsʼte, iáh ó꞉ni tekheiehiáron ne kén nithotiʼiónhsa ronhnón꞉kwe khéhs nakheʼiehiáronhke ne kén nitsotiʼiónsas konhnón꞉kwe.”

⁵ Nó꞉nen noríwahse iénhwahwe ne Egypt, kwáh kíʼ enhatiʼnikonraronhiáken tsi nihotirihwarónhken ne Tyre aorihwàke.

⁶ Iatetiá꞉iat ne Tarshish— sewatiónhnion, Ó ne tsi kawehnhó꞉tons sewanákere!

⁷ Né kén kí꞉ken ne satonnhará꞉kwah kanatowanénke thóh nón꞉we tiotásawe ne wahónhnise tewenhniseraʼténionskwe, né꞉ne wahsitàke ieioiathénha nahí꞉non nió꞉re iahontená꞉taièn?

⁸ Ónhka iakotenikonrónhni kí꞉ken tsi nòkwah ne Tyre, né꞉ne rahnikónrare nanonwaróres, ne ronahtenhninonʼserótons ne ne ratikoráshons, ne ratiʼkarateniátha natkeronhtátshera ronónha ne kwáh tehowatirensarónkwa nonhontsakwé꞉kon?

⁹ Né Sakoiá꞉ner ne ronterí꞉ios ratiʼronhiakeró꞉nons rotenikonhrónhni— tsi enhentátsate ne kanaiésehra akwékon ne kaiatanerakwáhtshera, nasakotéhate ratiʼkwékon ne tehatirénhsaron ne tsi ionhontsáte.

¹⁰ Thóh iatesewahiá꞉iak ní꞉se tionhontsáke, Ó sahonwehiakowát꞉tsions ne Tarshish; kí꞉ken konraróstha iáh othènon tèsken.

¹¹ Iatehótsate éhʼneken ne kaniatarakhekowáhne, waháwake ne tsi kanontiʼiotsheráien; ne Roiá꞉ner sakoteniéntenhse nahorihwashón꞉ʼahs ne Canaan nahontónh꞉thonke nostènra watenhenraʼién꞉tons.

¹² Wahénron: ní꞉se kwáh iáh shé꞉kon tahonshasatʼtsenhnonni, Ó í꞉se ne teieshanestsiákon ne iáh tekanakwahientéri aoién꞉ha ne Sidon; téstan, iatetsáiak ne Cyprus— iekaníhare kí ne èhthoh nón꞉we iáh tsiahiʼshorihsénhtane.

¹³ Iasatkátho ne tsi thononhontsáien ne Chaldeans! Né kí꞉ken nonkweshón꞉has; iáh Assyria tèken. Ne konwaiatarákwen Tyre ne kontírios aotirihwàke. Sahontenonsonhniánion ne rotiʼienásehron kanikatótons, wahontenhararihshiónko nostènras watenhenraién꞉tons, ne wakonhiónhniaʼte nakarihwaiésha.

¹⁴ Tesewahiáiak, Ó sewahonweiakowátʼtsions ne Tarshish nón꞉we, asèken ne tesewanatanátʼtonhne nostènhra karihwénhton.

¹⁵ Thóh wenniseràte entewatásawen ne Tyre kwáh enkonwanikónren né꞉ne tsáta niwáhsen niʼioseràke, thóh nirónhnes ne ronnontí꞉io. Ne ienwatót꞉ten ne tsáta niwáhsen niʼioseràke, kwáh thóh nenhioiátawen ne Tyre tsi niwáton ne karénhna tsi nòkwah ne tsotakwahkaré꞉ni:

¹⁶ Iasenhowénhaf ne kahnhohiowáhnen, satenatítha, í꞉se ne tsatahnikonrénhen ne tsiothakwahkaréni! Ne saterenhnóten ne teiorenhnatsikhétare, teseríhwak wé꞉so karénhnakes, né nahónton ahiesehiá꞉rake.

¹⁷ Né ienwatók꞉ten ne tsáta niwáhsenh niʼioseràke, ne Roiá꞉ner kwáh ensanatarénase ne Tyre, tánon kwáh thensewatkaraténi ne iesewaterihónten tsi nitsioiotenseró꞉tenhne, tánon nahónha kwáh ne enwatsʼwátaʼkwe ne tsotakwahkaré꞉ri akwé꞉kon ne tsi kanakeraserakérons ne tsi ionwénhtsaien thóh tsi kakónshonte nonwenhtsá꞉ke.

¹⁸ Nahotkeronhtátshera tánon tsi natewaténtsahas kwáh kí Roiá꞉ner enhonwatonhnahéraʼse; tsi nikará꞉kwas kwáh iáh tahontewenhientónhake khés nahonshétonhke, ók kí nahotkeronhtátshera kwáh iawethatsáni enhiakoiéritʼtse ne kákhwa tánon natʼtserónhnia né꞉ne tsi nihiákon thóh ienákere rahohénton ne Roiá꞉ner.